ကိုဏီတာ
မြန်မာနိုင်ငံတွင် စံချိန်တင် မြင့်တက်နေသည့် ဆာလောင်မွတ်သိပ်မှု အကျပ်အတည်းကို ဖြေရှင်းနိုင်ရန်အတွက် ကိုရီးယားသမ္မတနိုင်ငံနှင့် ကမ္ဘာ့စားနပ်ရိက္ခာအစီအစဉ် (WFP) တို့ ပူးပေါင်းလုပ်ဆောင်သွားမည်ဟု ယနေ့တွင် သတင်းထုတ်ပြန်ခဲ့သည်။
အဆိုပါ အမေရိကန်ဒေါ်လာ ၁၀ သန်းတန်ဖိုးရှိ “REACH” အမည်ရ အရေးပေါ် လူသားချင်းစာနာမှု အကူအညီပေးရေး အစီအစဉ်တစ်ရပ်ကို စတင်လိုက်ပြီဖြစ်သည်ဟု ထည့်သွင်းဖော်ပြထားသည်။
၎င်းအစီအစဉ်သည် အပြင်းထန်ဆုံး ဒုက္ခခံစားနေရသူများထံသို့ စားနပ်ရိက္ခာနှင့် အာဟာရဆိုင်ရာ အထောက်အပံ့များ ပေးအပ်သွားမည် ဖြစ်သည်။
“အခုလို ခက်ခဲတဲ့အချိန်ကာလမှာ ကိုရီးယားသမ္မတနိုင်ငံအနေနဲ့ မြန်မာပြည်သူပြည်သားတွေနဲ့အတူ ရပ်တည်ဖို့ ကတိကဝတ်ပြုထားပါတယ်။ REACH (Responding with Emergency Assistance for Conflict-Affected Households) အစီအစဥ်ကတဆင့် ပဋိပက္ခနဲ့ သဘာဝဘေးဒဏ်ကို အများဆုံးခံစားနေရသူတွေကို အရေးပေါ်အကူအညီတွေ ပေးအပ်သွားမှာဖြစ်ပါတယ်။ ဒီပံ့ပိုးကူညီမှုကနေတစ်ဆင့် မြန်မာပြည်သူပြည်သားတွေရဲ့ အရေးပေါ်လိုအပ်ချက်တွေကို ဖြည့်ဆည်းပေးနိုင်ရုံသာမက ရေရှည်ကာလအထိ ကြံ့ကြံ့ခံနိုင်စွမ်းနဲ့ မျှော်လင့်ချက်တွေ ဆက်လက်ရှင်သန်နေနိုင်အောင် ကူညီပေးသွားနိုင်မယ်လို့ မျှော်လင့်ပါတယ်” ဟု မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံရုံးအကြီးအကဲ Mr. Bae Byeongsoo က ပြောသည်။
REACH အစီအစဉ်အရ ပဋိပက္ခနှင့် ငလျင်ဒဏ်သင့်ဒေသများရှိ လူဦးရေ သုံးသိန်းဝန်းကျင်ကို နှစ်လစာ စားနပ်ရိက္ခာများ သို့မဟုတ် စားသောက်ကုန်များ ဝယ်ယူနိုင်ရန် မိုဘိုင်းလ်ငွေကြေးစနစ်နှင့် ဘောက်ချာများမှတစ်ဆင့် ငွေသားများ ထောက်ပံ့သွားမည် ဖြစ်သည်။
ထို့အပြင် ကိုယ်ဝန်ဆောင်မိခင်များ၊ နို့တိုက်မိခင်များနှင့် ကလေးငယ် စုစုပေါင်း ၂၄,၀၀၀ ဦးကိုလည်း အာဟာရချို့တဲ့မှုမှ ကာကွယ်ကုသပေးမည့် အထောက်အပံ့များ ပေးအပ်သွားမည်ဟု WFP က ဆိုသည်။
မြန်မာနိုင်ငံသည် ကမ္ဘာပေါ်တွင် ဆာလောင်မွတ်သိပ်မှုကို ပြင်းထန်စွာ ရင်ဆိုင်နေရသည့် ပဉ္စမမြောက် အဆိုးရွားဆုံးနိုင်ငံ ဖြစ်လာကြောင်း နောက်ဆုံးထုတ်ပြန်ထားသည့် Hunger Hotspots Report တွင် ဖော်ပြထားသည်။
လက်ရှိတွင် မြန်မာပြည်သူ ၃ ဦးလျှင် ၁ ဦးနှုန်း (စုစုပေါင်း ၁၆.၇ သန်း) သည် စားနပ်ရိက္ခာဖူလုံမှု မရှိတော့ဘဲ ယင်းအရေအတွက်သည် ၂၀၂၄ ခုနှစ်က ရှိခဲ့သည့် ၁၃.၃ သန်းထက် သိသိသာသာ မြင့်တက်လာခြင်း ဖြစ်သည်။
အဆိုပါ လူဦးရေထဲမှ ၂.၈ သန်းမှာ ထမင်းတစ်နပ်အတွက် နေ့စဉ် အရေးပေါ် ရုန်းကန်နေရသည့် အခြေအနေသို့ ရောက်ရှိနေသည်။
စားနပ်ရိက္ခာဖူလုံမှု အကျပ်အတည်းကို ပိုမိုဆိုးရွားစေသည့် အဓိကအကြောင်းအရင်းတစ်ခုမှာ အခြေခံစားသောက်ကုန် ဈေးနှုန်းများ အဆမတန် မြင့်တက်လာခြင်းဖြစ်ပြီး ၂၀၂၁ ခုနှစ် အစောပိုင်းနှင့် နှိုင်းယှဉ်ပါက လေးဆအထိ ရှိလာပြီဖြစ်သည်။
WFP ၏ မြန်မာနိုင်ငံဆိုင်ရာဌာနေကိုယ်စားလှယ် Mr. Michael Dunford က “စံချိန်တင် မြင့်မားလာတဲ့ ဆာလောင်မွတ်သိပ်မှုနဲ့ အာဟာရချို့တဲ့မှုတွေအကြား အခုလိုအချိန်နဲ့တပြေးညီ ရောက်ရှိလာတဲ့ ပံ့ပိုးကူညီမှုအားဖြင့် ပဋိပက္ခနဲ့ ငလျင်ဒဏ်ကြောင့် ပြိုလဲခဲ့ရတဲ့ လူထုအသိုက်အဝန်းတွေအနေနဲ့ အကူအညီတွေ တိုးမြင့်ပြီး ရရှိနိုင်ကြမှာ ဖြစ်ပါတယ်” ဟု ပြောသည်။
WFP သည် အဆိုပါ အကူအညီများကို ဒေသခံ မိတ်ဖက်အဖွဲ့အစည်းများနှင့် အစိုးရမဟုတ်သော အဖွဲ့အစည်းများ (NGOs)အားချိတ်ဆက်လက်တွဲကာ အကူအညီ အမှန်တကယ်လိုအပ်ပြီး သွားလာရန်ခက်ခဲသည့် ဒေသများရှိ ပြည်သူများထံသို့ တိုက်ရိုက်ရောက်ရှိအောင် ပေးအပ်သွားမည်ဟု သတင်းထုတ်ပြန်ချက်တွင် ဖော်ပြထားသည်။
ဓါတ်ပုံ – ငလျင်ကြောင့် ထိခိုက်ခဲ့ရသော ပြည်သူများအား WFP နှင့် မိတ်ဆက်အဖွဲ့အစည်းများမှ ထောက်ပံ့ကူညီစဉ်(WFP)
#မြန်မာပြည်သူသုံးသိန်းကျော် #WFP #ကိုရီးယား #အရေးပေါ်စားနပ်ရိက္ခာ #အကူအညီပေး #ThanLwinKhetNews
Earthquake survivors received assistance from WFP with support from ROK.
Earthquake survivors received assistance from WFP with support from ROK
WFP works closely with partners to distribute emergency food and nutrition assistance to earthquake survivors in Mandalay.
WFP provides food assistance and specialised nutrition support to pregnant women, breastfeeding mothers, and children under the age of five.
WFP works closely with partners to distribute emergency food and nutrition assistance to earthquake survivors in Mandalay.
