ကမ္ဘောဒီးယားခေါင်းဆောင် ဟွန်ဆန်နှင့် ဖုန်းပြောဆိုမှုတွေ ပေါက်ကြားပြီးနောက်ပိုင်း နယ်စပ်အငြင်းပွားမှုအပေါ် ဖြေရှင်းမှုများသည် ကျင့်ဝတ်စည်းကမ်းဥပဒေကို ချိုးဖောက်တယ်လို့ ဖွဲ့စည်းပုံအခြေခံဥပဒေခုံရုံးက ဆုံးဖြတ်ခဲ့သောကြောင့် ထိုင်းဝန်ကြီးချုပ် ပေထုံတန် ရှင်နာဝပ်ကို ယနေ့တွင် ရာထူးကနေ ဖယ်ရှားလိုက်သည်။
ဖွဲ့စည်းပုံအခြေခံဥပဒေခုံရုံးက ထိုင်းဝန်ကြီးချုပ်နှင့် အတူ အစိုးရအဖွဲ့တစ်ခုလုံးအား ရာထူးကနေ ဖယ်ရှား လိုက်ခြင်း ဖြစ်သည်။
ဝန်ကြီးချုပ်ဟောင်း သက်ဆင် ရှင်နာဝပ်ရဲ့ အငယ်ဆုံးသမီးဖြစ်သည် ပေထုံတန်သည် ဇွန်လ ၁၅ ရက်နေ့က ကမ္ဘောဒီးယား ဆီးနိတ်ဥက္ကဋ္ဌ ဟွန်ဆန်နှင့် နှစ်နိုင်ငံပိုင်နက်နယ်မြေ အငြင်းပွားမှု နှင့် ပတ်သက်၍ တင်းမာမှုများကို ဖုန်းပြော ဆွေးနွေးခဲ့သော်လည်း နိုင်ငံအတွက် မှန်ကန်စွာ ရပ်တည်မပေးနိုင်တဲ့အတွက် တာဝန်ပျက်ကွက်မှုနဲ့ တရားစွဲခံရခြင်း ဖြစ်သည်။
ဖုန်းပြောသည့် အသံဖိုင်အား ဇွန်လ ၁၈ ရက်တွင် အများပြည်သူဆီကို ထုတ်ပြန်ခဲ့ပြီး တစ်ရက်အကြာမှာတော့ ဘူမ်ဂျိုင်းထိုင်းပါတီနဲ့ နီးစပ်တဲ့ အဖွဲ့ဖြစ်တဲ့ “အပြာရောင်အဖွဲ့” က အထက်လွှတ်တော်အမတ် ၃၆ ဦးသည် ပေထုံတန်ကို ဝန်ကြီးချုပ်ရာထူးကနေ ဖယ်ရှားရန် အသနားခံစာမှာ လက်မှတ်ရေးထိုးကြောင်း ကြေညာခဲ့သည်။
ယင်းနောက် ဇွန်လ ၂၀ ရက်တွင် အထက်လွှတ်တော်ဥက္ကဋ္ဌက အထက်လွှတ်တော်အမတ် ၃၆ ဦး၏ အသနားခံစာကို လက်မှတ်ရေးထိုးပြီး ဖွဲ့စည်းပုံအခြေခံဥပဒေခုံရုံးကို တင်သွင်းခဲ့သည်။
ခုံရုံးက အဆိုပါ တင်သွင်းချက်ကို လက်ခံပြီး ပေထုံတန်၏ ကျင့်ဝတ်ချိုးဖောက်မှုကို စစ်ဆေးရန် အတွက် တညီတညွတ်တည်း သဘောတူဆန္ဒမဲပေးခဲ့ကြသည်။
လက်ရှိတွင် နယ်စပ်တင်းမာမှုတွေ တိုးလာခဲ့ပြီး ဇူလိုင်လ ၂၅ ရက်မှ ၂၈ ရက် အထိ ငါးရက်ကြာ ပြင်းထန်တဲ့ နယ်စပ်တိုက်ပွဲတွေ ဖြစ်ပွားခဲ့ပြီး လူ ဒါဇင်နှင့်ချီ သေဆုံးခဲ့ပြီး လူပေါင်း ၂၆၀၀၀၀ ကျော်သည် နေရပ်စွန့်ခွာ ထွက်ပြေးခဲ့ရသည်။
#ထိုင်းဝန်ကြီးချုပ် #ပေထုံတန် #ရာထူးမှအပြီးသတ်ဖယ်ရှား #ThanLwinKhetNews
