ခင်သရဖီဦး
စစ်ကောင်စီ ထိန်းချုပ်ထားသည့် စစ်တွေမြို့တွင် ရှိသည့် အမြောက်တပ်များမှ လက်နက်ကြီးများဖြင့် ရမ်းသမ်းပစ်ခတ်နေခြင်းကြောင့် ပုဏ္ဏားကျွန်းမြို့နယ်တွင် နေထိုင်သည့် ဒေသခံတချို့ နေရပ်စွန့်ခွာ ထွက်ပြေးနေရသည်ဟု သိရသည်။
ပုဏ္ဏားကျွန်းမြို့နယ်က ငှက်ကြီးကျွန်းကျေးရွာ၊ ပဒေသာ ကျေးရွာ၊ အလယ်ချောင်း၊ တန်ဘက်လမ်းကျေးရွာနှင့် ကျွဲထိုး စသည့်ကျေးရွာများမှ ဒေသခံ ၅၀၀၀ ခန့်သည် အခြားဘေးလွတ်ရာ နေရာများသို့ စစ်ဘေးရှောင်နေကြရသည်ဟု အသက် ၂၀ အရွယ် ပုဏ္ဏားကျွန်းဒေသခံ အမျိုးသားတစ်ဦးက ဆိုသည်။
”ကားတွေနဲ့ အကုန်ပြေးလာကြတာတွေ့ရတယ်။ မနေ့ကဆို ကားသုံးစီလောက်နဲ့အပြည့် လာကြတာတွေ့ရတယ်။ အိမ်စောင့်လောက်ကပဲ အိမ်တွေမှာ ကျန်ခဲ့တယ်လို့သိရတယ်။ အကုန်လုံးနီးပါးက စစ်ဘေးရှောင်ကြတာပေါ့။ ”ဟု ၎င်းက ဆိုသည်။
စစ်ကောင်စီသည် ပြီးခဲ့သည့် ဩဂုတ်လ ၂၅ ရက်နေ့မှ စတင်၍ လက်နက်ကြီးများဖြင့် ရမ်းသမ်းပစ်ခတ်မှုများ ဆက်တိုက်ပြုလုပ်နေသည့် အပြင် ယမန့်နေ ဩဂုတ်လ ၂၈ ရက်နေ့တွင်လည်း ဆက်လက်ပစ်ခတ်မှုနေသည်ဟု အသက် (၃၀) အရွယ် စစ်တွေ ဒေသခံ အမျိုးသားတစ်ဦးမှ ဆိုသည်။
”ကျားမသောက်ဖက်ကနေ ငှက်ကြီးကျွန်းဖက်တွေကို ပစ်တယ်။ တိုက်ပွဲတွေကတော့ မရှိဘူး။ ဒရုန်းတွေ တက်လာတာရှိတယ်။ လက်နက်ကြီး ပစ်ခတ်တာတွေရှိတယ်။ နေ့ခင်း တစ်နာရီလောက်ကနေ ဆက်တိုက်ပစ်တာတွေ့ရပါတယ်။” ဟု ယင်းအမျိုးသားမှ ဆိုသည်။
ထို့အပြင် စစ်တွေတွင် တိုက်ပွဲဖြစ်ပွားနေခြင်းမရှိသော်လည်း ရေတပ်မှလည်း ပစ်ခတ်မှုများရှိနေပြီးတပ်ရင်းအခြေစိုက် စခန်းများမှ ပေါက်တောနှင့် ပုဏ္ဏားကျွန်းမြို့နယ်များသို့ ရမ်းသမ်းပစ်ခတ်မှုများအား မကြာခဏ လုပ်ဆောင်နေခြင်းဖြစ်သည်။
ရခိုင်တွင် စစ်ကောင်စီ၏ ပစ်ခတ်မှုကြောင့် အပြစ်မဲ့ ပြည်သူများ ပိုင်ဆိုင်သည့် နေအိမ် ၁၀၅၀၂ လုံး၊ ဘာသာရေးအဆောက်အအုံး ၉၀၊ စာသင်ကျောင်း ၄၅ ကျောင်း၊ ဆေးရုံးဆေးခန်း ၁၂ခု၊ NGO INGO UN အဆောက်အအုံး ၃ခု အပြင် တခြား အဆောက်အအုံး များအပါအဝင် အဆောက်အအုံး စုစုပေါင်း ၂၁၀၀၀ ကျော် ပျက်စီးခံခဲ့ရသည်။
ရခိုင်ပြည်တွင် စစ်ရေးပဋိပက္ခကြောင့် နေရပ်မပြန်နိုင်သူ စစ်ဘေးရှောင် ၆သိန်းကျော် ရှိသည်ဟု သိရသည်။
#စစ်တွေ #လက်နက်ကြီးပစ်ခတ် #ပုဏ္ဏားကျွန်းဒေသခံ #နေရပ်စွန့်ခွာ #ThanLwinKhetNews
