ထိုင်းနိုင်ငံ မဲဆောက်မြို့နယ်က ထာ့စိုင်းလွတ်ရပ်ကွက်ထဲက နေအိမ်တစ်အိမ်တွင် မြန်မာနိုင်ငံသား ၃ ဦးအားပါဝင်သည့် အွန်လိုင်းငွေလိမ်ဂိုဏ်းတစ်ခုအား ဖမ်းမိခဲ့သည်ဟု ဗဟိုစုံစမ်းစစ်ဆေးရေးရုံး (CIB) က ဩဂုတ် ၈ ရက်တွင် ထုတ်ပြန်လိုက်သည်။
ယင်းဂိုဏ်းအား အွန်လိုင်းမှ ငွေလိမ်ထားသည့် ဘတ် ၄၆ သန်းနှင့် အတူ ဖမ်းဆီးနိုင်ခဲ့သည်ဟု ထုတ်ပြန်ထားသည်။
“SKYFALL” စစ်ဆင်ရေး လုပ်ဆောင်စဉ် Huione Pay ကို အသုံးပြုပြီး အွန်လိုင်းငွေလိမ်လည်မှုလုပ်နေသူများ ကို ဖမ်းဆီးနိုင်ခဲ့ခြင်း ဖြစ်သည်။
၎င်းတို့အား ပြည်သူလူထုကို လိမ်လည်မှု၊ လျှို့ဝှက်အဖွဲ့အစည်း ဖွဲ့စည်းမှု၊ ပြည်သူလူထုကို ထိခိုက်နစ်နာစေနိုင်တဲ့ မှားယွင်းတဲ့အချက်အလက်တွေကို ကွန်ပျူတာစနစ်ထဲ ထည့်သွင်းမှု၊ ငွေကြေးခဝါချမှုနဲ့ ပူးပေါင်းကြံစည်မှု စသည့်စွဲချက်တွေနှင့် ရာဇဝတ်တရားရုံးက ဖမ်းဝရမ်းထုတ်ပြီး ဖမ်းဆီးခဲ့သည်ဟု ဆိုသည်။
အွန်လိုင်းမှ ငွေကြေးလိမ်လည်ခံရသူများသည် ဘဏ်အကောင့် ၈ ခုမှ ဘတ်ငွေ သန်း ၂၀ ကျော်အား စုစုပေါင်း ၁၈ ကြိမ် လွှဲပြောင်းပေးခဲ့ပြီး ၂ လခန့်အကြာတွင် လိမ်လည်ခံရသည်ကို သိရှိ၍ ရဲစခန်းသို့ လာရောက်တိုင်ကြားရာမှ အွန်လိုင်းငွေလိမ်ဂိုဏ်းအား ခြေရာခံမိခဲ့ခြင်း ဖြစ်သည်ဟု ဗဟိုစုံစမ်းစစ်ဆေးရေးရုံး (CIB) ၏ တာဝန်ရှိသူမှ ပြောသည်။
အဆိုပါ အမှုအား ဆက်လက်စုံစမ်းရာ အကောင့်အတုများ အားလုံးသည် ကမ္ဘောဒီးယားနိုင်ငံ၏ ရုံးအဆောက်အအုံ တစ်ခုတွင် ငွေကြေးလွှဲပြောင်းမှုများ လုပ်ဆောင်ထားသည်ကို တွေ့ရသည်ဟုလည်း ဆိုသည်။
ထို့အပြင် Cryptocurrency လမ်းကြောင်းအား စစ်ဆေးရာ ငွေကြေးများအား Huione Pay ၏ Wallet ထဲသို့ လွှဲပြောင်းပြီး ငွေကြေးခဝါချထားခြင်းများလည်း တွေ့ရှိရသည်ဟု သိရသည်။
ထိုမှ တစ်ဆင့် အဆိုပါ ငွေကြေးများသည် ဖမ်းဆီးခံရသည့် မြန်မာနိုင်ငံသားများ၏ Wallet သို့ ရောက်ရှိလာခြင်းဖြစ်သည်။
ဖမ်းဆီးခံရသူများသည် USDT cryptocurrency မှ တစ်နေ့လျှင် ဘတ် ၂၀ မှ ၃၀ သန်းအထိ လက်ခံရရှိပြီး ထိုင်းနိုင်ငံရဲ့ Exchange များမှ တစ်ဆင့် ငွေသားအဖြစ် ပြောင်းလဲခဲ့ကြပြီး ၎င်းတို့ ထိုင်းဘဏ် အကောင့်များမှ တစ်နေ့လျှင် ဘတ် ၂၀ မှ ၃၀ သန်းအထိ ထုတ်ယူခဲ့ကြသည်ဟု ဆိုသည်။
#မဲဆောက် #ငွေလိမ်ဂိုဏ်း #ဖမ်းမိ #ThanLwinKhetNews
