ခင်သရဖီဦး
စစ်ကောင်စီ ထိန်းချုပ်ထားသည့် စစ်တွေမြို့တွင် တပ်စွဲထားသော တပ်ရင်းများက ကျေးရွာများအတွင်းသို့ လက်နက်ကြီးများဖြင့် ရမ်းသမ်းပစ်ခတ်မှုများ ဆက်တိုက်ပြုလုပ်နေသည်ဟု စစ်တွေဒေသခံများထံမှ သိရသည်။
ပြီးခဲ့သည့် ဩဂုတ်လ ၅ ရက်မှ စတင်ပြီး စစ်တွေမြို့နယ် အတွင်းရှိ ဝါဘို၊ မလောင်၊ ရဲရိုးပြင်၊ ဇော်မဒက်၊ ချောင်းနွယ်၊ ကံပြင်ရွာဟောင်း၊ သုံးဆောင် စသည့် ကျေးရွာများအား စစ်တွေရှိ တပ်ရင်းများက လက်နက်ကြီးများဖြင့် ပစ်ခတ်နေခြင်းဖြစ်သည်ဟု အသက် ၂၈ နှစ်အရွယ် စစ်တွေဒေသခံ တစ်ဦးက ဆိုသည်။
”စစ်တွေဘက်မှာ ဒရုန်းတွေနဲ့ လာချတယ်။ လက်နက်ကြီးနဲ့ ပစ်တယ်။ လက်နက်ကြီးပစ်တာကလည်း ရမ်းသမ်းပစ်နေတာဖြစ်တယ်။ ကျတာကလည်း သူတို့ စစ်တွေ ဧရိယာနားတွေဖြစ်တဲ့ ဝါဘိုတို့၊ ရဲရိုးပြင်၊ မလောင်ဘက်တွေကို ကျတယ်” ဟု ၎င်းက ဆိုသည်။
စစ်ကောင်စီတပ်နှင့် အာရက္ခတပ်တော်တို့မှာ ယခုရက်ပိုင်းအတွင်း မြေပြင်တွင် ထိတွေ့တိုက်ပွဲများ မရှိသော်လည်း ဒရုန်းပစ်ခတ်မှုများ ရှိနေသည်ဟုလည်း ၎င်းက ဆက်ပြောသည်။
”တိုက်ပွဲဖြစ်တာကတော့ မရှိဘူး။ ထိတွေ့တိုက်ပွဲကတော့ မရှိဘူး။ဒါပေမဲ့ နှစ်ဖက် အပြန်အလှန် ဒရုန်းတိုက်ပွဲတွေတော့ ဖြစ်နေပါတယ်”ဟု ဆိုသည်။
စစ်တွေမြို့အား အာရက္ခတပ်တော် AA အနေဖြင့် ထိုးစစ်ဆင်တိုက်ခိုက်ရန် ပြင်ဆင်နေသည့်အတွက် စစ်ကောင်စီအနေဖြင့်လည်း ခံတပ်အား အခိုင်အမာ တည်ဆောက်ထားသည်ဟု သံလွင်ခက်က စုံစမ်းသိရသည်။
စစ်ကောင်စီသည် အာရက္ခတပ်တော်မှ ပုဏ္ဏားကျွန်းနှင့် ပေါက်တောမြို့၊ ရသေ့တောင်မြို့တို့အား သိမ်းပိုက်လိုက်သည့်အချိန်မှစပြီး ရေကြောင်းများကို ပိတ်ထားခြင်း၊ ကားလမ်းများရှိ တံတားများကို မြေတူးစက်များဖြင့် ဖျက်ဆီးခြင်းများပြုလုပ်ကာ စစ်တွေမြို့အား ပိတ်ဆို့ကာကွယ်ထားခြင်းလည်းဖြစ်သည်။
#စစ်တွေ #လက်နက်ကြီး #စစ်ကောင်စီ #ရမ်းသမ်းပစ်ခတ် #ThanLwinKhetNews
