ခင်သရဖီဦး
ရခိုင်ပြည် ၊ တောင်ကုတ်မြို့နယ်ထဲက မအီ မြို့မရဲစခန်းအား စစ်ကောင်စီက လေကြောင်းမှ ဗုံးကြဲ တိုက်ခိုက်ခဲ့ကြောင်းသိရသည်။
ဩဂုတ် ၄ ရက် နေ့လည် တစ်နာရီကျော်ခန့်တွင် ယင်းကဲ့သို့ ဂျက်ဖိုက်တာဖြင့် ဗုံး ၂ ကြိမ် ကြဲချခဲ့ ခြင်းဖြစ်ကြောင်း အသက် ၃၀ အရွယ် မအီမြို့ခံ တစ်ဦးက ပြောသည်။
” နေ့လယ်ဖက်မှာ ဗုံးကြဲသွားတာပါ။ ဗုံးသီးကတော့ မအီရဲစခန်းဟောင်းနဲ့ ခြံဝင်း အနီးအနားကို တစ်လုံးကျတယ်။ နောက်တစ်လုံးက လမ်းမထက်မှာ ကျပြီးပေါက်ကွဲသွားတာပေါ့။ အထိအခိုက်တော့မရှိဘူး။” ဟု ၎င်းက ဆိုသည်။
ပြီးခဲ့သည့် သြဂုတ်လ ၂ ရက်နေ့ တွင်လည်း စစ်ကောင်စီသည် သံတွဲမြို့ရှိ ဂျိတ္တောရပ်ကွက်သို့ စစ်ကောင်စီ ရေတပ်မှ လက်နက်ကြီး ၂ လုံးပစ်ခတ်ခဲ့သည့်အတွက် နေအိမ် ၂ လုံးပျက်စီးသွားခဲ့သည်။
စစ်ကောင်စီသည် တစ်နိုင်ငံလုံး အတိုင်းအတာဖြင့် လက်လွတ်ပေးလိုက်ရသည့် မြို့နယ်များအား အရေးပေါ်အခြေအနေအဖြစ် ပြီးခဲ့သည့် ဇူလိုင်လ ၃၁ ရက်နေ့တွင် ထုတ်ပြန်ထားပြီးနောက် လက်လွှတ်ဆုံးရှုံးခဲ့ရသည့် နယ်မြေများအား ထိုးစစ်ဆင်တိုက်ခိုက်မှုများ မြင့်တက်နေသည်။
ထို့ကြောင့် ဒေသခံများအနေဖြင့် ပြန်လည်ထိုးစစ်ဆင်မှုများ ပြုလုပ်လာမည်ကို စိုးရိမ်မှုများရှိနေကြသည်။
အသက် (၂၂)နှစ်အရွယ် ပေါက်တောဒေသခံတစ်ဦး ” အခုရက်ပိုင်း စစ်တွေဖက်ကနေ ပစ်ခတ်သံတွေကြားရတယ်။ ဘယ်ဖက်တွေကို လှမ်းပစ်နေတာလဲဆိုတာကိုတော့ ကျနော်တို့ အတိမကျမပြောနိုင်ဘူး။ ဒါပေမဲ့ လက်နက်ကြီးတွေ ပစ်သံကြားရတော့ စိုးရိမ်မှုကတော့ ရှိပါတယ်။” ဟု ၎င်းက ဆိုသည်။
အာရက္ခတပ်တော် AA ထိန်းချုပ်သိမ်းပိုက်ထားသည့် မြို့နယ်များအား စစ်ကောင်စီအနေဖြင့် ယခုကဲ့သို့ လက်နက်ကြီးများဖြင့် ပစ်ခတ်ခြင်း၊ လေကြောင်းမှနေ၍ မကြာခဏ ဗုံးကြဲတိုက်ခိုက်မှုများအား ပြုလုပ်နေခြင်းဖြစ်သည်။
