ဌာနဆိုင်ရာဝန်ထမ်းအားလုံး နှုတ်ထွက်ရန် သတိပေးထားသည့် KNU တပ်မဟာ ၅ နယ်မြေ၌ စစ်ကောင်စီ စခန်း ၁၁ ခုကို တစ်လအတွင်း ဖျက်ဆီးခဲ့

ဌာနဆိုင်ရာဝန်ထမ်းအားလုံး နှုတ်ထွက်ရန် သတိပေးထားသည့် KNU တပ်မဟာ ၅ နယ်မြေ၌ စစ်ကောင်စီ စခန်း ၁၁ ခုကို တစ်လအတွင်း ဖျက်ဆီးခဲ့
**********************************
ဇန်နဝါရီ ၅ ၊ ၂၀၂၃ ။

စစ်ကောင်စီဌာနဆိုင်ရာဝန်ထမ်းအားလုံး နှုတ်ထွက်ပြီး ထွက်ခွာသွားကြရန် သတိပေးကြေညာထားသည့် KNU တပ်မဟာ၅နယ်မြေတွင် ပြီးခဲ့သည့် ဒီဇင်ဘာလအတွင်းစစ်ကောင်စီစခန်း ၁၁ ခုကို ဖျက်ဆီးနိုင်ခဲ့သည်ဟု သိရသည်။

မူတြော်ခရိုင် KNU တပ်မဟာနယ်မြေအတွင်း၌ KNLA တပ်များနှင့် စစ်ကောင်စီ၊ BGF တပ်တို့ ပြီးခဲ့သော ဒီဇင်ဘာလတွင် တိုက်ပွဲပေါင်း ၁၇၃ ကြိမ်ဖြစ်ပွားခဲ့သည်ဟု တပ်မဟာ ၅ မူတြော်သတင်းစဥ်က ထုတ်ပြန်သည်။

အဆိုပါ တိုက်ပွဲများအတွင်း၌ စစ်ကောင်စီနှင့် BGF တပ်တို့မှ ၄၄ဦး သေဆုံး၍ ၄၆ ဦး ထိခိုက်ဒဏ်ရာရရှိခဲ့သည်။ ထို့ပြင် KNLAတပ်ဖွဲ့ဝင်များက စစ်ကောင်စီတပ်စခန်း ၁၁ ခုနှင့် ရိက္ခာတင်ကားတစ်စီးကို ဖျက်ဆီးနိုင်ခဲ့သည်။

ကရင်အမျိုးသားလွတ်မြောက်ရေးတပ်မတော် KNLA အမှတ် ၅ တပ်မဟာသည် မတရားအာဏာသိမ်းသည့် အကြမ်းဖက်စစ်ကောင်စီအဖွဲ့ကို ဆန့်ကျင်တော်လှန်နေသည့် ပြည်သူ့ကာကွယ်ရေးတပ်ဖွဲ့များ တိုင်ရင်းသားပြည်သူတစ်ရပ်လုံးနှင့် လက်တွဲပြီး စစ်ကောင်စီအဖွဲ့ အဆုံးသတ်ရေးကို လုပ်ဆောင်နေသည်ဟု တပ်မဟာ၅က ထုတ်ပြန် ဖော်ပြထားသည်။

စစ်အာဏာရှင်စနစ် အဆုံးသတ် ပပျောက်ရေး လုပ်ဆောင်နေသောကြောင့် မိမိတို့သတ်မှတ်ထိန်းချုပ်နယ်မြေအတွင်းရှိ စစ်ကောင်စီတပ်စခန်းများ ရုတ်သိမ်းရန် လုပ်ဆောင်နေသည်ဟု ဆိုသည်။

ထို့ကြောင့်စစ်ကောင်စီ၏ အုပ်ချုပ်မှု ယန္တရားတည်ရှိမှုကို လုံးဝလက်ခံမည်မဟုတ်ဘဲ KNLA အမှတ် ၅ တပ်မဟာ သက်မှတ်ထိန်းချုပ်နယ်မြေအတွင်းရှိ ဖာပွန်၊ ကမမောင်းမြို့တို့မှ ရပ်ကွက်၊ ကျေးရွာ အုပ်ချုပ်ရေးမှူးများနှင့် ဌာနဆိုင်ရာဝန်ထမ်းအားလုံး ဇန်နဝါရီလ ၁ ရက်မှ ၁၀ ရက်အတွင်း နှုတ်ထွက်၊ ထွက်ခွာကြရန် သတိပေးကြေညာထားသည်။

ထိုကဲ့သို့ KNU ဘက်မှ ဖိအားလုပ်ဆောင်နေသကဲ့သို့ စစ်ကောင်စီဘက်မှလည်း မတာမဟာနယ်မြေအတွင်း၌ စစ်ရေးလှုပ်ရှားမှုနှင့် လူ့အခွင့်အရေးချိုးဖောက်မှုများကို နေ့စဥ်လုပ်ဆောင်နေသည်ဟု မူတြော်သတင်းစဥ်က ဖော်ပြထားသည်။

ပြီးခဲ့သည့် ဒီဇင်ဘာလအတွင်း၌ စစ်ကောင်စီတပ်မှ ဒေသခံများသွားလာလုပ်ကိုင်နေသည့် နေရာများသို့ လက်နက်ကြီး ၁၀၂ လုံးတိတိပစ်ချခဲ့ပြီး ဒေသခံ ၂ဦး သေဆုံးကာ ၄ ဦးဒဏ်ရာရခဲ့သည်။

ထို့အပြင် စစ်ကောင်စီတပ်ဖွဲ့ဝင်များက ဒေသခံများ၏ ပစ္စည်းများကိုနှင့် ပိုက်ဆံများကို လုယူမှုများရှိနေရာ ထိုင်းဘတ်ငွေ ၅၀၀၀၀(ကျပ်သိန်း ၄၀) ပါသွားခဲ့သည်ဟု သိရသည်။

စစ်ကောင်စီတပ်သည် ပြီးခဲ့သည့်ဒီဇင်ဘာလတွင် တပ်မဟာနယ်မြေအတွင်း၌ တိုက်လေယာဥ်များဖြင့် ၄၇ ကြိမ် ဗုံးကြဲခဲ့သောကြောင့် ဒေသခံနေအိမ် ၃၃ လုံးပျက်စီးခဲ့ပြီး စပါးကြည် ၁၀လုံးနှင့် စပါးကြိတ်စက်တစ်လုံး ပျက်စီးခဲ့သည်။

ပြီးခဲ့သော နိုဝင်ဘာလတွင်လည်း မူတြော်ခရိုင် တပ်မဟာ ၅ အုပ်ချုပ်နယ်မြေအတွင်း၌ တိုက်ပွဲကြီး၊ တိုက်ပွဲငယ်ပေါင်း ၁၁၆ ကြိမ်အထိ ဖြစ်ပွားခဲ့ပြီး အာဏာသိမ်းစစ်ကောင်စီတပ်များဘက်မှ ၆၉ ဦးသေဆုံးပြီး ၅၁ ဦး ထိခိုက်ဒဏ်ရာ ရရှိခဲ့သည်ဟု ကေအဲန်ယူဗဟိုက သတင်းထုတ်ပြန်ထားသည်။

ကေအဲန်ယူဗဟိုက ပြီးခဲ့သော နိုဝင်ဘာလအတွက် သတင်းထုတ်ပြန်မှု၌ တပ်မဟာ ၁မှ တပ်မဟာ ၆ အထိ တပ်မ၆ ခုတို့၌ တိုက်ပွဲပေါင်း ၂၉၀ ကြိမ်ဖြစ်ပွားခဲ့ပြီး စစ်ကောင်စီနှင့် BGF တပ်ဖွဲ့ဝင် ၃၃၃ ဦးသေဆုံးကာ ၂၃၇ ဦး ထိခိုက်ဒဏ်ရာရရှိခဲ့သည်ဟု ဖော်ပြထားသည်။