ရွှံ့နစ်နေသောကားထဲမှ မြန်မာ၄၁ ဦး ဖမ်းဆီးခံရ

ယနေ့ ဇွန် ၂၃ ရက် နံနက်အစောပိုင်းတွင် ထိုင်းနိုင်ငံအတွင်းသို့ တရားမဝင် ဝင်ရောက်လာသည့် မြန်မာနိုင်ငံသား ၄၁ ဦးကို သယ်ဆောင်လာသော ကားတစ်စီးအား ထိုင်းရဲတပ်ဖွဲ့မှ ဖမ်းဆီးခဲ့သည်။ အဆိုပါကားသည် ထိုင်းရဲတပ်ဖွဲ့နဲ့ တွေ့ဆုံချိန် ထွက်ပြေးခဲ့ပြီးနောက် ရွှံ့ထူထပ်သော လမ်းတွင် နစ်နေခဲ့ရာမှ ဖမ်းဆီးခံခဲ့ရသည်။

ထိုင်း-မြန်မာနယ်စပ်မှ Thong Pha Phum ခရိုင်ကို ဖြတ်ပြီး အဝေးပြေးလမ်းမမှတစ်ဆင့် တရားမဝင်မြန်မာနိုင်ငံသားများကို မှောင်ခိုပို့ဆောင်ခဲ့ခြင်းဖြစ်သည်ဟု ထိုင်းသတင်းဌာနများတွင် ဖော်ပြထားသည်။

ရဲတပ်ဖွဲ့ဝင်များမှ စစ်ဆေးစဉ် ကား၏ နောက်ဘက် ကုန်တင်ခန်းထဲမှ အမျိုးသား ၃၃ ဦးနှင့် အမျိုးသမီး ရှစ်ဦးကို တွေ့ခဲ့ရပြီး ခရီးသွားစာရွက်စာတမ်းများမရှိခြင်းကြောင့် ထိုင်းရဲတပ်ဖွဲ့မှ ဖမ်းဆီးခဲ့သည်။

၎င်းတို့သည် ရန်ကုန်၊ မော်လမြိုင်၊ ကချင်နှင့် ပဲခူးတို့မှ ဖြစ်ပြီး ဘုရားသုံးဆူနယ်မြေဒေသတွင် စုဝေးခဲ့ကြကာ ပွဲစားမှ နယ်စပ်လမ်းကြောင်းအတိုင်း ထိုင်းနိုင်ငံသို့ ပို့ဆောင်ခဲ့ပြီး ဆန်ခလဘူရီခရိုင်ရှိ ထိုင်းနိုင်ငံသား အသက် ၄၀ အရွယ် ကားမောင်းသမားနှင့် လိုက်ပါလာခဲ့သည်ဟု သိရသည်။

၎င်းတို့ထဲမှ ရှစ်ဦးသည် ဘန်ကောက်တွင် အလုပ်လုပ်ကိုင်ရန် ပွဲစားများထံ ဘတ် ၁၅,၀၀၀ စီ ပေးချေခဲ့ရပြီး ကျန် ၃၃ ဦးသည် မလေးရှားနိုင်ငံသို့ သွားရောက်အလုပ်လုပ်ကိုင်ရန် ဘတ် ၅၅,၀၀၀ စီ ပေးချေခဲ့ရသည်ဟု ထိုင်းသတင်းဌာနများမှ ဖော်ပြထားသည်။

တရားမဝင် ဝင်ရောက်လာသော မြန်မာနိုင်ငံသား ၄၁ ဦးကို ဥပဒေအရ အရေးယူဆောင်ရွက်သွားမည်ဖြစ်ပြီး မြန်မာနိုင်ငံသို့ ပြန်လည်ပို့ဆောင်ရန် Thong Pha Phum ရဲစခန်းသို့ လွဲပြောင်းထားသည်ဟုလည်းသိရသည်။

ပုံစာ – ကန်ချနဘူရီခရိုင်တွင် ကုန်တင်ကားတစ်စီးထဲမှ ထိုင်းနိုင်ငံသို့ တရားမဝင် သွားရောက်ခဲ့သော မြန်မာနိုင်ငံသားများ (ဓာတ်ပုံ-Bangkok Post)

Ref; Bangkok Post