ယနေ့ ဇွန် ၁၉ ရက်တွင် ကျရောက်သည့် လူထုခေါင်းဆောင် ဒေါ်အောင်ဆန်းစုကြည်၏ အသက် ၈၀ နှစ်ပြည့် မွေးနေ့အား ထိုင်းနိုင်ငံ၊ မဲဆောက်မြို့တွင် ရောက်ရှိနေသည့် တော်လှန်ရေးအင်အားစုများမှ နေရာအသီးသီးတွင် ကျင်းပပြုလုပ်ခဲ့ကြသည်။
မဲဆောက်ဆေးရုံကြီးတွင် သွေးလှူဒါန်း
အာဏာသိမ်းခဲ့သည့် ၂၀၂၁ ခုနှစ်မှ စတင်၍ ဖမ်းဆီးခံထားရသည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ အသက် ၈၀ ပြည့် မွေးနေ့အထိမ်းအမှတ်အဖြစ် အဝေးရောက်ဧရာဝတီအသင်း (OIA)မှ ဦးဆောင်၍ မဲဆောက်ရောက် မြန်မာလူမျိုးများပူးပေါင်းကာ သွေးလှူဒါန်းခြင်းကို ယနေ့ မနက်ပိုင်းတွင် ပြုလုပ်ခဲ့သည်။
အဆိုပါ သွေးလှူဒါန်းပွဲအား မဲဆောက်ပြည်သူ့ဆေးရုံကြီးတွင် ပြုလုပ်ခဲ့ပြီး သွေးလှူသူ ၁၅၀ ဦးရှိခဲ့သည်။
၎င်းတို့အား အစာအာဟာရပြန်လည်ကျွေးမွေးခြင်းများလည်း ပြုလုပ်ခဲ့ပြီး ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများ လွတ်မြောက်ရေးနှင့် မွေးနေ့ဆုတောင်းခြင်းများကိုလည်း ပြုလုပ်ခဲ့ကြသည်။
နိုင်ငံရေးသမားများနှင့် တက်ကြွလှုပ်ရှားသူများ၏ ဆွမ်းကပ်ဆုတောင်းပွဲ
အကျဉ်းကျခံနေရသည့် ဒေါ်အောင်ဆန်းစုကြည်၏ အသက် ၈၀ ပြည့်မွေးနေ့ အထိမ်းအမှတ်အဖြစ် မဲဆောက်မြို့တွင် ရောက်ရှိနေသည့် နိုင်ငံရေးသမားများနှင့် တက်ကြွလှုပ်ရှားသူများမှ စုပေါင်း၍ တောရဘုန်းကြီးကျောင်းတွင် မွေးနေ့ဆွမ်းကပ်လှူဒါန်းခဲ့ပြီး အချုပ်အနှောင်မှ လွတ်မြောက်ရန် စုပေါင်းဆုတောင်းခြင်းတို့ လုပ်ဆောင်ခဲ့ကြသည်။
အဆိုပါ ဆွမ်းကပ်ပွဲနှင့် ဆုတောင်းပွဲအား မဲဆောက်ရောက် မြန်မာနိုင်ငံသား ၁၅၀ ခန့်တက်ရောက်ခဲ့ပြီး မဲဆောက်တွင် ဖွင့်လှစ်ထားသည့် မြန်မာလူမျိုးများ၏ စားသောက်ဆိုင်များတွင်လည်း မွေးနေ့အထိမ်းအမှတ်အဖြစ် စတုဒီယာများ ကျွေးမွေးခဲ့ကြသည်။
ယနေ့ မွေးနေ့ရှင် ဒေါ်အောင်ဆန်းစုကြည်အား အာဏာသိမ်းစစ်ကောင်စီမှ အမှုပေါင်းများစွာဖြင့် တရားစွဲ ဆိုထားပြီး လက်ရှိအချိန်အထိ ထောင်ဒဏ် ၃၃ နှစ် ချမှတ်ထားကာ တရားရင်ဆိုင်နေရဆဲ အမှုများလည်း ရှိနေသေးသည်။
ပုံစာ- ယနေ့ ဇွန်လ ၁၉ ရက် ဒေါ်အောင်ဆန်းစုကြည်မွေးနေ့ပွဲကို ထိုင်းနိုင်ငံ၊ မဲဆောက်မြို့တွင် ပြုလုပ်ခဲ့ကြသော မြင်ကွင်းများ (ဓာတ်ပုံ-သံလွင်ခက်)
