လက်နက်မမျှလို့ PDF ၈ ဦးကျ
****************
သံလွင်ခက်
ဇန်နဝါရီ ၄ ၊ ၂၀၂၃။
မကွေးတိုင်း၊ ဆိပ်ဖြူမြို့နယ်၊ ကျွန်းချောင်းကျေးရွာအနီး ကင်းပုန်းဝပ်နေသည့် စစ်ကောင်စီတပ်ဖွဲ့ဝင်များနှင့် အပြန်လှန်ပစ်ခတ်မှု ဖြစ်ပွားခဲ့ရာ လက်နက်မမျှခဲ့သည့်အတွက် ကာကွယ်ရေးတပ်ဖွဲ့ဝင် ၈ ဦး ကျဆုံးခဲ့သည်ဟု ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့မှ ပြောရေးဆိုခွင့်ရှိသူက သံလွင်ခက်ကို ပြောသည်။
ဇန်နဝါရီလ ၂ ရက်နေ့တွင် စစ်ဆင်ရေး လုပ်ဆောင်ရန် ထွက်ခွာလာသည့် ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့မှ တပ်ဖွဲ့ဝင်များနှင့် ကျွန်းချောင်းကျေးရွာအနီး ကင်းပုန်းဝပ်နေသည့် စစ်ကောင်စီတပ်ဖွဲ့ဝင်များ ထိတွေ့ တိုက်ပွဲဖြစ်ပွားခဲ့ခြင်း ဖြစ်သည်။
ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့မှ ပြောရေးဆိုခွင့်ရှိသူက ” ညနေ ၆ နာရီလောက်မှာ နယ်မြေစိုးမိုးရေး ရဲဘော်တွေ ဆိုင်ကယ်နဲ့ သွားရင်းနဲ့ အင်အား ၃၀ လောက်ရှိတဲ့ သူတို့ကင်းပုန်းနဲ့တွေ့တာဗျ၊ အဲ့မှာ ကြားညှပ်ပြီး အပစ်ခံခဲ့ရတာ ” ဟု ဆိုသည်။
ပစ်ခတ်ခံရမှုကြောင့် ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့မှ အသက် ၅၀ ကျော်အရွယ် ခေါင်းဆောင်တစ်ဦး အပါအဝင် အသက် ၂၀ ဝန်းကျင် ကာကွယ်ရေးတပ်ဖွဲ့ဝင် အမျိုးသား ၄ ဦးနှင့် အမျိုးသမီး ၄ ဦး စုစုပေါင်း ၈ ဦး ကျဆုံးခဲ့သည်။
ထိတွေ့တိုက်ပွဲတွင် ကာကွယ်ရေးတပ်ဖွဲ့ဝင်များထံတွင် တစ်ထောင့်ထိုး လက်လုပ် သေနတ်များသာရှိပြီး လက်နက် အင်အားမမျှခဲ့သည့်အတွက် ယခုကဲ့သို့ ရဲဘော် ၈ ဦး ကျဆုံးခဲ့ခြင်း ဖြစ်သည်ဟု ကာကွယ်ရေးတပ်ဖွဲ့ဝင်များက ပြောသည်။
ကျဆုံးခဲ့သည့် ကာကွယ်ရေးတပ်ဖွဲ့ ခေါင်းဆောင်တွင် ပစ္စတို ( အတိုတစ်လက် ) ပါရှိသော်လည်း ကာကွယ်ရေးတပ်ဖွဲ့ဝင်များကို ကာပစ်စဉ် ကျဆုံးခဲ့ခြင်းဖြစ်သည်ဟု ကာကွယ်ရေးတပ်ဖွဲ့ဝင်တစ်ဦးက ဆိုသည်။
၎င်းက ” ခေါင်းဆောင်မှာပဲ အတိုတစ်လက်ပါသွားတာ ဒါပေမယ့် ခေါင်းဆောင်က လွတ်တဲ့အနေထားမှာရှိတယ်။ ကိုယ့်ရဲဘော်တွေ မှန်နေတဲ့အနေအထားဆိုတော့ အတိုနဲ့ကာပစ်ရင်းနဲ့ ကျသွားတာဗျ။ မောင်းပြန်တစ်လက်နှစ်လက်လောက်ပါရင် သူတို့ ပစ်တဲ့ဟာကို လွတ်တဲ့သူက နည်းနည်းလေးကာပစ်ပေးတယ်ဆိုရင် ၈ ယောက်လုံးမကျနိုင်ဘူး ” ဟု ပြောသည်။
စစ်ကောင်စီတပ်ဖွဲ့ဝင်များက ဇန်နဝါရီ ၃ ရက် မနက်ပိုင်းတွင် ကျဆုံးခဲ့သည့် ရဲဘော် ၈ ဦးနှင့် ဆိုင်ကယ်များကို မီးရှို့ခဲ့သည်ဟု စုံစမ်း သိရှိရသည်။
ယင်းနောက် ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့နှင့် အခြားတော်လှန်ရေးတပ်ဖွဲ့များ ပူးပေါင်းကာ မီးရှို့ခံခဲ့ရသည့် ကာကွယ်ရေးတပ်ဖွဲ့ဝင်များ၏ ရုပ်အလောင်းများကို ပြန်လည်ယူဆောင်ခဲ့ပြီး နာရေးကိစ္စရပ်များ ဆောင်ရွက်ခဲ့ကြသည်ဟု ဆိုသည်။
အဆိုပါ ဖြစ်စဉ်အတွင်း ကာကွယ်ရေးတပ်ဖွဲ့ဝင် ၈ ဦး ကျဆုံးခဲ့သည့်အပြင် အခြားကာကွယ်ရေးတပ်ဖွဲ့ဝင် ၉ ဦး လည်း ထိခိုက်ဒဏ်ရာ ရရှိခဲ့သည်။
ထို့ပြင် ကာကွယ်ရေးတပ်ဖွဲ့ဝင် ၂ ဦး ဖမ်းဆီးခံခဲ့ရပြီး ၎င်းတို့ကို စစ်ကောင်စီတပ်ဖွဲ့ဝင်များက ဆိပ်ဖြူမြို့ပေါ်ရှိ စစ်ကြောရေးစခန်းသို့ ခေါ်ဆောင်သွားသည်ဟု ကာကွယ်ရေးတပ်ဖွဲ့ဝင်များထံမှ သိရသည်။
