ခင်သရဖီဦး
ရခိုင်ပြည်နယ်၊ ရသေ့တောင်မြို့နယ်မှ စစ်ဘေးရှောင်နေသည့် စစ်ရှောင်များအနေဖြင့် မိမိနေရပ်သို့ ပြန်နိုင်ရန် ပြီးခဲ့သည့် မေလမှစပြီး အာရက္ခတပ်တော် AA ထံ စာတင်ထားသော်လည်း လေကြောင်းအန္တရာယ် စိုးရိမ်ရသည့် အတွက် နေရပ်သို့ ပြန်ရန် ခွင့်ပြုချက်မရသေးဟု သိရသည်။
ရသေ့တောင်မြို့ပေါ်မှ စစ်ဘေးရှောင်များမှာ မေလ ပထမပတ်မှ စတင်ကာ မိမိနေရပ်သို့ ပြန်ရန် ပြင်ဆင်နေကြသော်လည်း လက်ရှိတွင် လေကြောင်းအန္တရာယ်ကြောင့် AA က ခွင့်မပြုသေးခြင်းဖြစ်သည်ဟု ရသေ့တောင်မှ အာရက္ခတပ်တော် AA နှင့် နီးစပ်သည့် အသက် ၃၅ နှစ်အရွယ် အမျိုးသားတစ်ဦးက ဆိုသည်။
၎င်းက “မြို့ထဲက နေအိမ်တွေကို သန့်ရှင်းရေး လုပ်ဖို့အတွက်တော့ ခွင့်ပြုပေးတာ ရှိပါတယ်။ တရားဝင်တော့ ပြန်လည် နေဖို့အတွက် ခွင့်မပြုထားပါဘူး။ အဓိကတော့ လေကြောင်းအန္တရာယ်ကြောင့်ပေါလေ။ ရသေ့တောင်ကတော့ စစ်တွေဘက်က လက်နက်ကြီးတွေနဲ့ လှမ်းထုလို့ ရတဲ့ အနေအထားဆိုတော့လေ” ဟု ပြောသည်။
ရသေ့တောင်မြို့ပေါ်ကို AA က ၂၀၂၄ မတ်လတွင် သိမ်းပိုက်နိုင်ခဲ့သော်လည်း ယင်းမြို့ပေါ်တွင် နေထိုင်သူ ၁၇၀၀၀ ခန့်မှာ ၎င်းတို့၏ နေအိမ်များသို့ ပြန်လည်နေထိုင်ခွင့် မရရှိသေးပေ။ ထို့ကြောင့် ရသေ့တောင်မြို့အနီးတဝိုက်က ကျေးရွာများတွင် ခိုလှုံနေထိုင်နေကြရဆဲ ဖြစ်သည်။
အဆိုပါစစ်ရှောင်များသည် လက်ရှိတွင် အလှူရှင်များ လာရောက် ကူညီထောက်ပံ့မှု လုံးဝ မရှိသည့်အတွက် စားနပ်ရိက္ခာ၊ မိုးရာသီအတွက် အမိုးအကာများ အရေးပေါ်လိုအပ်နေသည်ဟုလည်း သိရသည်။
ရခိုင်ပြည်နယ်အတွင်း အလုပ်အကိုင်ရှားပါးသည့်အပြင် ကုန်ဈေးနူန်းမြင့်တက်နေခြင်းကြောင့် စားဝတ်နေရေးအတွက်လည်း အဆင်မပြေမှုများရှိနေသည်ဟု ရသေ့တောင်မှ အသက် ၄၅ နှစ်အရွယ် စစ်ရှောင်အမျိုးသမီးတစ်ဦးက ဆိုသည်။
”အခုက ပိုက်ဆံကလည်း အရမ်းရှားတယ်။ အရင်ကတော့ ကိုယ့်မှာ ပါလာတဲ့ ပစ္စည်းတွေကို ထုခွဲရောင်းချပြီး စားသောက်နေရတာ။ စားသောက်ရတာကလည်း အရမ်းဈေးကြီးတယ်။ အခုက အစိုးရဘက်က ထောက်ပံ့ကြေးတွေလည်း မရဘူး။ အခု မိုးရာသီဆိုတော့ ပိုဆိုးတယ်။ စားရေးသောက်ရေးက တော်တော်လေး အဆင်မပြေဘူး” ဟု ၎င်းက ပြောသည်။
မေလအတွင်းကလည်း စစ်ကောင်စီ၏ လေကြောင်းပစ်ခတ်မှုကြောင့် ရသေ့တောင်မြို့နယ် ထွန်းရဝေကျေးရွာတွင် စစ်ဘေးရှောင်များနှင့် ဒေသခံများ ဗုံးကြဲခံရသည့်အတွက် အစုလိုက် သေဆုံး ထိခိုက်မှုများရှိခဲ့သည်။
ထို့ကြောင့် ဒေသခံအချို့မှာ မိမိနေရပ်သို့ ပြန်လည်နေထိုင်ရန် စိုးရိမ်မှုများရှိနေသည်ဟု ရသေ့တောင်မှ အသက် ၂၃ အရွယ် စစ်ရှောင် အမျိုးသားတစ်ဦးက ဆိုသည်။
၎င်းက ”ကျနော်တို့ကတော့ အဓိက လေကြောင်းကနေ ဗုံးကြဲတိုက်ခိုက်တာတွေကို ကြောက်တာပေါ့။ ထွန်းရဝေမှာလည်း ပြည်သူတွေ အစုံလိုက်အပြုံလိုက်သေသွားတာရှိတယ်။ ကျောက်တော်ဘက်တွေမှာလည်း မကြာခဏ လာပြီး ဗုံးကြဲတိုက်ခိုက်တယ်။ အခုက ကိုယ့်နေရပ်ကို ပြန်ပြီး နေထိုင်ဖို့အတွက်ကို တုံ့ဆိုင်းသွားတာပေါ့” ဟု ပြောသည်။
ထိုသို့ လေကြောင်းအန္တရာယ်နှင့် တိုက်ပွဲအတွင်း မြေမြုပ်မိုင်းများကြောင့် နေရပ်ပြန်မဝင်နိုင်သေးဘဲ ရသေ့တောင်မြို့အနီးတဝိုက်က ကျေးရွာများတွင် စစ်ရှောင်နေကြရဆဲ ဖြစ်သည်။
ပုံစာ- ရသေ့တောင်စစ်ရှောင်စခန်းတစ်ခုအားတွေ့ရစဉ်
ဓါတ်ပုံ- ပေးပို့
