စစ်ကိုင်းတိုင်း ပုလဲမြို့နယ်တွင် ယနေ့ (ဇွန် ၁၀ ရက်) နေ့လယ်ပိုင်းတွင် ပစ်ချခံရသည့် ဂျက်ဖိုက်တာသည် ရုတ်တရက် စက်ချို့ယွင်းမှုကြောင့် ပျက်ကျခဲ့ခြင်းသာဖြစ်သည်ဟု စစ်ကောင်စီက လေယာဉ်ပျက်ကျပြီးနောက် နာရီပိုင်းအကြာတွင် သတင်းအမှားများ ထုတ်ပြန်ခဲ့သည်။
အဆိုပါ တိုက်လေယာဉ်သည် ပုလဲမြို့နယ် မင်းတိုင်ပင်ကျေးရွာ၏ အရှေ့ဘက် မီတာ ၂၀၀၀ ခန့်အကွာ စပါးစေ့ကျေးရွာ အနီးသို့ရောက်ရှိချိန်တွင် စက်ချို့ယွင်း၍ ပျက်ကျခဲ့သည်ဟု စစ်ကောင်စီက ထုတ်ပြန်သည်။
ထို့အပြင် လေယာဉ်ပျက်ကျသည့် အနီးတဝိုက်သို့ စစ်ကောင်စီတပ်ဖွဲ့ဝင်များသွားရောက်၍ လုံခြုံရေးလုပ်ငန်းများ ဆောင်ရွက်လျက်ရှိပြီး လေယာဉ်ပျက်သည့်အကြောင်းအရင်းကို စစ်ဆေးလျက်ရှိသည်ဟုလည်း အဆိုပါ ထုတ်ပြန်ချက်တွင် ဖော်ပြထားသည်။
တော်လှန်ရေးတပ်ဖွဲ့ဝင်များမှ ပုလဲမြို့နယ်၊ ဇီးဖြူကုန်းကျေးရွာရှိ စစ်ကောင်စီ ပျူစောထီးတပ်စခန်းအား ယနေ့ (ဇွန်လ ၁၀ ရက်) မနက်ခင်းတွင် ဝင်ရောက်တိုက်ခိုက်ချိန် လေကြောင်းပစ်ကူပေးသော စစ်ကောင်စီ၏ တိုက်လေယာဉ်ကို ပွိုင့်ဖိုက်သေနတ်ဖြင့် ပစ်ချခဲ့ခြင်းဖြစ်သည်ဟု ရှေ့တန်းမြေပြင်ရဲဘော်တဦးကပြောသည်။
ထို့အပြင် စစ်ကောင်စီ၏ လေယာဉ်ကို ပြည်သူ့လွတ်မြောက်ရေးတပ်မတော် PLA မှ ယနေ့ နေ့လယ်ပိုင်း ၁၂း၁၅ မိနစ်တွင် ပစ်ချခဲ့သည်ဟု သံလွင်ခက်ကို အတည်ပြုပြောထားသည်။ ပျက်ကျခဲ့သည် လေယာဉ်အမျိုးအစားနှင့် အသေးစိတ်အချက်အလက်များကို သံလွင်ခက်မှ ဆက်လက်စုံစမ်းလျက်ရှိသည်။
၂၀၂၁ ခုနှစ် အာဏာသိမ်းပြီးချိန်မှစ၍ ဇွန်လ ၁၀ ရက်အထိ စစ်ကောင်စီ၏ လေယာဉ်များနှင့် ရဟတ်ယာဉ်များကို တိုင်းရင်းသားလက်နက်ကိုင်များနှင့် တော်လှန်ရေးတပ်ဖွဲ့ဝင်များမှ ၁၀ စီးအထိ ပစ်ချနိုင်ခဲ့ပြီး ဖြစ်သည်။ 
