ဇွန်လပထမဆုံးရက်မှာပဲ ယူကရိန်းက ပင့်ကူမျှင်စစ်ဆင်ရေး – Spider’s Web ဆင်နွှဲခဲ့ပြီး ရုရှားစစ်အခြေစိုက်စခန်း ၄ ခုက စစ်လေယာဥ် ၄၀ ကို တိုက်ခိုက်ဖျက်ဆီးနိုင်ခဲ့ပါတယ်။ ရုရှား – ယူကရိန်းစစ်ပွဲ စတင်ခဲ့တဲ့ ၄ နှစ်တာကာလအတွင်း အခုတိုက်ခိုက်မှုက အကြီးမားဆုံးသော တာဝေးပစ်တိုက်ခိုက်မှုလည်း ဖြစ်ခဲ့ပါတယ်။
ယူကရိန်းရဲ့ ပစ်မှတ်ထားတိုက်ခိုက်ခံခဲ့ရတဲ့ ရုရှားစစ် အခြေစိုက်စခန်းတွေက နယ်စပ်ကနေ မိုင်ထောင်ချီ ဝေးတဲ့ အာကွတ်ဒေသက ဘီလာယာစခန်း၊ အာတိတ်စက်ဝိုင်းအတွင်းမှာရှိတဲ့ မူမန်စ့်က အိုလန်ယာစခန်း၊ ယူကရိန်းနဲ့ မိုင် ၈၀၀ ဝန်းကျင်ဝေးတဲ့ အိုင်ဗန်နိုဗန်လေတပ်စခန်း၊ အိုင်ယာဇန်ပြည်နယ်က ဒိုင် ယာဂီလီဗိုလေတပ်စခန်းတို့ ဖြစ်ကြပါတယ်။
ဇွန်လ ၁ ရက် ညပိုင်းမှာ ပြောခဲ့တဲ့ ယူကရိန်းသမ္မတ ဇာလန်စကီးရဲ့ မိန့်ခွန်းမှာတော့ Spider’s Web စစ်ဆင်ရေးကို ၁ နှစ်ခွဲကျော်ကြာ စီစဥ်ခဲ့ရပြီး ဒရုန်းအစင်းပေါင်း ၁၁၇ စင်း အသုံးပြုခဲ့တယ်လို့ ထည့်သွင်းပြောခဲ့ပါတယ်။ ရုရှားကာကွယ်ရေးဝန်ကြီးဌာနကလည်း ရုရှားနိုင်ငံက ဒေသ ၅ ခုမှာရှိတဲ့ လေယာဥ်ကွင်းတွေကို ယူကရိန်းက ဒရုန်းနဲ့ ပစ်ခတ်တိုက်ခိုက်ခံခဲ့ရကြောင်း အတည်ပြုပြောဆိုထားပါတယ်။
ယူကရိန်းဒရုန်းတိုက်ခိုက်မှုတွေကို အိုင်ဗန်နိုဗို၊ ရိုင်ယာဇန်နဲ့ အာမူးဒေသတွေမှာ တားဆီးနိုင်ခဲ့ပေမယ့် မူမန့်စ်နဲ့ အာကွတ်စ်ဒေသတွေမှာတော့ လေယာဥ်တချို့ မီးလောင်ပျက်စီးခဲ့ပြီး တိုက်ခိုက်မှုမှာ ပါဝင်သူတွေကို ဖမ်းဆီးထားနိုင်ခဲ့တယ်လို့ ဆိုပါတယ်။
ယူကရိန်းလုံခြုံရေးဌာန – SUB ကလည်း ရုရှား အဓိကလေတပ်စခန်းတွေမှာရှိတဲ့ မဟာဗျူဟာမြောက် ခရုစ်ဒုံးကျည်သယ်ဆောင်တဲ့ လေယာဥ်စုစုပေါင်းရဲ့ ၃၄ ရာခိုင်နှုန်း ထိမှန်ခဲ့ပြီး ဒေါ်လာ ၇ ဘီလီယံ ထိခိုက်ဆုံးရှုံးစေခဲ့တယ်လို့ ဆိုထားပါတယ်။ တိုက်ခိုက်မှုအတွင်း တူပိုလက်ဖ်အမျိုးအစားမဟာဗျူဟာမြောက် Tu 95၊ Tu 22 M ဗုံးကြဲလေယာဥ်တွေ၊ A – 50 ထောက်လှမ်းရေးလေယာဥ် တစ်စင်းအပါအဝင် လေယာဥ်အစင်း ၄၀ ကျော် ထိခိုက် ပျက်စီးခဲ့တယ်လို့ သိရပါတယ်။
အခုတိုက်ခိုက်မှုက တူရကီနိုင်ငံ အစ္စတန်ဘူလ်မြို့မှာ ပြုလုပ်မယ့် ရုရှား – ယူကရိန်း နှစ်နိုင်ငံငြိမ်းချမ်းရေးဆွေးနွေးပွဲမတိုင်ခင် နာရီပိုင်းအလိုမှာပဲ ယူကရိန်းဘက်က တိုက်ခိုက်ခဲ့တာပါ။ ယူကရိန်းက ဒရုန်းတွေ သယ်ဆောင်လာတဲ့ ထရပ်ကားတွေကို တိုက်ခိုက်မှုပြုလုပ်မယ့် နေရာတွေအနီး ရပ်ထား၊ နေရာချပြီးတဲ့နောက် အမိုးတွေ ဖွင့်လိုက်ပြီး စစ်ဆင်ရေးဒရုန်းတွေက ပစ်မှတ်တွေရှိရာဆီ ပျံသန်းပြီး ဗုံးကြဲတိုက်ခိုက်ခဲ့တာလို့ သိရပါတယ်။
အခုတိုက်ခိုက်မှုကြောင့် ရုရှားဘက်က အကြီးအကျယ်ထိခိုက်ခဲ့ပြီး ရုရှား – ယူကရိန်း နှစ်နိုင်ငံငြိမ်းချမ်းရေးဆွေးနွေးပွဲ အထမြောက်လားဆိုတာကိုတော့ ဆက်ပြီးစောင့်ကြည့်သွားရပါမယ်။
