တက်ခရိုင် ဖုပ်ဖရအနီး တစ်ဖက်ခြမ်းတွင် စစ်ကောင်စီတပ်နှင့် ကရင်တပ်ဖွဲ့များကြား တိုက်ပွဲများ ပြန်လည်ဖြစ်ပွားလာခြင်းကြောင့် ထိုင်းမိဘများက ၎င်းတို့၏ကလေးများကို ယနေ့နံနက်တွင် နယ်စပ်အနီးရှိ ကျောင်းများသို့ မပို့ရန် ဆုံးဖြတ်ခဲ့သည်ဟု Khaosod English ထိုင်းသတင်းဌာနတွင် ဖော်ပြသည်။
ကရင်အမျိုးသားလွတ်မြောက်ရေးတပ်မတော် (KNLA) နှင့် ပူးပေါင်းတပ်ဖွဲ့ဝင်များသည် သေ့ဘောဘိုးစခန်းသို့ အင်အားဖြည့်တင်းလာသော စစ်ကောင်စီတပ်သား ၇၀ ကို ကြားဖြတ်တိုက်ခိုက်ရန်အတွက် ဗဟိုစစ်ဌာနချုပ် (၁၃) ရှိ စစ်တပ်ကို တိုက်ခိုက်ခဲ့သည်။
ထို့ကြောင့် လက်နက်ကြီးများဖြင့် ၁ နာရီကျော် ပြင်းထန် တိုက်ပွဲများ ဖြစ်ပွားခဲ့ပြီး လတ်တလောတွင် ရွာသား ၂၉၀ သည် ထိုင်းနိုင်ငံသို့ ဒုက္ခသည်များအဖြစ် ထွက်ပြေးတိမ်းရှောင်လာသည်ဟုလည်း ဖော်ပြထားသည်။
သေ့ဘောဘိုးစခန်းတွင် အင်အားမဖြည့်တင်းခင်အချိန်က စစ်ကောင်စီတပ်သားအင်အား ၁၀၀ နီးပါးရှိသည်ဟု အလင်းဝင်လာသူများထံမှ သိရသည်။ လက်ရှိတွင် စစ်ကောင်စီဘက်က ထပ်မံအင်အားများ ဖြည့်တင်းလာသောကြောင့် ယမန်နေ့နံနက်ကတည်းက အနီးတဝိုက်တွင် တိုက်ပွဲများ ပြင်းထန်နေခြင်း ဖြစ်သည်။
