မြဝတီ – ဝေါလေကားလမ်းမရှိ တပ်မ ၄၄ အခြေစိုက် စစ်ကောင်စီစခန်းရှိ စစ်တပ်နှင့် ပူးပေါင်းတပ်ဖွဲ့များအကြား တိုက်ပွဲပြင်းထန်နေသည်ဟု မြေပြင်သတင်းရင်းမြစ်ထံမှ သိရသည်။
ဘလက်ဒိုစခန်းကျပြီး ၅ ရက်မြောက်နေ့ ယမန်နေ့နံနက် ၁၀ နာရီကျော်တွင် ကရင်အမျိုးသားလွတ်မြောက်ရေးတပ်မတော် – KNLA ပူးပေါင်းတပ်နှင့် စစ်ကောင်စီတပ်များအကြား တိုက်ပွဲပြင်းထန်နေခြင်းဖြစ်သည်။
သေ့ဘောဘိုးဒေသခံတစ်ဦးက “လောလောဆယ် ဒေသခံတွေကတော့ ထိုင်းဘက်ကို ထွက်ပြေးထားတာတွေရှိတယ်။ တိုက်ပွဲက ရွာထဲမှာဆိုတော့ ရွာထဲမှာ နေလို့မရတော့ဘူး” ဟု ပြောသည်။
ပြီးခဲ့သည့် ရက်ပိုင်းတွင် စစ်ကောင်စီဘက်မှ ပူးပေါင်းတပ်ဖွဲ့များထံ သေနတ်နှင့်အတူ အလင်းဝင်လာမှုရှိသည့်အပြင် နှစ်ဖက်တပ်ဖွဲ့များအသီးသီး၌ အင်အားဖြည့်တင်းမှုများလည်းရှိသည်ဟု မြေပြင်သတင်းရင်းမြစ်တစ်ဦးထံမှ သိရသည်။
၎င်းက “ဘလက်ဒိုစခန်းသိမ်းပြီးတော့ ကြားထဲမှာ သူတို့ (စစ်တပ်) ဘက်က တစ်ရက်ကို တစ်ယောက်၊ နှစ်ယောက်နဲ့အလင်းဝင်လာတာလည်းရှိတယ်။ ပြောရမယ်ဆို ဒီကြားရက်ထဲမှာ အလင်းဝင်လာတာ ငါးယောက်လောက် ရှိမယ်။ သူတို့ထဲမှာ စက်လက်သေနတ်ယူလာတဲ့ လူလည်းရှိတယ်” ဟုဆိုသည်။
အဆိုပါသေ့ဘောဘိုးစခန်းတွင် အင်အားမဖြည့်တင်းခင်အချိန်က စစ်ကောင်စီတပ်သားအင်အား ၁၀၀ နီးပါးရှိသည်ဟု အလင်းဝင်လာသူများထံမှ သိရသည်။
ပုံစာ – ဘလက်ဒိုစခန်းသိမ်းတိုက်ပွဲအတွင်း မြင်တွေ့နေရသည့် ပူးပေါင်းတပ်ဖွဲ့တချို့။ (ဓာတ်ပုံ – ပေးပို့)
