ရခိုင်ပြည်နယ်၊ ရသေ့တောင်မြို့နယ်အား စစ်ကောင်စီက ယနေ့ နံနက် ၁၀ နာရီခန့်တွင် ဗုံးကြဲတိုက်ခိုက်ခဲ့သည့်အတွက် ကလေးငယ် နှစ်ဦးအပါအဝင် ဒေသခံ ၁၀ ဦးခန့် သေဆုံးခဲ့ရသည်ဟု ဒေသခံများထံမှ သိရသည်။
သေဆုံးခဲ့ရသည့် ကလေးငယ်များမှာ အသက် ၆ နှစ်နှင့် ၁၀ နှစ်ဝန်းကျင်ရှိပြီး အဆိုပါ ဗုံးကြဲတိုက်ခိုက်ခံရမှုကြောင့် ၃၀ ဦးခန့် ထိခိုက်ဒဏ်ရာရရှိထားသည်ဟုလည်း သိရသည်။
ရသေ့တောင်မြို့နယ်အတွင်းရှိ ထွန်းရဝေရွာအား ဂျက်ဖိုက်တာဖြင့် ဗုံး ၂ လုံးကြဲချခဲ့ခြင်းဖြစ်ကြောင်း ULA နှင့် နီးစပ်သည့် ရသေ့တောင်မြို့ခံ အသက် ၂၄ အရွယ် အမျိုးသားတစ်ဦးက အတည်ပြု ပြောသည်။
”အလောင်းကတော့ လက်ရှိမှာ ကိုးလောင်း ရထားပါတယ်။ ထပ်ပြီး သေဆုံးတာတွေ ရှိနိုင်ပါတယ်။ ရှာဖွေနေတုန်းပါ။ သေဆုံးထိခိုက်မှု အရေအတွက်ကိုတော့ အတိအကျတော့ အတည်မပြုနိုင်သေးပါဘူး” ဟု ၎င်းက ပြောသည်။
ယနေ့ ဗုံးကြဲခံရသည့် ထွန်းရဝေရွာတွင် အိမ်ခြေ ၂၀၀ ခန့်ရှိပြီး လက်ရှိတွင် အိမ်ခြေ ၂၀ ခန့် ပျက်စီးသွားသည်ဟုလည်း သိရသည်။
၎င်းအမျိုးသားက ဆက်ပြီး “နေအိမ်တွေက လုံးဝ ပြိုပျက်သွားပြီးတော့ တစ်စစီဖြစ်သွားတယ်။ လူတွေကလည်း ပါသွားတာပေါ့လေ။ ဆက်ပြီးတော့ ရှာဖွေနေကြတုန်းပါ။ ထိခိုက်ဒဏ်ရာ ရတဲ့လူတွေလည်း ထပ်တိုးလာနိုင်ပါတယ်” ဟု ဆိုသည်။
ထို့အပြင် ကျောက်ဖြူမြို့နယ် လိပ်ခမော်ကျေးရွာအားလည်း ယနေ့ နံနက် ၄ နာရီခန့်က ဒရုန်းဖြင့် ဗုံးကြဲတိုက်ခိုက်ခဲ့သည့်အတွက် ဘုန်းတော်ကြီးကျောင်း တစ်ဆောင် လုံးဝ မီးလောင်ပျက်စီးသွားသည်ဟုလည်း သိရသည်။
ငလျင်အရေးပေါ် ကယ်ဆယ်ရေးလုပ်ငန်းများ လုပ်ဆောင်ရန် အကြောင်းပြချက်ဖြင့် စစ်ကောင်စီသည် အပစ်ခတ်ရပ်စဲရေး သက်တမ်းအား မေလ ၆ ရက်မှ ၃၁ ရက်အထိ ထပ်မံသက်တမ်းတိုးထားသည်ဟု ထုတ်ပြန်ထားသော်လည်း စစ်ပွဲ ဖြစ်ပွားခြင်းမရှိဘဲ အပြစ်မဲ့ပြည်သူများအား ဆက်တိုက်ဗုံးကြဲတိုက်ခိုက်နေသည်။
မေလ ၁၂ ရက် တစ်ရက်တည်းတွင် စစ်ကိုင်းတိုင်းအတွင်းမှ သုံးနေရာနှင့် ရှမ်းပြည်နယ် မြောက်ပိုင်းတွင် နှစ်နေရာအား ဗုံးကြဲတိုက်ခိုက်ခဲ့ခြင်းကြောင့် ကျောင်းနေအရွယ် ကလေးများ အပါအဝင် အပြစ်မဲ့ပြည်သူ ၂၆ ဦးခန့်သေဆုံးခဲ့ရသည်။
