အာဏာသိမ်းစစ်ကောင်စီတပ်အား ကူညီထောက်ပံ့ပေးနေသည့် အာဆီယံနိုင်ငံရှိ သူဌေးများအား အရေးယူခြင်းနှင့် ပိတ်ဆို့မှုများလုပ်ဆောင်ရန် Justice For Myanmar က ထုတ်ပြန် တောင်းဆိုလိုက်သည်။
စစ်ကောင်စီတပ်အား ကူညီပေးနေသည့် အသက် ၃၀ အထက် အာဆီယံသူဌေး ၁၂ ဦးက စစ်လက်နက်၊ စစ်အသုံးအဆောင်ပစ္စည်း၊ နည်းပညာ၊ လေယာဉ်ဆီနှင့် ဘဏ္ဍာငွေများအား ရောင်းချပေးနေသည်ဟု Justice For Myanmar ၏ ထုတ်ပြန်ချက်တွင် ဖော်ပြထားသည်။
အဆိုပါ ၁၂ ဦးတွင် ထိုင်းနိုင်ငံ၊ မလေးရှား၊ စင်္ကာပူ၊ ဗီယက်နမ်၊ မြန်မာနှင့် ဖိလစ်ပိုင် နိုင်ငံတို့မှ အချမ်းသာဆုံးပုဂ္ဂိုလ်များ ပါဝင် နေသည်ဟု သိရသည်။
Justice For Myanmar ၏ ပြောရေးဆိုခွင်ရှိသူ မရတနာမောင်က “လေးနှစ်အတွင်း အာဆီယံက မြန်မာပြည်သူတွေအတွက် တာဝန်ပျက်ကွက်ခဲ့ပါတယ်။ သူတို့ ဘုံသဘောထား ငါးရပ်က အရေးယူမှုမရှိ၊ ပျက်ကွက်မှုတွေအတွက် ဆင်သားရေကို ဆိတ်သားရေနဲ့ ဖုံးတာသာဖြစ်ပြီး တစ်ဖက်မှာ အစိုးရအဖွဲ့ဝင် လူချမ်းသာ တစ်စုက စစ်ရာဇဝတ်ကောင်တွေ လက်ထဲကို စစ်လက်နက်နဲ့ စစ်သုံးပစ္စည်းတွေ ဆက်ပြီး စီးဆင်းနေစေတာပါ။ ဒီဘီလျံနာသူဌေးကြီးတွေက ကမ္ဘာ့ခေါင်းဆောင်တွေနဲ့ အကျွမ်းတဝင်ရှိကြပြီး အဖိုးတန် စီမံကိန်းကြီးတွေမှာ ရင်းနှီးမြှုပ်နှံကြပါတယ်။ စစ်အုပ်စု လေကြောင်းတိုက်ခိုက်မှုတိုင်းရဲ့ နောက်ကွယ်မှာ စီးပွားရေးဆက်နွယ်မှု တစ်ခု အမြဲ ရှိနေပြီး အဲဒီစီးပွားရေးအီလစ်တွေအနေနဲ့ မဖြစ်မနေတာဝန်ခံရမှာ ဖြစ်ပါတယ်” ဟု ပြောသည်။
အာဆီယံအနေဖြင့် စစ်ကောင်စီအား မှားယွင်းသည့် နိုင်ငံရေးတရားဝင်မှုပေးခြင်း၊ စစ်ဘက်ဆိုင်ရာ လေ့ကျင့်သင်ကြားပေးခြင်းနှင့် လောင်စာဆီများ ဖြည့်တင်းပေးခြင်းဖြင့် စစ်ကောင်စီနှင့်အတူ စစ်ရာဇဝတ်မှုနှင့် လူသားမျိုးနွယ်အပေါ် ကြံရာပါအဖြစ် ကျူးလွန်နေကြောင်း အဆိုပါ ထုတ်ပြန်ချက်တွင် ဖော်ပြထားသည်။
စစ်ကောင်စီတပ်အနေဖြင့် မတ်လ ၂၈ ရက်တွင် ဖြစ်ပွားခဲ့သည့် ငလျင်ကြီးပြီးနောက်ပိုင်း လေကြောင်းတိုက်ခိုက်မှုပေါင်း ၅၀၀ ကျော်လုပ်ဆောင်ခဲ့သည်ဟု Justice For Myanmar ၏ ထုတ်ပြန်ချက်အရသိရသည်။
ပုံစာ – ကရင်နီပြည်နယ်တွင်း စစ်ကောင်စီလေကြောင်းဗုံးကြဲတိုက်ခိုက်ခံခဲ့ရသည့် မြင်ကွင်း (သံလွင်ခက်)
