၂၈ နှစ်နီးပါးခန့် လက်လွှတ်ခဲ့ရသည့် ထိုင်း-မြန်မာနယ်စပ် တနင်္သာရီတိုင်း၊ ထားဝယ်မြို့နယ် တပ်မဟာ (၄) ရှိ ထီးခီးစခန်းအပါအဝင် တပ်မဟာ(၃) နှင့် တပ်မဟာ(၇) က စစ်ကောင်စီ စခန်း သုံးခုကို ကရင်အမျိုးသားအစည်းအရုံး KNU/KNLA ပူးပေါင်းတပ်များက အပြီးသတ် သိမ်းလိုက်နိုင်သည်ဟု KNU က မေ ၉ ရက်တွင် ထုတ်ပြန်ထားသည်။ဘိတ်-ထားဝယ်ခရိုင်၊ ထီးခီးနယ်စပ်ရှိ စစ်ကောင်စီ၏ ခြေလျင်တပ်ရင်း ခလရ-၂၅ နှင့် ခလရ-၂၆၇ တို့ တပ်စွဲထားသည့် ထီးခီးစခန်းကို သိမ်းပိုက်လိုက်ပြီး ဖြစ်သည်ဟုလည်း ခရိုင်ရှိ သတင်းရင်းမြစ်များက အတည်ပြုပြောသည်။
“မနေ့က စခန်းသိမ်းရတာ။ ဒီနေ့မှာ လိုက်ပြီး ရှင်းလင်းရေး လုပ်နေတယ်။ ရန်သူဘက်က လေယာဥ်နဲ့ ဗုံးကြဲတာတွေ ရှိတယ်။ အခုတော့ အပြီးပိုင် သိမ်းပြီးပြီလို့ ပြောရမှာပေါ့” ဟု မြေပြင်ရဲဘော်တစ်ဦးက ပြောသည်။
ထီးခီးစခန်းအား ၁၉၇၅ ခုနှစ်တွင် စတင်တည်ဆောက်ခဲ့ပြီး ခရိုင်ဌာနချုပ်နှင့် တပ်မဟာ ဌာနချုပ်ရုံးတွင် တာဝန်ထမ်းဆောင်သည့် ရုံးအဖွဲ့ဝင်များနှင့် မိသားစုဝင်များ နေထိုင်ခဲ့သည်ဟု KNU ထုတ်ပြန်ချက်တွင် ဖော်ပြထားသည်။
၁၉၉၇ ခုနှစ်တွင် မြန်မာစစ်တပ် တပ်မ (၅၅) နှင့် တပ်မ (၆၆) တို့ ဦးဆောင်သည့် တပ်ရင်း ၂၀ ခန့်က ထီးခီးဒေသအား ထိုးစစ်ဆင်တိုက်ခိုက်ခဲ့ခြင်းကြောင့် လက်လွှတ်ဆုံးရှုံးခဲ့ရသည်ဟု KNU ၏ ထုတ်ပြန်ချက်တွင် ဖော်ပြထားသည်။
ယင်းသို့ ဆယ်စုနှစ် သုံးစုနီးပါးကြာ လက်လွှတ်ဆုံးရှုံးခဲ့ရသည့် ထီးခီးစခန်းအား KNLA နှင့်အတူ မဟာမိတ်ပူးပေါင်းတပ် Force for Federal Democracy-FFD တို့မှ ယနေ့ နံနက်တွင် အပြီးသတ် သိမ်းပိုက်ခဲ့သည်ဟုသိရသည်။
ထို့အပြင် တပ်မဟာ(၇) ကေအဲန်ယူ-ကရင်အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ ဖားအံခရိုင်၊ ပိုင်ကျုံမြို့နယ်တွင်ရှိသည့် စစ်ကောင်စီတပ်စခန်း လေးပနာဒီ (ခေါ်) တခေါ်ဘီခွီး စခန်းအား မေလ ၉ ရက် နံနက် ၉ နာရီခန့်တွင် အပြီး တိုက်ခိုက်သိမ်းပိုက်နိုင်ခဲ့သည်ဟုလည်း KNU ၏ ထုတ်ပြန်ချက်အရ သိရသည်။
တခေါ်ဘီခွီးစခန်းသည် စစ်ကောင်စီတပ်၏ ခြေလျင်တပ်ရင်း ခလရ-၂၄ စခန်းဖြစ်ပြီး ကရင် အမျိုးသားလွတ်မြောက်ရေးတပ် မတော်-KNLA နှင့် ကရင်အမျိုးသားကာကွယ်ရေးတပ်ဖွဲ့-KNDO တို့မှ တိုက်ခိုက်ခဲ့ခြင်းဖြစ်သည်။
ထီးခီးစခန်းသည် အမှတ် ၂၅ ခြေလျင်တပ်ရင်း (ခလရ) က တပ်ရင်းမှူး ကိုယ်တိုင် အထိုင်ချထားသည့် စခန်းဖြစ်ပြီး စစ်ကောင်စီ အင်အား ၁၅၀ ခန့်ရှိကာ တိုက်ပွဲအတွင်း စစ်ကောင်စီတပ်ဘက်မှ ရဟတ်ယာဉ် ၄ စင်းဖြင့် ပစ်ကူခဲ့သည်ဟု သိရသည်။
ထို့အပြင် တပ်မဟာ(၃) ခလယ်လွီထူး (ညောင်လေးပင်) ခရိုင်၊ ဆောထိ (ရွှေကျင်) မြို့နယ်အတွင်းရှိ စစ်ကောင်စီ၏ ခြေမြန်တပ်ရင်း ခမရ- ၅၉၈ အခြေစိုက်စခန်းကိုလည်း ကရင် အမျိုးသားလွတ်မြောက်ရေးတပ်မတော်-KNLA ၊ ကရင်အမျိုးသားကာကွယ်ရေးတပ်ဖွဲ့-KNDO နှင့် ပူးပေါင်းအဖွဲ့များမှ အပြီးသိမ်း သိမ်းပိုက်နိုင်ခဲ့သည်ဟု သိရသည်။
အဆိုပါ တိုက်ပွဲများကြောင့် ထိုင်းနယ်စပ် တာ့ခ်ခရိုင်ထဲသို့ ထွက်ပြေးတိမ်းရှောင်လာသည့် စစ်ရှောင် ၃၄၈ ဦးရှိပြီး ယာယီခိုလှုံစရာ နေရာ နှစ်ခုတွင် ခေတ္တနေထိုင်ခွင့်ပေးထားသည်ဟု ထိုင်းသတင်းဌာနများတွင် ဖော်ပြထားသည်။
