အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနသည် ပြည်သူ့ကာကွယ်ရေးတပ်မတော် (PDF) တပ်ရင်း၊ တပ်ဖွဲ့များကို ထောက်ပံ့စရိတ်အဖြစ် ခန့်မှန်းခြေ အမေရိကန်ဒေါ်လာ ၂၄.၉ သန်း ပေးပို့ခဲ့ပြီးဖြစ်သည်ဟု မေလ ၇ ရက်တွင် ထုတ်ပြန်ခဲ့သည်။
အဆိုပါ ထောက်ပံ့စရိတ် အမေရိကန်ဒေါ်လာ ၂၄.၉ သန်းထဲမှ ၂၂.၅ သန်းကို ပြည်သူ့တော်လှန်ရေးထောက်ပို့တပ် (PRF) မှ သုံးနှစ်နီးပါး ကောက်ခံရရှိခဲ့ခြင်းဖြစ်သည်ဟု သိရသည်။
ယင်းထောက်ပံ့စရိတ်များကို NUG ကာကွယ်ရေးဝန်ကြီးဌာနလက်အောက်ရှိ PDF တပ်ရင်း၊ တပ်ဖွဲ့ပေါင်း သုံးရာကျော်ကို ၂၇ ကြိမ်တိတိ ထောက်ပံ့ပေးခဲ့ခြင်းဖြစ်သည်ဟု NUG ထုတ်ပြန်ချက်တွင် ဖော်ပြထားသည်။
NUG ၏ ဘဏ္ဍငွေ ၉၄ ရာခိုင်နှုန်းကိုလည်း စစ်ရေးကဏ္ဍတွင်အသုံးပြုခဲ့သည်ဟု ပြီးခဲ့သည့် မေလ ၂ ရက်က ထုတ်ပြန်ထားသည်။
မြန်မာ့မဟာဗျူဟာနှင့် မူဝါဒလေ့လာရေးအင်စတီကျု (ISP Myanmar) ၏ အချက်အလက်များအရ NUG တွင် ၂၀၂၂ ခုနှစ် ဒီဇင်ဘာလအထိ တပ်ရင်း ၃၀၀ အထိ ဖွဲ့စည်းထားပြီး ပြည်သူ့ကာကွယ်ရေးတပ်ဖွဲ့ (ပကဖ) ၂၅၀ အထိ ဖွဲ့စည်းထားသည်ဟု သိရသည်။
