အမီးလေး
အိန္ဒိယနိုင်ငံ၊ မဏိပူရပြည်နယ်၊ အင်ဖာမြို့ရှိ အင်ဖာအကျဉ်းထောင်မှာ အကျဉ်းကျခံနေရတဲ့ အမျိုးသမီးနှင့် ကလေးငယ် စုစုပေါင်း ၂၇ ဦးအား မတ်လ ၂၂ ရက်နေ့တွင် စစ်ကောင်စီထံသို့ လွှဲပြောင်းပေးခဲ့ကြောင်း India For Myanmar တည်ထောင်သူ ကိုဆလိုင်းဒိုခါရ်က ပြောသည်။
“မြန်မာနိုင်ငံဘက်ကို လွှဲခံရတဲ့သူတွေက ကလေး ၇ ဦးထဲမှာ ယောက်ျားလေး ပါမပါတော့မသိ သေးဘူး။ ကျွန်တော်တို့ စုံစမ်းနေဆဲဖြစ်တယ်၊ မြန်မာနိုင်ငံပြန်ဖို့အတွက် လုံခြုံရေး အခက်အခဲမရှိတဲ့ အုပ်စုတွေ ပေါ့နော်။ စကစလက်ထဲကို အိန္ဒိယအစိုးက လွှဲပေးတဲ့သဘောလို့ သိထားရတယ်” ဟုဆိုသည်။
ထိုအကျဉ်းသားများသည် အာဏာသိမ်းမှု ၂၀၂၁ ခုနှစ် မတိုင်ခင် အိန္ဒိယနိုင်ငံအတွင်း ဖမ်းဆီးခံထားရသူများဖြစ် ပြီး အိန္ဒိယအစိုးရအနေဖြင့် မြန်မာနိုင်ငံသားအကျဉ်းသားများအား သုံးကြိမ်တိုင် လွှဲပေးခဲ့ပြီး ဖြစ်သည်။
ယခု တတိယအကြိမ်တွင် အိန္ဒိယအစိုးရအနေဖြင့် အမျိုးသမီး ၂၀ ဦးနှင့် ကလေးငယ် ၇ ဦး တို့အား စစ်ကောင်စီထံ လွှဲပြောင်း ပေးခဲ့ခြင်း ဖြစ်ကြောင်း သိရသည်။
ထိုသို့ လွှဲပြောင်းပေးခံရသူများအား စစ်ကောင်စီတပ်အနေဖြင့် စစ်မှုထမ်းအဖြစ် ခေါ်ယူအသုံးပြုမည်ကို စိုးရိမ်နေသည်ဟု ကိုဆလိုင်းဒိုခါရ်က ဆက်ပြောသည်။
“ပထမ နှစ်ကြိမ်ထိတော့ စစ်မှုထမ်းအဖြစ်ခေါ်သွားတာမျိုးတော့ မရှိဘူး၊ ဒါပေမယ့် ဒီတခါကလည်း မိန်းကလေးတွေဆိုတော့ စစ်မှုထမ်းဥပဒေဖြင့် ဖမ်းတာတို့မလုပ်ဖို့ မျှော်လင့်တယ်၊ ကျတော်တို့ကလည်း ဒီလိုဟာမျိုးဖြစ်မှာ စိုးရိမ်တာကြောင့် အိန္ဒိယအစိုးရကိုတော့ မှန်ကန်မှုပေးဖို့ တောင်းဆိုထားတာရှိပါတယ်” ဟုဆိုသည်။
အိန္ဒိယအစိုးရအနေဖြင့် စစ်ကောင်စီအား အကျဉ်းသားလွဲပြောင်းပေးမှု ပထမအကြိမ်တွင် ၂၇ ဦး၊ ဒုတိယတွင် အမျိုးသား ၃၀ ကျော်နှင့် ယခု တတိယအကြိမ်တွင် ၂၇ ဦးအားလွဲပေးခဲ့ပြီး ယခုအချိန်ထိ အင်ဖာအကျဉ်းထောင်တွင် ထိန်းသိမ်းခံထားရသူ မြန်မာနိုင်ငံသား ၁၄၇ ဦး ရှိနေသေးသည်။
ပုံစာ – အင်ဖာအကျဉ်းထောင်မှ ၂၀၂၄ ခုနှစ်၊ ဇွန်လတွင် အိန္ဒိယအစိုးရအနေဖြင့် စစ်ကောင်စီထံသို့ လွဲပြောင်းပေးစဉ်
