မကွေးတိုင်း၊ ရေစကြိုမြို့ပေါ်မှ စတင်လာသည့် စစ်ကောင်စီ စစ်ကြောင်းသည် ၎င်းတို့ လမ်းကြောင်း တလျှောက် ရှိ ကျေးရွာနေဒေသခံပြည်သူ ၁၈ ဦးထက်မနည်းကို သတ်ဖြတ်ခဲ့ပြီး နေအိမ်အများအပြားကိုလည်း မီးရှို့ဖျက်ဆီး ပစ်ခဲ့သည်ဟု ဒေသခံသတင်းအရင်းအမြစ်များထံမှ သိရသည်။
အဆိုပါစစ်ကြောင်းသည် ပခုက္ကူအခြေစိုက်တပ်မ (၁၀၁)နှင့် ရေစကြိုမြို့တွင်အခြေစိုက်သည့် ခလရ (၂၅၆)၊ (၂၅၇)နှင့် (၂၅၈) တပ်ရင်းများ စုပေါင်း၍ ရေစကြိုမြို့ပေါ်မှ ချင်းတွင်းမြစ်အရှေ့ဘက်ခြမ်း ရေလယ်ကျွန်းဒေသရှိ ကျေးရွာများဆီသို့ ပြီးခဲ့သည့် ဖေဖော်ဝါရီလ ၂၆ ရက်နေ့မှ စတင်၍ စစ်ကြောင်းထိုးလာခဲ့ခြင်းဖြစ်သည်။
ရေလယ်ကျွန်းသတင်းအဖွဲ့မှ ကိုဖြိုးကြီးက” သတ်တာဖြတ်တာနဲ့ မီးရှို့တာကတော့ ပြောမနေတော့နဲ့ လူမဆန်တဲ့ လုပ်ရပ်ကတော့ တော်တော်ကြီးကို အဆိုးဝါးဆုံးစစ်ကြောင်းဖြစ်နေတာ။ မီးရှို့တာတွေကလည်း ရွာလုံးကျွတ် တွေကုန်သွားတာ။” ဟု ပြောသည်။
ထိုသို့ ဒေသတွင်းတွင်တိုက်ပွဲဖြစ်ပွဲခြင်းမရှိဘဲ လူနေကျေးရွာများသို့ စစ်ကောင်စီမှ စစ်ကြောင်းထိုးကာ မီးရှို့ နေခြင်းဖြစ်သည်ဟု အထက်ပါအမျိုးသားက ဆက်ပြောသည်။
အဆိုပါ စစ်ကောင်စီစစ်ကြောင်းသည် မတ်လ ၂ ရက်နေ့မှ ၄ ရက်အထိ ချင်းတွင်းမြစ်အရှေ့ဘက်ခြမ်း ရေလယ် ကျွန်းဒေသရှိ မြေစွန်းတော်ရွာသို့ လက်နက်ကြီးလက်နက်ငယ်များဖြင့် ပစ်ခတ်ကာ ဝင်ရောက်ခဲ့သည်။
ထိုနောက် ကျေးရွာအတွင်းမှ ထွက်ပြေးရန် ခက်ခဲသည့် အသက်ကြီးရွယ်အို ၁၁ ဦးအား သတ်ဖြတ်ခဲ့ပြီး ဒေသခံ ပြည်သူနေအိမ် ၂၆၆ လုံးကို မီးရှို့ဖျက်ဆီးပစ်ခဲ့သည်။
ယင်းအပြင် မတ်လ ၅ ရက်နေ့မှ ယနေ့မတ်လ ၁၈ ရက်နေ့အတွင်း မာလကာခြံရွာ၊ မြေတော်ရွာ၊ ရွာသစ်ရွာ၊ ဇရပ်နီရွာနှင့် သာဂေါင်း(ရာမ)ကျေးရွာများကို မီးရှို့ဖျက်ဆီးခဲ့ပြီး ဒေသခံပြည်သူ ၇ ဦးထက်မနည်းကို စစ်ကောင်စီ စစ်ကြောင်းမှ ဖမ်းဆီးသတ်ဖြတ်ခဲ့သည်။
အဆိုပါစစ်ကောင်စီစစ်ကြောင်းသည် မတ်လ ၁၇ ရက်နေ့တွင် ဘိစပ်ကုန်းကျေးရွာအတွင်းသို့ဝင်ရောက်ကာ ဒေသခံပြည်သူများ နေအိမ်ပိုင်ပစ္စည်းများကို ဖျက်ဆီးနေပြီး ယနေ့မနက်ခင်းပိုင်းတွင် ကျေးရွာရှိ လူနေအိမ်များ ကိုလည်း မီးရှို့ဖျက်ဆီးလျက်ရှိသည်ဟု ရေလယ်ကျွန်းသတင်းအဖွဲ့မှ တာဝန်ရှိသူ အမျိုးသားတစ်ဦးက ပြောသည်။
“ဝိုက်ဖမ်းနေလို့ ကျွန်းပေါ်က လူတွေမိသွားတယ် အတိအကျတော့မသိရသေးဘူးဗျ ၊ မိတာကတော့များတယ် ” ဟု စစ်ရှောင်အမျိုးသားတဦးက ပြောသည်။
ယနေ့ မတ်လ ၁၈ ရက်နေ့တွင် စစ်ကောင်စီကြောင်းမှ တပ်စွဲထားသည့် ဘိစပ်ကုန်းကျေးရွာမှ ဒေသခံ များသည် ကျေးရွာအတွင်းသို့ ပြန်လည်ဝင်ရောက်ချိန်တွင် ဖမ်းဆီးခံရခြင်းဖြစ်သည်ဟု ကနဦးသိရသည်။
ရေလယ်ကျွန်းသတင်းအဖွဲ့မှ တာဝန်ရှိသူ၏ ပြောပြချက်အရ အမျိုးသမီးနှစ်ဦး ဖမ်းဆီးခံထားရသည် ဟုလည်း သိရသည်။
အဆိုပါစစ်ကြောင်းထိုးဝင်ရောက်လာမှုကြောင့် ရေစကြိုမြို့နယ်အပြင် စစ်ကိုင်းတိုင်း မြောင်မြို့နယ်ရှိ ဆူးလေး ကုန်း၊ ပန်းညို၊ မြစ်ဆုံ၊ ငါးရံ့အိုး၊ နနွင်းကိုင်း၊ မြစ်သာ၊ ဆင်လှောင်နှင့် မင်းလှကျေးရွာများရှိ ဒေသခံပြည်သူ ၂၀,၀၀၀ ထက်မနည်း ဖေဖော်ဝါရီလ ၂၆ ရက်နေ့မှစတင်၍ စစ်ရှောင်နေရသည်ဟု သိရသည်။
ပုံစာ – ဇရပ်နီကျေးရွာနှင့် မြေတော်ကျေးရွာရှိ ဒေသခံပြည်သူများ၏ နေအိမ်များကို စစ်ကောင်စီစစ်ကြောင်းမှ မီးရှို့ဖျက်ဆီးထားသည်ကို မြင်တွေ့ရပုံ (ဓာတ်ပုံ – Yesagyo Township Info Committee)
