ဖားအံခရိုင်၊ ပိုင်ကျုံမြို့နယ်အတွင်းရှိ စစ်ကောင်စီတပ်စခန်းဖြစ်သော ပူးလူးတူအခြေစိုက် ခြေကုပ်စခန်းအား ကေအဲန်ယူ- ကရင်အမျိုးသားသားလွတ်မြောက်ရေးတပ်မတော်(KNLA)ဦးဆောင်သော ပူးပေါင်းတပ်ဖွဲ့ဝင်များက မတ်လ ၁၄ ရက်တွင် အပြီးသတ်သိမ်းပိုက်ရရှိထားသော အချက်အလက်များနှင့် မြင်ကွင်းဓါတ်ပုံများကို ယနေ့တွင် သတင်းထုတ်ပြန်ခဲ့သည်။
အဆိုပါ ကရင်အမျိုးသားအစည်းအရုံး(KNU)ဗဟို၏ ထုတ်ပြန်ချက်တွင် KNLA တပ်မဟာ ၇၊ တပ်ရင်း ၂၂ က ဦးဆောင်ပြီး ကရင်အမျိုးသားကာကွယ်ရေးတပ်ဖွဲ့(KNDO)နှင့် တော်လှန်ရေးပူးပေါင်းတပ်ဖွဲ့များက ခလရ ၃၁ ပွိုင့် ၁၂၄၈ ခြေကုပ်စခန်းအား အပြီးသတ်သိမ်းပိုက်ခဲ့သည်ဟု ဖော်ပြထားသည်။
စခန်းသိမ်းတိုက်ပွဲတွင် စစ်ကောင်စီတပ်သား ၁၂ ဦးသေဆုံးပြီး ၁၁ ဦးမှာ ထိုင်းဘက်ခြမ်းသို့ ထွက်ပြေးသွားခဲ့ကာ လက်နက်ငယ် ၂ လက်နှင့် လက်ပစ်ဗုံးတစ်လုံးယူဆောင်သွားခဲ့သည်ဟု ဖော်ပြထားသည်။
၎င်းတိုက်ပွဲတွင် KNLA တပ်သား ၃ ဦးသေဆုံးခဲ့ပြီးနောက် ၆ ဦးဒဏ်ရာရှိရှိခဲ့သည်ဟု ဖော်ပြထားပြီး သိမ်းပိုက်ထားသော လက်နက်ခဲယမ်းဓါတ်ပုံများကိုထုတ်ပြန်ထားသည်။
ဓာတ်ပုံ- ပူးလူးတူစခန်း သိမ်းပိုက်ရရှိခဲ့သည့် မှတ်တမ်းဓာတ်ပုံများ(KNU)
