ကရင်အမျိုးသားအစည်းအရုံး – KNU ထိန်းချုပ်နယ်မြေ၊ တပ်မဟာ ၅၊ ဖာပွန် (မူတြော်) ခရိုင်၊ ဖာပွန် – ကမမောင်းလမ်းပိုင်းရှိ ကတိုင်တိစခန်းကို တော်လှန်ရေးပူးပေါင်းတပ်များ သိမ်းပိုက်လိုက်ပြီဟု တပ်မဟာ ၅ ပြောရေးဆိုခွင့်ရှိသူ ဒုတိယဗိုလ်မှူးကြီး စောကလယ်ဒိုက ပြောသည်။
၎င်းက “ရွာသားတွေက ကြောက်နေတယ်။ စစ်ကောင်စီဘက်က သူတို့ လူတွေ ထပ်ပို့လာတာကြောင့်ပေါ့နော်။ ကျွန်တော်တို့ဘက်ကတော့ ကတိုင်တိအထိ တိုက်တာ စစ်ကောင်စီစခန်းတွေတော့ ရပြီ။ ဒါပေမယ့် BGF နေရာတွေ ကျန်သေးတာပေါ့။ ရွာသားတွေက တိုက်ပွဲ ထပ်ဖြစ်လာမှာစိုးလို့ ရှောင်နေကြတာပေါ့လေ” ဟု ၎င်းက ဆိုသည်။
ပြီးခဲ့သည့် ဇန်နဝါရီလ ၂၉ ရက်တွင် စစ်ကောင်စီ၏ ကတိုင်တိစခန်းကို ကရင်အမျိုးသားလွတ်မြောက်ရေးတပ်မတော် – KNLA နှင့် ပူးပေါင်းတပ်များက စတင်တိုက်ခိုက်ခဲ့ကာ လဝက်ကျော်အကြာတွင် သိမ်းပိုက်နိုင်ခဲ့ခြင်းဖြစ်သည်။
လက်ရှိအချိန်တွင် စစ်ကောင်စီဘက်က လေကြောင်းနေ့စဉ်သုံးကာ ဖာပွန်အောက်ဘက်နှင့် ကတိုင်တိရွာကြားတွင် လေကြောင်း ဗုံးကြဲမှုများ ပိုလုပ်ဆောင်နေသည်ဟု ပဒိုစောကလယ်ဒိုက ဆိုသည်။
“၄ ရက်နေ့ ည ၉ နာရီကျော်ကျော်မှာ ကျောက်ကွင်းဘုန်းကြီးကျောင်းမှာ လာကြဲသွားတယ်။ အဲဒီထဲမှာ နေတဲ့ဘုန်းကြီး သုံးပါးစလုံး ထိသွားတယ်။ တစ်ပါးက ပျံလွန်တော်မူသွားတယ်။ ကျန်တဲ့ နှစ်ပါးကို ဘားအံဆေးရုံ ပို့တယ်။ ဆေးရုံပို့တဲ့ လမ်းမှာ တစ်ပါး ထပ်ပြီး ပျံလွန်တော်မူတယ်။ ကျန်တဲ့တစ်ပါးက ဆေးရုံရောက်တာတောင် သတိမရသေးဘူး” ဟု ၎င်းက အခြေအနေကို ပြောသည်။
လက်ရှိအချိန်တွင် ဖာပွန် – ကမမောင်းကြားရှိ ဒေသခံများသည် ကျေးရွာအတွင်း နေထိုင်ခြင်းမရှိဘဲ ဘေးလွတ်ရာသို့ တိမ်းရှောင်နေကြရသည်ဟု သိရသည်။
ပြီးခဲ့သည့် ၂၀၂၄ ခုနှစ် နိုဝင်ဘာလ ၂၂ ရက်တွင် တပ်မဟာ ၅ ရှိ တောင်သုံးလုံးစခန်းနှင့် မထောစခန်းကို ပူးပေါင်းတပ်ဖွဲ့များက သိမ်းပိုက်နိုင်ခဲ့သေးသည်။
ပုံစာ – ကရင့်တော်လှန်ရေးနေ့တွင် မြင်တွေ့ရသည့် KNU တပ်ဖွဲ့ဝင်တချို့ (ဓာတ်ပုံ – KNU)
