မြဝတီဒေသအတွင်းရှိ လောင်းကစားရုံများနှင့် ကျားဖြန့်လုပ်ငန်းခွင်များတွင် ရောက်ရှိနေသော တရုတ်နိုင်ငံသား ၁၄၃၉ ဦးကို ၄ ရက်အတွင်း လေယာဉ် ၁၉ ခေါက်ဖြင့် ပြန်လည်ခေါ်ယူသွားမည်ဟု ကရင်နယ်ခြားစောင့်တပ်(BGF) တာဝန်ရှိသူထံမှ သိရှိရသည်။
အဆိုပါ တရုတ်နိုင်ငံသားများကို မတ်လ ၆ ရက်မှ ၉ ရက်အတွင်း မဲဆောက်-မြဝတီချစ်ကြည်ရေးတံတားနှစ်မှ မဲဆောက်လေဆိပ်သို့ မော်တော်ယာဉ်များဖြင့်လွှဲပြောင်းပေးသွားမည်ဖြစ်ပြီး တရုတ်နိုင်ငံသို့ လေယာဉ်များဖြင့် ပြန်လည်ပို့ဆောင်သွားမည်ဟု BGF ပြောရေးဆိုခွင့်ရှိသူ ဒုတိယဗိုလ်မှူးကြီး နိုင်မောင်ဇော်က ပြောသည်။
” မတ်လ ၆ ရက်၊ ၇ ရက်၊ ၈ ရက်မှာက တနေ့ကို လေယာဉ် ၆ ခေါက်စီနဲ့ ၄၅၆ ဦး၊ ၉ ရက်မှာက ၇၁ ဦးဆိုတော့ လေယာဉ် ၁ ခေါက်၊ စုစုပေါင်း ၁၄၃၉ ဦးကို ပြန်ပို့သွားမှာပါ “ဟု ၎င်းကပြောသည်။
ဖေဖော်ဝါရီ ၁၂ ရက်မှ စတင်ကာလုပ်ဆောင်ခဲ့သော ကျားဖြန့်နှိမ်နင်းရေးလုပ်ငန်းစဉ်များတွင် BGF အနေဖြင့် အဆိုပါ လုပ်ငန်းခွင်များမှ လူဦးရေ ၇၀၀၀ ကျော်ကို ကယ်ဆယ်၊ ထိန်းသိမ်းထားသည်ဟု သတင်းထုတ်ပြန်ထားသည်။
