ကျေးရွာအတွင်းဒရုန်းဖြင့် ဗုံးသီးကြဲချမှုကြောင့် ၄နှစ်အရွယ် ကလေးငယ်တစ်ဦးသေဆုံး
********************************
ဒီဇင်ဘာ ၂၃ ၊ ၂၀၂၂ ။
စစ်ကောင်စီတပ်ဖွဲ့ဝင်များက ကျေးရွာအတွင်းကို ဒရုန်းဖြင့် ဗုံးသီးများကို ကြဲချခြင်း၊ လက်နက်ကြီးဖြင့်ပစ်ခတ်ခြင်းတို့ကြောင့် စစ်ကိုင်းတိုင်းဒေသကြီး၊ မြောင်မြို့နယ်၌ ၄ နှစ်အရွယ် မိန်းကလေးငယ်တစ်ဦးသေဆုံး၍ ပြည်သူ ၇ဦး ထိခိုက်ဒဏ်ရာရရှိခဲ့သည်ဟု ဒေသခံများထံမှ သိရသည်။
ဧရာဝတီမြစ်အရှေ့ဘက်ကမ်း မန္တလေးတိုင်း၊မြင်းခြံမြို့နယ်၊ကိုင်းကျေးရွာဘက်မှနေ၍ စစ်ကောင်စီတပ်ဖွဲ့ဝင်များက မြစ်အနောက်ဘက်ကမ်းရှိ မြောင်မြို့နယ်၊ညောင်ကားယားကျေးရွာအတွင်းကို ယနေ့ နံနက် ၁၀ နာရီခန့်တွင် လက်နက်ကြီး ၆၀မမ ၃လုံးပစ်ခတ်၍ အတွဲလိုက်အီနာဂါများကို ဒရုန်းဖြင့်နှစ်ကြိမ်ကြဲချခဲ့သည်။
ဒရုန်းဖြင့်နှစ်ကြိမ်ကြဲချတိုက်ခိုက်မှုတွင် မြေးအဘွားနှစ်ဦးတည်းရှိနေသည့် နေအိမ်တစ်လုံးရှေ့ကျရောက်ပေါက်ကွဲခဲ့ပြီး မြေးဖြစ်သူမှာသေဆုံး၍ အဘွားဖြစ်သူမှာ ပြင်းထန်ဒဏ်ရာရရှိခဲ့သည်ဟု မြောင်မြို့နယ် ပြည်သူ့လုံခြုံရေးနှင့်ကာကွယ်ရေးအဖွဲ့ CDSOM မှ တာဝန်ရှိသူ ကိုနွေဦး − မြောင်က သံလွင်ခက်ကိုပြောသည်။
၎င်းက” ဒရုန်းနဲ့ပစ်တော့ သူတို့အိမ်ရှေ့ချတာဆိုတော့ ကလေးကတော့ ဦးခေါင်းနောက်စိထိခိုက် ပြီး၊ဆေးကုသမှုပေးဖို့သွားချိန်လမ်းမှာသေဆုံးသွားတာ။အဘွားကတော့နံရိုးတွေနဲ့ရင်ဘက် တွေ ထိခိုက်သွားတယ်စိုးရိမ်ရတဲ့အနေအထားဆိုပေမဲ့ အတတ်နိုင်ဆုံးကုသပေးနေပါတယ် ” ဟု ပြောသည်။
စစ်ကောင်စီတပ်ဖွဲ့ဝင်များသည် ယနေ့တွင် ပြည်သူ့ကာကွယ်ရေးတပ်များနှင့် ထိတွေ့တိုက်ပွဲများဖြစ်ပွားခြင်းမရှိဘဲ မြောင်မြို့နယ် ၊ ညောင်ကားယားကျေးရွာအတွင်းကို လက်နက်ကြီးနှင့် ဒရုန်းများဖြင့် တစ်ဖက်သတ်ပစ်ခတ်တိုက်ခိုက်ခဲ့ခြင်းဖြစ်သည်ဟု ကိုနွေဦး-မြောင်က ဆက်လက်ပြောကြားသည်။
လက်နက်ကြီးဖြင့်ပစ်ခတ်မှုကြောင့် အသက် ၆၀အရွယ်အဘွားတစ်ဦးနှင့် ၁၆နှစ်အရွယ်လူငယ်အမျိုးသားအပါအဝင် ဒေသခံပြည်သူ ၆ဦးထိခိုက်ဒဏ်ရာရရှိခဲ့သည်ဟု သိရသည်။
“ ကာကွယ်ရေးတပ်ဖွဲ့တွေဘက်ကနေပစ်လို့ စစ်ကောင်စီဘက်က ပြန်ပစ်တာမျိုးဆိုရင်တော့ သူပစ်လို့ ကိုယ်ပစ်တာဆိုပြီး ပြောလို့ရတာပေါ့။ အခုဟာက ရွာထဲကို လက်နက်ကြီးတွေနဲ့ရော၊ဒရုန်းတွေနဲ့ရော အကြိမ်ကြိမ်လာပစ်တယ်ဆိုတာကတော့ပြည်သူတွေနဲ့ ရွာတွေကိုဘဲ သီးသန့်လာပစ်တယ်လို့ဘဲ ကျွန်တော်ပြောရမှာပဲ ” ဟု ကိုနွေဦး-မြောင်က ပြောသည်။
စစ်ကောင်စီတပ်ဖွဲ့ဝင်များက အရပ်သားပစ်မှတ်များကို ရည်ရွယ်ချက်ရှိရှိတိုက်ခိုက်နေသောကြောင့် မြောင်မြို့နယ်တွင် အရပ်သားပြည်သူများ မကြာခဏထိခိုက်မှုရှိနေကာ ပြီးခဲ့သည့် နို၀င်ဘာလပိုင်းတွင်လည်းလက်နက်ကြီးပစ်ခတ်တိုက်ခိုက်မှုကြောင့် စစ်ရှောင်များကို ထမင်းချက်ကျွေးနေသည့် စားဖိုမှူးနှစ်ဦးလည်း အသက်ဆုံးရှုံးခဲ့ရသည်ဟု သိရသည်။
