သံလွင်ခက်
ဒီဇင်ဘာ ၃၀၊ ၂၀၂၄။
ချင်းညီနောင်တပ်ဖွဲ့ဝင်တို့၏ တော်လှန်ရေးကာလ ၄ နှစ်တာအတွင်း တပ်ဖွဲ့အသီးသီးမှ တပ်ဖွဲ့ဝင် စုစုပေါင်း ၂၅၀ ဦး ကျဆုံးခဲ့ပြီး လူဦးရေ ၁,၀၀၀ ဦးခန့် ထိခိုက်ဒဏ်ရာရရှိခဲ့သည်ဟု ယနေ့ ချင်းညီနောင် တစ်နှစ်ပြည့် အခမ်းအနားကျင်းပစဉ် CDF မင်းတပ်၏ စစ်ဦးစီးချုပ် ဆလိုင်းထန်းချွန်ဖေ က ပြောသည်။
ချင်းညီနောင်အဖွဲ့သည် ကျင်ဒွေးမြို့၊ ကန်ပက်လက်မြို့၊ မတူပီမြို့ အပါအဝင် မင်းတပ်မြို့ စသည့် မြို့ ၄ မြို့ကို တိုက်ခိုက်သိမ်းပိုက်ထားပြီးဖြစ်သည်။
ထို့ပြင် ဖလမ်းမြို့၊ တီးတိန်မြို့နှင့် ပလက်ဝမြို့အပါအဝင် စစ်ကိုင်းတိုင်း ခမ်းပတ်မြို့တို့မှ စစ်ကောင်စီတပ်၏ တပ်စခန်းပေါင်း ၃၀ ကျော်ကိုလည်း တိုက်ခိုက်သိမ်းပိုက်ထားနိုင်ခဲ့သည်ဟု CDF မင်းတပ်၏ စစ်ဦးစီးချုပ် ဆလိုင်းထန်းချွန်ဖေ က ပြောသည်။
“ချင်းညီနောင်” ဆိုသည်မှာ ၂၀၂၃ ခုနှစ်၊ ဒီဇင်ဘာ ၃၀ ရက်က ဇိုမီးဖက်ဒရယ်အစည်းအရုံး – ZFU/ PDF Zoland၊ ချင်းအမျိုးသားအဖွဲ့ချုပ်/ ချင်းအမျိုးသားကာကွယ်ရေးတပ်ဖွဲ့ – CNO/ CNDF နှင့် ချင်းအမျိုးသားကောင်စီ / ချင်းကာကွယ်ရေးတပ်ဖွဲ့ (မင်းတပ်) – CNC Mindat/ CDF Mindat တို့ စုဖွဲ့ပြီး “ချင်းညီနောင်” ဖွဲ့စည်းကြောင်း ကြေညာခဲ့သည်။
ထို့နောက် တစ်လအကြာ ၂၀၂၄ ခုနှစ်၊ ဇန်နဝါရီလ ၃၀ ရက်တွင် မရာနယ်မြေအုပ်ချုပ်ရေးကောင်စီ/ မရာလဲန်းကာကွယ်ရေးတပ်ဖွဲ့ – MTC/ MDF တို့က ချင်းညီနောင် အဖွဲ့ဝင်အဖြစ်ပါဝင်ကြောင်း ထပ်မံ ထုတ်ပြန်ကြေညာခဲ့သည်။
၂၀၂၄ ခုနှစ်၊ မတ်လ ၆ ရက်တွင် ချင်းကာကွယ်ရေးတပ်ဖွဲ့ (ကန်ပက်လက်) – CDF Kanpetlet ရှိ တပ်ရင်း ၇ ရင်းမှ တပ်ရင်း ၅ ရင်းသည် ချင်းညီနောင်အဖွဲ့တွင် ပါဝင်ခဲ့ပြီး ချင်းလဲန်းကာကွယ်ရေးတပ်ဖွဲ့ (မတူပီ) – CDF Matupi (B – 1) တို့လည်း ချင်းညီနောင် အဖွဲ့ဝင်များ ဖြစ်ခဲ့သည်။
တစ်နှစ်အကြာ ချင်းညီနောင်အဖွဲ့တွင် ချင်းကာကွယ်ရေးတပ်ဖွဲ့ ၆ ဖွဲ့အပါအဝင် ညီနောင်မဟာမိတ်အဖြစ် ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော် – ULA/ AA အပါအဝင် စစ်ကိုင်းတိုင်း၊ မကွေးတိုင်းနှင့် ယောနယ်အတွင်းက တော်လှန်ရေးအဖွဲ့အစည်းများနှင့်လည်း မဟာမိတ်အဖြစ် လက်တွဲကာ တိုက်ပွဲများ ဖော်ဆောင်လျက်ရှိပြီး ချင်းညီနောင်သည် တိုက်ပွဲပေါင်း ၁,၀၀၀ ကျော်တွင် ပါဝင်ခဲ့သည်ဟု သိရသည်။
ထို့ပြင် ယနေ့ ချင်းညီနောင် တစ်နှစ်ပြည့်အခမ်းအနားတွင် အာရက္ခတပ်တော်၏ စစ်ဦးစီးချုပ် ဗိုလ်ချုပ်ထွန်းမြတ်နိုင်က မိန့်ခွန်းပြောကြားရန် အစီစဉ်ရှိခဲ့သော်လည်း အရေးကြီးမီတင်ကြောင့် ပျက်ကွက်ခဲ့ကာ အမျိုးသားညီညွတ်ရေး အစိုးရ – NUG အဖွဲ့၏ ယာယီသမ္မတ ဒူဝါလရှီးလ နှင့် အခြားတော်လှန်ရေးတပ်ဖွဲ့မှ ခေါင်းဆောင်များတက်ရောက်ကာ မိန့်ခွန်းများ ပြောကြားခဲ့သည်။
လက်ရှိ ချင်းပြည်နယ်တွင် ချင်းအမျိုးသားတပ်ဦး – CNF ဦးဆောင်သည့် ချင်းတော်လှန်ရေးအင်အားစုများနှင့် ဖွဲ့စည်းထားသည့် ချင်းလဲန်းကောင်စီ – CC နှင့် ကြားကာလချင်းအမျိုးသားအတိုင်ပင်ခံကောင်စီ- ICNCC လက် အောက်ရှိ ချင်းညီနောင် အဖွဲ့ ဟူ၍ နှစ်ဖွဲ့ တည်ရှိသည်။
