ကေအဲန်ယူ တပ်မဟာ ၅ နယ်မြေအတွင်းရှိ စစ်ကောင်စီတပ်စခန်း ၃ ခုကို တိုက်ခိုက်ခဲ့သည့်တိုက်ပွဲအတွင်း၌ KNLA တပ်ဖွဲ့ဝင်တချို့ ထိခိုက်ဒဏ်ရာရရှိမှုနှင့် ကျဆုံးမှုများရှိခဲ့သည်ဟု သိရသည်။
ကရင်ပြည်နယ်၊ ဖာပွန်ခရိုင်အတွင်းရှိ စစ်ကောင်စီတပ်၏ မဲဝိုင်၊ လယ်တိုး၊ ခေါပုတ် စခန်းများကို KNLAနှင့်ပူးပေါင်းတပ်ဖွဲ့များက ယခုလဒီဇင်ဘာ၆ရက် နံနက်အစောပိုင်းတွင် တပြိုင်နက် တည်းတိုက်ခိုက်ခဲ့သည်။
” တပ်မဟာ(၅)စခန်း(၃)လုံးတပြိုင်ထဲတက်သိမ်းတိုက်ပွဲမှာ အနိုင်ရရှိပေမယ့် ကျဆုံးမှုတွေရှိပါတယ်။ တိုင်းပြည်နဲ့လူမျိုးအတွက်အသက် ပေးရတာဂုဏ်ယူလေးစားပါတယ်KNLAရဲဘော် ကောင်းရာဘဝရောက်ပါစေ “ဟု ကေအဲန်ယူတပ်ဖွဲ့ဝင်များကို ထောက်ပို့ပေးနေသူ ကရင်အမျိုးသားတစ်ဦးက ဖော်ပြထားသည်။
KNLA တပ်ဖွဲ့ဝင်များ ကျဆုံးမှုကို ဓာတ်ပုံများ၊ ဗီဒီယိုမှတ်တမ်းများနှင့်တကွ ဝမ်းနည်းကြောင်း ဖော်ပြထားသည့် ၎င်းက အဆိုပါစခန်းသိမ်းတိုက်ပွဲ၌ KNLA တပ်ဖွဲ့ဝင်နှစ်ဦး ကျဆုံးခဲ့ရသည်ဟု သံလွင်ခက်၏မေးမြန်းမှုကို ဖြေကြားသည်။
KNLA တပ်ဖွဲ့ဝင်များနှင့်နီးစပ်သည့် အသက်နှစ်ဆယ်ကျော်အရွယ် ကရင်အမျိုးသမီးတစ်ဦးကလည်း တပ်မဟာ ၅ ၌ စစ်ကောင်စီစခန်း ၃ လုံးကိုတိုက်ခိုက်ခဲ့ရာ KNLA ဘက်မှ ကျဆုံးမှုရှိကြောင်း ကြားသိရသည်ဟု ပြောကြားသည်။
အဆိုပါ စစ်ကောင်စီစခန်းများတိုက်ခိုက်သိမ်းပိုက်သည့် တိုက်ပွဲတွင် စစ်ကောင်စီတပ်ဖွဲ့ဝင်အများအပြားသေဆုံး၍ လက်နက်ခဲယမ်းများပါ သိမ်းည်းရမိခဲ့သည်ဟု ကရင်ဒေသခံတချို့က ဖော်ပြနေကြသော်လည်း ကေအဲန်ယူ တပ်မဟာ ၅ ဘက်မှ ယနေ့ ဒီဇင်ဘာ ၈ရက် ၊ နေ့လည် ၃ နာရီအချိန်ထိ အတည်ပြု ထုတ်ပြန်ခြင်းမရှိသေးပေ။
ထိုတိုက်ပွဲအခြေအနေ၊ KNLA တပ်ဖွဲ့ဝင်များထိခိုက် ကျဆုံးမှုအခြေအနေများနှင့်ပတ်သက်၍ ကေအဲန်ယူ တပ်မဟာ ပြောရေးဆိုခွင့်ရှိသူထံ သံလွင်ခက်က ယမန်နေ့နှင့် ယနေ့တို့၌ နှစ်ကြိမ် ဆက်သွယ်မေးမြန်းထားခဲ့ရာ ရှေ့တန်းမှသတင်း အချက်အလက်များ အတိအကျမရသေး၍ ဖြေဆိုရန်ခက်ခဲနေသည်။
” အဖိုးလည်းသတင်းအတိအကျမရသေးတော့ပြောပြလို့မတတ်သေးဘူး။ စခန်းတက်တာဘဲကြားတယ်ဘယ်စခန်းနဲ့အခြေအနေဘယ်လိုရှိတယ်မသိရသေးဘူး “ဟု ၎င်းကပြောသည်။
စစ်ကောင်စီစခန်းသိမ်းတိုက်ပွဲနှင့်ပတ်သက်၍ သတင်းထုတ်ပြန်ခြင်းမရှိသေးသော်လည်း ကေအဲန်ယူတပ်မဟာ ၅ ၏ မူတြော်ခရိုင်သတင်းစဥ်က ယမန်နေ့တွင် စစ်ကောင်စီတပ်က တပ်မဟာ ၅နယ်မြေအတွင်းရှိ ကျေးရွာများသို့ ဂျက်တိုက်လေယာဥ်များဖြင့် ဗုံးသီး ၁၄ လုံး လာရောက်ကြဲချပြီး ၁၂၂ မမ လက်နက်ကြီးဖြင့် ပစ်ခတ်တိုက်ခဲ့သည်ဟု ဖော်ပြထားသည်။
ကေအဲန်ယူတပ်မဟာ ၅ နယ်မြေအတွင်းရှိကျေးရွာများသို့ စစ်ကောင်စီတပ်က ယမန်နေ့တွင် လေကြောင်းမှ ဗုံးကြဲတိုက်ခိုက်ခြင်း၊ လက်နက်ကြီးများဖြင့် ပစ်ခတ်မှုတို့ကြောင့် ပြည်သူများ ထိခိုက်မှုမရှိခဲ့သော်လည်း တိရိစ္ဆာန်များထိခိုက်ဒဏ်ရာရ၍ လယ်ယာ၊ဥယျာဥ်များပျက်စီးခဲ့ရသည်ဟု မူတြော်သတင်းစဥ်က ဖော်ပြထားသည်။
ပြီးခဲ့သော နိုဝင်ဘာလတွင် မူတြော်ခရိုင် တပ်မဟာ (၅) အုပ်ချုပ်နယ်မြေအတွင်း၌ တိုက်ပွဲကြီး၊ တိုက်ပွဲငယ်ပေါင်း (၁၁၆) ကြိမ်ဖြစ်ပွား ခဲ့ပြီး အာဏာသိမ်းစစ်ကောင်စီတပ်များဘက်မှ (၆၉) ဦးသေဆုံးပြီး (၅၁) ဦး ထိခိုက်ဒဏ်ရာ ရရှိခဲ့သည်ဟု ကေအဲန်ယူဗဟိုကသတင်းထုတ်ပြန်ထားသည်။
ကေအဲန်ယူဗဟိုက ပြီးခဲ့သော နိုဝင်ဘာလအတွက် သတင်းထုတ်ပြန်မှု၌ တပ်မဟာ ၁မှ တပ်မဟာ ၆ အထိ တပ်မ၆ ခုတို့တွင် တိုက်ပွဲပေါင်း ၂၉၀ ကြိမ်ဖြစ်ပွားခဲ့ပြီး စစ်ကောင်စီနှင့် BGF တပ်ဖွဲ့ဝင် ၃၃၃ ဦးသေဆုံးကာ ၂၃၇ ဦး ထိခိုက်ဒဏ်ရာရရှိခဲ့သည်ဟု ဖော်ပြထားသည်။
ထို့ပြင် ကေအဲန်ယူတပ်မဟာ၆ ခုတို့၌ ပြီးခဲ့သောနိုဝင်ဘာလ အတွင်းတိုက်ပွဲများတွင်ကရင်အမျိုးသားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ်ဖွဲ့ (KNDO) တို့ဘက်မှ ၃၀ ဦးကျဆုံးခဲ့ရပြီး ၆၈ ဦး ထိခိုက်ဒဏ်ရာရရှိခဲ့သည်ဟု သိရသည်။
