ခင်ဦးနယ်ထဲက ကျေးရွာ ၂ ရွာကို စစ်တပ်က ထပ်မံမီးရှို့၊ ရွာ ၂၀ ထက်မနည်း ထွက်ပြေးနေရ

မောင်ဘဦး
စက်တင်ဘာ ၆၊ ၂၀၂၄။

စစ်ကိုင်းတိုင်း၊ ခင်ဦးမြို့နယ်က ကျေးရွာ ၂ရွာကို စစ်ကောင်စီက ထပ်မံမီးရှိုခဲ့ရာ ၄ ရက်အတွင်း ကျေးရွာ ၈ ရွာကို ဖျက်ဆီးခဲ့သည်ဟု ဒေသခံများထံက သိရသည်။

ပြီးခဲ့သည့် စက်တင်ဘာ ၄ ရက်နှင့် ၅ ရက်တွင် မဒေါင်းလှကျေးရွာမှထွက်လာသည့် အင်အား ၁၇၀ ပါ သည့် စစ်ကောင်စီတပ်နှင့် ကန့်ဘလူပျူစောထီးအဖွဲ့သည် နှဲတွင်းနှင့် ဆီဆုံရွာတို့ကို ဝင်ရောက်မီးရှို့ခဲ့ပြီး ၄ ရက်အတွင်း ငကြိုင်း၊ အင်ကြင်းပင်၊ စောကြီး၊ သနပ်စိန်၊ ဖန်းခါးကုန်း၊ ပေါက်တောရွာတို့ကိုလည်း မီးရှို့ဖျက်ဆီးထားခြင်းဖြစ်သည်။

“​နေအိမ်ပျက်စီးမှု ရာကျော်နိုင်ချေရှိတယ်လို့ ခန့်မှန်းရတယ်ဗျ။ အခု လက်ရှိအချိန်ထိ ဘာတိုက်ပွဲမှတော့ ဖြစ်မထားပါဘူး။ ပြည်သူပိုင်နေအိမ်တွေကို အကြောင်းမဲ့ မီးရှို့ဖျက်ဆီးနေကြတာပါ” ဟု စစ်ရှောင်အရေးကူညီပေးနေသူ ကိုငြိမ်းက ပြောသည်။

ပြီးခဲ့သည့် သြဂုတ် ၁၇ ရက်တွင် ပျူစောထီးအားကောင်းသည့် မဒေါင်းလှရွာကို တော်လှန်ရေးတပ်ဖွဲ့များက တိုက်ခိုက်ခဲ့ပြီးနောက် စစ်ကောင်စီမှ ၄ ရက်အတွင်း ကျေးရွာ ၂၀ ရွာနီးပါးကို Mi 35 နှင့် Y-12 အသုံးပြုကာ ဗုံးကြဲတိုက်ခိုက်သဖြင့် ဒေသခံတစ်ဦးသေဆုံးကာ ၁၀ ဦးကျော် ထိခိုက်ဒဏ်ရာရရှိခဲ့သည်။

လတ်တလောတွင် ထွက်ပြေးတိမ်းရှောင်နေကြရသည့် ကျေးရွာ ၂၀ နီးပါးမှ စစ်ရှောင်သက်ကြီးရွယ်များ အပါအဝင် အမျိုးသမီးများနှင့် ကလေးငယ်များအတွက် စားနပ်ရိက္ခာနှင့် ဆေးဝါးများအရေးပေါ် လိုအပ်လျက်ရှိသည်။

ပုံစာ – ခင်ဦးမြို့နယ် စစ်ရှောင်များ။ ဓာတ်ပုံ- People’s Defense Comrade