မြဝတီမြို့အနီးရှိ တပ်စခန်းများ လက်မလွှတ်ရရေး စစ်ကောင်စီလေကြောင်းဖြင့် အပြင်းထန်ခုခံ၊ ဘိုးဘွားရိပ်သာကိုပါ ထိမှန်မှုကြောင့် အဖိုးအဖွားများပါ ပြေးလွှားတိမ်းရှောင်နေရ

မြဝတီမြို့အနီးရှိ တပ်စခန်းများ လက်မလွှတ်ရရေး စစ်ကောင်စီလေကြောင်းဖြင့် အပြင်းထန်ခုခံ၊ ဘိုးဘွားရိပ်သာကိုပါ ထိမှန်မှုကြောင့် အဖိုးအဖွားများပါ ပြေးလွှားတိမ်းရှောင်နေရ

************************************

နန်းဆုပန်ခန့်

မတ် ၉ ၊၂၀၂၄။

ကေအဲန်ယူ ထိန်းချုပ်နယ်မြေ၊ တပ်မဟာ ၆၊ ဒူးပလာယာခရိုင်၊ မြဝတီမြို့အနီး သင်္ဃန်းညီနောင်ရှိ တပ်စခန်းများ လက်မလွှတ်ရရေး စစ်ကောင်စီတပ်သည် လေကြောင်းဖြင့် ခုခံလျက်ရှိသည်ဟု ကာကွယ်ရေးတပ်ဖွဲ့ဝင်များထံက သိရသည်။

မတ်လ ၇ရက်တွင် သင်္ဃန်းညီနောင် ရှိ စစ်ကောင်စီ ခမရ – ၃၅၅ တပ်ရင်းကို ကာကွယ်ရေး ပူးပေါင်းတပ်ဖွဲ့များက စတင်တိုက်ခိုက်သည့်အချိန်မှစ၍ စစ်ကောင်စီက လေကြောင်းသုံးခုံခံနေခြင်းဖြစ်သည်။

မတ်လ ၈ ရက် နေ့လည်ပိုင်းတွင် အဆိုပါ တပ်ရင်းအား ကာကွယ်ရေး ပူးပေါင်းတပ်များက သိမ်းပိုက်ပြီးနောက် စစ်ကောင်စီက ယခင်ထက် လေကြောင်း အသုံးပြု၍ ပြန်လည်ခုခံနေခြင်းဖြစ်သည်ဟု ကာကွယ်ရေးတပ်ဖွဲ့ဝင်တစ်ဦးက သံလွင်ခက်သတင်းဌာနကိုပြောသည်။

၎င်းက ” ဂျက်က တစ်စီးကြဲပြီး ပြန်တာ အသံတောင်မကုန်သေးဘူး။ နောက်တစ်စီးက ထပ်ရောက်နေပြီ။ ဒီမနက်မှာလည်း ကင်းထောက်လေယာဉ်ခနခနလာတယ်။ အခုတောင် အလုံးလိုက်ချနေတာ။ တစ်ခါကြဲရင် ၆ လုံးနဲ့ ၁၀ ကြားကြဲတာ။ ဂျက်တောင် အဲ့လောက်မကြောက်ရဘူး ” ဟုဆိုသည်။

တိုက်ပွဲစတင်ဖြစ်ပွားသည့် မတ်လ ၇ ရက်မှစ၍ ယနေ့အချိန်ထိ စစ်ကောင်စီတပ်က မြဝတီမြို့အနီးကို လေကြောင်းတိုက်ခိုက်မှု အကြိမ်ရေ ၃၀ ထက်မနည်း တိုက်ခိုက်ခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။

ယမန်နေ့ မတ်လ ၈ ရက် ညနက်ပိုင်းမှစပြီး ယနေ့မနက်အစောပိုင်းအချိန်ထိ စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့သည့်အတွက် သင်္ဃန်းညီနောင်၊ ရွာသစ်ရွာရှိ နေအိမ် ၅၀ နီးပါး မီးလောင်ပျက်စီးခဲ့သည်။

ဒေသခံတစ်ဦးက “ မနေ့ကတစ်နေကုန်လေယာဉ်လာတာ၊ မနေ့ညကဆိုရင် သင်္ဃန်းညီနောင် ရွာသစ်ရွာက နေအိမ် အလုံး ၅၀ ကျော်ပါသွားတယ်၊ ဒေသခံတွေကတော့ မြဝတီမြို့ပေါ်ကို တိမ်းရှောင်နေရတယ်၊ ” ဟု ဆိုသည်။

ထို့ပြင် ယမန့်နေ့တွင် စစ်ကောင်စီတပ်က သင်္ဃန်းညီနောင် ရွာသစ်ရွာရှိ သဘာ၀တရားရိပ်သာ ဘိုးဘွားဂေဟာကို လေကြောင်းဖြင့် ဗုံးကြဲခဲ့သည့်အတွက် အဘိုး ၂ ဦးသေဆုံးခဲ့သည့်အပြင် အများအပြားထိခိုက်ဒဏ်ရာရရှိခဲ့ကြသည်။

သဘာဝတရားရိပ်သာဆေးရုံတာဝန်ခံ ဦးဇင်း ဦးဇေယျမဂ္ဂ က ” “ နှစ်ဦးကတော့ပွဲချင်းပြီး ဆုံးသွားတယ်၊ ၁၄ ဦး ဒဏ်ရာရတယ်၊ ဒဏ်ရာရတဲ့အထဲက အဖွားတစ်ဦးက အခြေအနေမကောင်းဘူး၊ “ ဟု ဆိုသည်။

စစ်ကောင်စီတပ်၏ လေကြောင်းတိုက်ခိုက်မှုများကြောင့် ရွာသစ်ရွာနှင့် ညီနောင်၊ ဖားချောင်း၊ မဲ့ကနယ်ကွက်သစ်၊ ဝှေ့ရှမ်း စသည့်ကျေးရွာများက ဒေသခံများသည် မြဝတီမြို့ပေါ်နှင့် ဘေးလွတ်ရာနေရာများသို့ ထွက်ပြေးတိမ်းရှောင်နေရသလို ထိခိုက်သေဆုံးမှုများရှိသည်ဟု ဒေသခံများထံက သိရသော်လည်း သီးခြားအတည်မပြုနိုင်သေးပေ။

ထိုကဲ့သို့ တိုက်ပွဲဧရိယာများအပြင် ဒေသခံများနေထိုင်သည့် ကျေးရွာများကို စစ်ကောင်စီတပ်က လေကြောင်းတိုက်ခိုက်မှုများ ပြုလုပ်နေသည့်အပြင်  မြဝတီမြို့၊ အာရှလမ်းဘက်ရှိ ခလရ(၂၇၅) တပ်ကလည်း လက်နက်ကြီးများဖြင့် ပစ်ခတ်လျက်ရှိသည်ဟု ဒေသခံများထံက သိရသည်။

ယနေ့ မနက်ပိုင်းတွင် သင်္ဃန်းညီနောင် နယ်မြေရှိ ၃၅၅၊ ၃၅၆ တပ်များ ၃၅၇ တပ်နှင့် ပြန်လည် ပူးပေါင်းထားရပြီး အဆိုပါ နယ်မြေသည် စိုးရိမ်ရေမှတ်ကို ရောက်ရှိနေသည့်အတွက် လေကြောင်းပစ်ကူပေးရန် စစ်ကောင်စီ၏ ဝါဒဖြန့် တယ်လီဂရမ်ချန်နယ်များ၌ ရေးသားထားကြသည်။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3686

YouTube – > https://youtu.be/M_6Wem4Ju9k?si=hD_KqRB2lEvj95D8

Website – >  https://thanlwinkhet.net/?p=8214