ဘိုးဘွားရိပ်သာကို စစ်ကောင်စီက လေကြောင်းဖြင့် တိုက်ခိုက်

ဘိုးဘွားရိပ်သာကို စစ်ကောင်စီက လေကြောင်းဖြင့် တိုက်ခိုက်

*****************************

နန်းဆုပန်ခန့်

မတ် ၈၊ ၂၀၂၃။

ကရင်ပြည်နယ်၊ မြဝတီမြို့အနီး သင်္ဃန်းညီနောင်နှင့် ကုန်သွယ်ရေးဇုန်ကြား ရွာသစ်ရွာတွင် တည်ရှိသည့် ဘိုးဘွားရိပ်သာအား စစ်ကောင်စီက လေကြောင်းဖြင့် တိုက်ခိုက်ခဲ့သည့်အတွက် ရိပ်သာရှိ အဘိုး ၂ ဦးသေဆုံးပြီး ၈ ဦး ဒဏ်ရာရရှိခဲ့သည်ဟု ဒေသခံများထံက သိရသည်။

ယနေ့ မတ်လ ၈ ရက် နံနက် ၁၁ နာရီကျော်တွင် စစ်ကောင်စီတပ်သည် ဘိုးဘွားရိပ်သာအား လေကြောင်းဖြင့် ဗုံးသီး ၂ လုံးကြဲချခဲ့ခြင်းဖြစ်သည်ဟု ဒေသခံအမျိုးသမီး ၁ ဦးက သံလွင်ခက်ကို ပြောသည်။

၎င်းက “ ကြဲနေတာတော့ မနေ့ညကတည်းက ဆက်တိုက်ကြဲနေတာ။ ဒီမနက်လည်းဆက်တိုက်ကြဲတယ်။ ဒီ သဘာဝတရားရိပ်သာကို အခုကျတာ ၂ လုံးရှိတယ်။ အဘိုးအဘွားတွေအဆောင်ပေါ် တည့်တည့်ကို ၁ လုံး၊ အဘိုးအဘွားတွေ စားဖို့သောက်ဖို့ချက်ပြုတ်နေတဲ့ စားဖိုဆောင်ပေါ်တည့်တည့် ၁ လုံး ” ဟု ၎င်းက ဆိုသည်။

ရွာသစ်ရွာရှိ သဘာဝတရားဘိုးဘွားရိပ်သာတွင် သက်ကြီးရွယ်အိုများအပြင် နေစရာမရှိသူများလည်းသွားရောက် နေထိုင်လျက်ရှိပြီး စုစုပေါင်းလူဦးရေ ၂၀၀ ကျော်ရှိသည့်အနက် သက်ကြီးရွယ်အိုလူဦးရေ ၁၀၀ ခန့်ရှိသည်ဟု ယင်းရိပ်သာထဲ၌ နေထိုင်သူများထံက သိရသည်။

ယမန်နေ့ မတ်လ ၇ ရက် ညနေပိုင်းတွင်လည်း စစ်ကောင်စီတပ်က ရွာသစ်ရွာကို လေကြောင်းဖြင့် ဗုံးကြဲတိုက်ခိုက်ခဲ့သည့်အတွက် ဘိုးဘွားရိပ်သာရှေ့က နေအိမ် ၁ လုံးပေါ်သို့ ဗုံးကျရောက်ပေါက်ကွဲခဲ့သောကြောင့် ဒေသခံအမျိုးသမီး ၁ ဦး သေဆုံးခဲ့သည်ဟု မိသားစုနှင့်နီးစပ်သူ ၁ ဦးက ဆိုသည်။

၎င်းက “ မနေ့ကဖြစ်တာ။ ဘိုးဘွားရိပ်သာနဲ့ လမ်းတစ်ဖက်ဆီက အိမ်တည့်တည့်ကျတာ။ နေရာမှာတင် ပွဲချင်းပြီး သေသွားတယ် ” ဟုဆိုသည်။

ယမန်နေ့ နံနက် ၁၀ နာရီကျော်တွင် ဒေသကာကွယ်ရေးပူးပေါင်းတပ်ဖွဲ့ဘက်က သင်္ဃန်းညီနောင်ရွာရှိ ခမရ – ၃၅၅ ကို သွားရောက်တိုက်ခိုက်ခဲ့ပြီး ခမရ – ၃၅၅ ဗျူဟာအတွင်းရှိ ဗဟိုကင်းနှင့် အရာရှိရိပ်သာအထိ ထိုးဖောက်ဝင်ရောက်ထားနိုင်သည်ဟု စစ်ကောင်စီဝါဒဖြန့် တယ်လီဂရမ် ချန်နယ်များ၌ ဖော်ပြထားကြသည်။

ယခုလက်ရှိအချိန်ထိလည်း စစ်ကောင်စီတပ်က လေကြောင်းတိုက်ခိုက်မှုအပြင် ခလရ – ၂၇၅ တပ်ကလည်း တိုက်ပွဲဖြစ်ပွားရာနေရာများသို့ လက်နက်ကြီးများဖြင့်လည်း ပစ်ကူပေးနေသည်ဟု သိရသည်။

ပုံစာ – လေကြောင်း တိုက်ခိုက်မှုကြောင့် ထိခိုက်ဒဏ်ရာရရှိခဲ့သည့် အဘိုး အဘွားများ။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3667

YouTube – > https://youtu.be/M_6Wem4Ju9k?si=hD_KqRB2lEvj95D8

Website – > https://thanlwinkhet.net/?p=8188