စစ်ကောင်စီကား ၂ စီးကို ရက္ခိုင့်တပ်တော် – AA မိုင်းဆွဲတိုက်ခိုက်
***********************
မိခိုင်
နိုဝင်ဘာ ၁၃၊ ၂၀၂၃။
ရခိုင်ပြည်နယ်၊ ရသေ့တောင်နှင့် မင်းပြားမြို့နယ်များရှိ စစ်ကောင်စီတပ်နှင့် ရက္ခိုင့်တပ်တော် – AA တို့အကြား ယနေ့ နိုဝင်ဘာလ ၁၃ ရက်၊ မနက်ပိုင်း ၃ နာရီဝန်းကျင်၌ တိုက်ပွဲများစတင်ဖြစ်ပွားနေသည်။
ယနေ့ မနက်ပိုင်း ၇ နာရီလောက်တွင်လည်း မင်းပြား တိုင်းဗဟို ၉ မှထွက်ခွာလာသည့် စစ်ကား ၂ စီးကို AA က မိုင်းဆွဲတိုက်ခိုက်ခဲ့ကြောင်း ဒေသခံများက ပြောသည်။
“နံနက် ၇နာရီကျော်လောက် ဖြစ်မယ် ။ တိုင်းဗဟို ၉ ကထွက်လာတဲ့ ကား ၂ စီးကို မိုင်းဆွဲလိုက်တယ်။ ကားက မီးလောင်နေတယ်လို့ ပြောကြတယ်။ လူအသေအပျောက်တော့ သေချာမသိဘူး ” ဟု မင်းပြားဒေသခံ ၁ ဦးက ပြောသည်။
မနက် ၉ နာရီအထိ မင်းပြားမြို့နယ်၊ ဖားပြိုးကျေးရွာအနီးတွင် စစ်ကောင်စီတပ်နှင့် ရက္ခိုင့် တပ်တော် – AA တို့ ကြားတိုက်ပွဲဖြစ်ပွားနေပြီး စစ်ကောင်စီက လက်နက်ကြီးများဖြင့်လှမ်းထုနေသည် ဟုဆိုသည်။
“အခုထိ လက်နက်ကြီး ထုနေတယ် ။ မင်းပြား ကျိန်းတောင်ထက်ကနေပြီး တိုက်ပွဲဖြစ်နေတဲ့နေရာကို လက်နက် ကြီးနဲ့ လှမ်းပစ်နေတာ။ Navy လည်း တက်လာတာတွေ့တယ် ” ဟု ၎င်းက ဆိုသည်။
မင်းပြားမြို့ထက်တွင်ရှိနေသည့် စစ်ကောင်စီတပ်ကလည်း စစ်ကား ၂ စီးထွက်သွားသည်ကိုတွေ့ရပြီး စစ်ကောင်စီ က အင်အားဖြည့်တင်းနေကြောင်း ဒေသခံများကဆိုကြသည်။
မင်းပြားဒေသခံများအနေဖြင့် စိုးရိမ်မှုများရှိနေသော်လည်း မိမိနေအိမ်တွင်သာ နေထိုင်နေကြရကြောင်း ပြောသည်။
ယနေ့ မနက်ပိုင်း ၃ နာရီကျော်လောက်ကစတင်၍ ရသေ့တောင်မြို့နယ်၊ ဒုံးပိုက်နှင့် ချိန်ခါလီကျေးရွာအနီးရှိ နယ်ခြားစောင့်တပ်နှင့် ရက္ခိုင့်တပ်တော် – AA တို့ တိုက်ပွဲစတင်ဖြစ်ပွားခဲ့ပြီး ရက္ခိုင့်တပ်တော် AA က ဒုံးပိုက် နယ်ခြားစောင့်တပ်စခန်းများကို သိမ်းယူသွားသည်ဟုလည်း ပြောဆိုနေကြသည်။ ယခုကိစ္စကို သိရှိနိုင်ရန်အတွက် ရက္ခိုင့်တပ်တော် – AA အား သံလွင်ခက် အနေဖြင့်ဆက်သွယ်နေဆဲဖြစ်သည်။
ရခိုင်ပြည်နယ်တွင် စစ်ကောင်စီတပ်နှင့် ရက္ခိုင့်တပ်တော် – AAတို့ ပြီးခဲ့သည့် ၂၀၂၂ ခုနှစ် ၊ နိုဝင်ဘာလ ၂၆ ရက် တွင် လူသားချင်းစာနာထောက်ထားမှုဆိုင်ရာအကူအညီပေးရေးကိစ္စကြောင့် နှစ်ဘက်နားလည်မှုဖြင့် တိုက်ပွဲရပ် တန့်ထားခြင်းဖြစ်ကာ ယခု နိုဝင်ဘာလ ၁၃ ရက်တွင် စတင်ကာတိုက်ပွဲများဖြစ်ပွားနေခြင်းဖြစ်သည်။
ပုံစာ – ရက္ခိုင့်တပ်တော် – AA တပ်ဖွဲ့ဝင်တချို့ (ပုံဟောင်း)။
ဓာတ်ပုံ – AA Info Desk
*******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2394
YouTube- > https://youtu.be/SpxIBpTYop8
Website -> https://thanlwinkhet.net/?p=6198
