သံလွင်ခက်/မတ် ၁၃
ကေအဲန်ယူ (KNU) ထိန်းချုပ်နယ်မြေအတွင်းရှိ ကျေးရွာများကို စစ်ကော်မရှင်တပ်က လေကြောင်းနှင့် ဒရုန်းများအသုံးပြုကာ ဗုံးကြဲတိုက်ခိုက်ခဲ့သဖြင့် ၆ နှစ်အရွယ် ကလေးငယ်နှစ်ဦးအပါအဝင် အရပ်သား ၈ ဦး သေဆုံးပြီး ၁၇ ဦး ထိခိုက်ဒဏ်ရာရရှိခဲ့ကြောင်း ကရင်ငြိမ်းချမ်းရေး အထောက်အကူပြုကွန်ရက် (KPSN) က ထုတ်ပြန်သည်။
ပြီးခဲ့သည့် မတ်လ ၁၁ ရက်နေ့က ပဲခူးတိုင်း၊ ရွှေကျင် (ဆောထိ) မြို့နယ်ရှိ အောပလား (အင်းဗလ) ကျေးရွာကို စစ်ကော်မရှင်တပ် ခလရ (၂၀) က ပါရာမော်တာ (Paramotor) ဒရုန်းများဖြင့် ဗုံး ၃ လုံး ကြဲချတိုက်ခိုက်ခဲ့ခြင်းဖြစ်သည်။
အဆိုပါ တိုက်ခိုက်မှုကြောင့် အသက် ၆ နှစ်အရွယ် မိန်းကလေးငယ်တစ်ဦး၊ ၆ နှစ်အရွယ် ယောကျ်ားလေးငယ်တစ်ဦးနှင့် အသက် ၂၈ နှစ်မှ ၄၅ နှစ်ကြားရှိ အမျိုးသမီး ၄ ဦး၊ စုစုပေါင်း ၆ ဦး နေရာတွင်ပင် ပွဲချင်းပြီး သေဆုံးခဲ့ရသည်။
ထို့ပြင် အရပ်သား ၄ ဦး ပြင်းထန်ဒဏ်ရာရရှိခဲ့ပြီး နေအိမ်တစ်လုံးလည်း ပျက်စီးခဲ့ကြောင်း သိရသည်။
အလားတူ အဆိုပါနေ့၌ပင် ကရင်ပြည်နယ်၊ ဖာပွန် (မုတြော်) ခရိုင်အတွင်းရှိ မလေးလားကျေးရွာကိုလည်း စစ်ကော်မရှင်တပ်၏ ဂျက်တိုက်လေယာဉ်တစ်စီးက ဗုံး ၁၅ လုံးထက်မနည်း ကြဲချတိုက်ခိုက်ခဲ့သဖြင့် အမျိုးသား ၂ ဦး သေဆုံးကာ ၁၃ ဦး ထိခိုက်ဒဏ်ရာရရှိခဲ့သည်။
ယင်းတိုက်ခိုက်မှုကြောင့် ဒေသခံများ၏ နေအိမ် ၉ လုံးလည်း မီးလောင်ပျက်စီးခဲ့ရကြောင်း KPSN ၏ ထုတ်ပြန်ချက်တွင် ဖော်ပြထားသည်။
စစ်ကော်မရှင်တပ်သည် စစ်ရေးနှင့်မသက်ဆိုင်သော လူနေကျေးရွာများကို ပစ်မှတ်ထားတိုက်ခိုက်နေခြင်းမှာ အာဆီယံ၏ ဘုံသဘောတူညီချက် ၅ ချက်ပါ “အကြမ်းဖက်မှုများ ချက်ချင်းရပ်တန့်ရေး” ကို ပြောင်ပြောင်တင်းတင်း ချိုးဖောက်နေခြင်းဖြစ်ကြောင်း KNU က ဝေဖန်သည်။
ယခုကဲ့သို့ အရပ်သားများအပေါ် ကျူးလွန်နေသည့် အကြမ်းဖက်မှုများ ရပ်တန့်စေရန်အတွက် နိုင်ငံတကာအနေဖြင့် စစ်ကော်မရှင်အပေါ် အမြန်ဆုံးနှင့် အပြင်းထန်ဆုံး ပြိုင်တူဖိအားပေးရန် ကရင်အမျိုးသားအစည်းအရုံး (KNU) က တိုက်တွန်းထားသည်။
ဓာတ်ပုံ – KPSN
#လေကြောင်းတိုက်ခိုက်ခံရမှု #ရွှေကျင် #ဖာပွန် #ကလေးငယ်များ #ThanLwinKhetNews
