တရားမဝင်အွန်လိုင်းလောင်းကစားဂိမ်းများ အရေးယူမှု နည်းပါး
*******
သံလွင်ခက်
မေ ၁၆၊ ၂၀၂၄။
မြန်မာနိုင်ငံတွင် အွန်လိုင်းကတဆင့် လောင်းကစားပြုလုပ်နိုင်သော တရားမဝင် အွန်လိုင်းဂိမ်းဝဘ်ဆိုက်နှင့် ကစားနည်းများ တွင်ကျယ်လာနေပြီး အဆိုပါဝဘ်ဆိုက်များအား အရေးယူမှုနည်းပါးနေသည်ဟု ဥပဒေပညာရှင်များက ပြောသည်။
စစ်တပ်အာဏာသိမ်းပြီးနောက်ပိုင်း ငါးပစ်ဂိမ်း၊ စလော့ဂိမ်း၊ ရှမ်းကိုးမီး စသည့် လောင်းကစားနည်းများနှင့် ဘောလုံးပွဲ၊ နှစ်လုံးထီ၊ သုံးလုံးထီ စသည်တို့အား အွန်လိုင်းကတဆင့် အလွယ်တကူ ဆော့ကစားနိုင်သော ဝဘ်ဆိုက်များ ပိုမိုများပြားလာသည်။
စစ်ကောင်စီက အွန်လိုင်းလောင်းကစားနည်းများအား အရေးယူမည်ဟု နိုင်ငံပိုင်မီဒီယာနှင့် သတင်းစာများကတဆင့် ကြေညာခဲ့သော်လည်း လက်တွေ့မှာတော့ အရေးယူမှု မရှိသလောက်နည်းပါးသည်ဟု ဥပဒေပညာရှင်တွေက ထောက်ပြပြောဆိုနေကြသည်။
“ဒီလို အမှုတွေက နိုင်ငံတော်က ဘတ်ဂျက်စိုက်ထုတ်ပြီး ဖိဖိစီးစီးကိုင်တွယ်ဖို့လိုတယ်။ နည်းပညာအလုပ်တွေဆိုတော့လေ။ အဲလို ငွေကြေးမစိုက်ထုတ်တဲ့အတွက် မဖမ်း ဆီးနိုင်တာလို့ထင်တယ်။ ပြီးတော့ မှုခင်းဖော်ထုတ်တဲ့ ရဲတွေကလည်း အားနည်းတယ်။ လောင်းကစားမှုတွေမှာ အာဏာရှိတဲ့သူတွေ ကိုယ်တိုင်ပါဝင်ပတ်သက်နေတာတွေ ရှိတဲ့အတွက် အရေးယူမှုအပိုင်းမှာအားနည်းတယ်” ဟု စီဒီအမ် တရားသူကြီးဖြစ်သူ ဒေါ်သင်ဇာမြက ဆိုသည်။
အွန်လိုင်းလောင်းကစားနည်းများအား အများအားဖြင့် လူငယ်နှင့်လူလတ်ပိုင်းတွေက ကစားလေ့ရှိကြသည်။
လူငယ်များ ကစားချင်စိတ်ဖြစ်လာစေရန်အတွက် Facebook လူမှုကွန်ရက်တွင် လူကြိုက်များသော Page များနှင့် ထင်ပေါ် ကျော်ကြားသူများအားမြန်မာငွေ သိန်းဆယ်ဂဏန်းအထိပေးပြီး ကြေညာလေ့ရှိနေသည်။
အဆိုပါဂိမ်းကစားနည်းများအား ကစားလေ့ရှိသူ လူအများစုကတော့ များသောအားဖြင့် အရှုံးပေါ်လေ့ရှိသည်ဟု ကစားဖူးတဲ့သူအများစုက ဆိုသည်။
“ ကျွန်တော်ဆို တစ်ညထဲနဲ့ ၇သိန်းကုန်သွားတယ်။ မိုး လင်းတော့ မကျေနပ်လို့ထပ်ဆော့တာ ၈ သိန်း ထပ်ကုန်တယ်။ စီးနေတဲ့ ဆိုင်ကယ်ပါရောင်းထုတ်လိုက်ရတယ်” ဟုစလော့ဂိမ်းကစားရင်း အရှုံးပေါ်ခဲ့သူ လူငယ် ၁ ဦးက
ဆိုသည်။
မြန်မာနိုင်ငံတွင် 1xbet ၊ Ubett ၊ Sbotop စသည့် နာမည် ကြီးလောင်းကစားဂိမ်းဝဘ်ဆိုက်များအပါအဝင် ဂိမ်းဝဘ်ဆိုက်ပေါင်းများစွာရှိနေပြီး KBZ Pay ၊ Wavemoney ၊ AYA Pay စသည့် အွန်လိုင်းငွေပေးချေမှုစနစ်တွေကတဆင့် အလွယ်တကူငွေသွင်းငွေထုတ်ပြုလုပ်ပြီး ကစားနိုင်သည့်အပြင် အဲဒီ ဝဘ်ဆိုက်များက ကိုယ်စားလှယ်အဖြစ်ထားရှိသော အေးဂျင့်များထံတွင်လည်း အလွယ်တကူ ကစားနိုင်သည်ဟု သိရသည်။
ဓာတ်ပုံ – Facebook
ပုံစာ – အွန်လိုင်းလောင်းကစား ဂိမ်းကြော်ငြာတစ်ခု
