ကရင်နီပြည်မြို့သိမ်းတိုက်ပွဲများ၌ စစ်ကောင်စီတပ်အထိနာသည့် သတင်းနှင့်အတူ လေကြောင်းတိုက်ခိုက်မှုဆက်တိုက်ပြုလုပ်နေ
**************************************
သံလွင်ခက်
နိုဝင်ဘာ ၁၁ ၊ ၂၀၂၃ ။
လွိုင်ကော်မြို့အပါအဝင် ကရင်နီပြည်တွင် ဖြစ်ပွားနေသည့်တိုက်ပွဲများအတွင်း၌ စစ်ကောင်စီဘက်က ထိခိုက်သေဆုံးမှုများပြီး အရှင်ဖမ်းဆီးရမိသည့် သတင်းများထွက်ပေါ်လာနေမှုနှင့်အတူ လေကြောင်းကနေတိုက်ခိုက်မှုများကိုလည်း စစ်ကောင်စီဘက်က ဆက်တိုက်ပြုလုပ်နေသည်ဟု ဒေသခံများထံမှ သိရသည် ။
လေယာဥ်များပတ်ဝဲပျံနေပြီး ပစ်ခတ်၊ ဗုံးကြဲမှုများလည်းမကြာမကြာရှိနေသည်ဟု တိုက်ပွဲဖြစ်ပွားရာ
ထေးငှားလျားရပ်ကွက်အနီးတွင် နေထိုင်သည့် ဒေသခံအမျိုးသမီးတစ်ဦး ကပြောသည် ။
” အခုလည်းလေယာဥ်ဗုံးကြဲတယ် ။ စက်သေနတ်တွေနဲ့ပစ်တယ် ။ မနက်ကလည်း သုံးကြိမ်လောက်ရှိတယ်။ အပြင်လည်း ထွက်မရတော့ ဘယ်နေရာလည်း မသိရဘူး ။ နီးတယ်အသံတော့တော်တော်ကျယ်တယ် ။ အိမ်ဘေးနည်းနည်းလောက်မှာလည်း လက်နက်ကြီး သုံးခါကျတယ် “ဟု ၎င်းက နေ့လည် ၂ နာရီခွဲခန့်တွင်ပြောသည် ။
ထေးငှားလျားရပ်ကွက်နှင့် ရေယိုကျေးရွားကြားရှိ စစ်ကောင်စီဂိတ်ကိုလည်း ပူးပေါင်းတပ်များက တိုက်ခိုက်ခဲ့ရာ လက်နက်ကြီးပစ်ခတ်မှုနှင့် လေကြောင်းမှ တိုက်ခိုက်မှုများကြောင့် ရေယိုသီလရှင်ကျောင်း ထိခိုက်ပျက်စီးခဲ့သည်ဟု ဒေသခံများထံမှ သိရသည် ။
” တချို့ထိခိုက်တာတွေရှိတယ် ။ သေတယ်လည်း ပြောသံကြားနေကြတယ် ။ အပြင်ထွက်လို့မရတော့ အတိအကျမသိရဘူး “ဟု ထေးငှားလျားရပ်ကွက်မှ ဒေသခံ အမျိုးသမီးကပြောသည် ။
လွိုင်ကော်မြို့ပေါ်ရှိ စစ်ကောင်စီတပ်စခန်းများ၊ တပ်စွဲထားသည့်နေရာများနှင့် ဂိတ်များကို တော်လှန်ရေးပူးပေါင်းတပ်များ ထိုးစစ်ဆင်တိုက်ခိုက်နေရာ ယနေ့ နေ့လည် ၁၂ နာရီမှစ၍ အပြင်မထွက်ကြရန် မာရှယ်လောထုတ်ပြန်ထားသောကြောင့် လွိုင်ကော်မြို့ပေါ်၌ အသွားအလာရှင်းနေသည်။
” ညီမတို့ရပ်ကွက်ကတော့ မာရှလောဆိုတော့ အိမ်မှာပဲကိုယ်စီနေနေကျတယ်။ ပုံမှန်ပါပဲရှင့် ။ ၁၂ ကနေ
စ ထုတ်တယ်ပြောနေကြတယ် ။ လိုင်းမှာလည်း တင်ထားတာတွေ့မိတယ် ။ အသေအချာလိုက်ကြေငြာတာတော့မရှိသေးဘူး “ဟု လောဓမ္မရပ်ကွက် ဒေသခံကပြောသည် ။
ယနေ့တွင် ဖော်ဆောင်နေသည့် တိုက်ပွဲ အခြေအနေများနှင့်ပတ်သက်၍လည်း ကရင်နီအမျိုးသားများကာကွယ်ရေးတပ် KNDF က လွိုင်ကော် – ဒီးမော့ဆို ၊ လွိုင်ကော်- မိုးဗြဲ ၊ လွိုင်ကော်- ဆီဆိုင် လမ်းမကြီးများအားအသုံးပြု၍ အသွားအလာမပြုလုပ်ကြရန် ယနေ့နံနက်ပိုင်း၌ သတိပေး ထုတ်ပြန်ထားသည် ။
အဆိုပါလမ်းကြောင်း နေရာများအနီးတစ်ဝိုက်တွင်
ယနေ့ နိုဝင်ဘာလ ၁၁ရက် မှစ၍ စစ်ကောင်စီတပ်ဖွဲ့များနှင့် ကရင်နီတော်လှန်ရေးတပ်ပေါင်းစုများအကြား ထိတွေ့တိုက်ပွဲများ ဖြစ်ပွားနေသောကြောင့် အများပြည်သူများအနေဖြင့် ခရီးသွားလာခြင်း နှင့် နေအိမ်ပြင်ပထွက်၍ သွားလာခြင်းများအား မလိုအပ်လျှင် မပြုလုပ်ကြဘဲ လုံခြုံသောနေရာများတွင်သာ နေထိုင်ကြပါရန် KNDFက အထူးတိုက်တွန်း ဖော်ပြထားသည် ။
ကရင်နီပြည်တွင် လွိုင်ကော်မြို့အပါအဝင် မိုးဗြဲ ၊ နန်းမယ်ခုံ နှင့် ဖယ်ခုံမြို့များတွင်လည်း ယနေ့နံနက်အစောပိုင်းကတည်းက တချိန်တည်း တိုက်ပွဲများဖြစ်ပွားနေခဲ့သည်ဟု ဒေသခံများထံမှ သိရသည် ။
ပုံစာ-ယနေ့ နံနက်အစောပိုင်းမှစ၍ တိုက်ပွဲများဖြစ်ပွားနေသည့် လွိုင်ကော်မြို့၌ အသွားအလာများရှင်းလင်းနေမှု ။
ဓာတ်ပုံ-Jobs For Kayah
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2375
YouTube- > https://youtu.be/SpxIBpTYop8
Website -> https://thanlwinkhet.net/?p=6171
