သံလွင်ခက်
ဇွန် ၁၆ ၊ ၂၀၂၃ ။
ကရင်နီစစ်ဘေးရှောင်များ ထွက်ပြေးရှောင်တိမ်းလာသည့် လမ်းကြောင်းများကို ထိုင်းနိုင်ငံဘက်က ပိတ်လိုက်သောကြောင့် ထိုင်း–ကရင်နီနယ်စပ်တစ်လျောက်၌ ကျန်ရှိနေသေးသည့် စစ်ရှောင် ၃၀၀၀ ကျော်အတွက် ကူညီမှုများသွားရောက်ပေးအပ်ရန် အခက်အခဲများဖြစ်နေသည်ဟု သိရသည်။
ထိုင်း–မြန်မာနယ်စပ် ၊ ကရင်နီပြည်၊ မယ်စဲ့မြို့နယ်တွင် ပြီးခဲ့သည့်ရက်ပိုင်း ဇွန် ၁၃ရက်တွင် တိုက်ပွဲဖြစ်ပွားပြီး စစ်ကောင်စီတပ်က လက်နက်ကြီးပစ်ခတ်မှုနှင့် လေကြောင်းမှ ဗုံးကြဲ၊ပစ်ခတ်တိုက်ခိုက်မှုများဆက်တိုက်ပြုလုပ်နေသောကြောင့် မယ်စဲ့မြို့ပေါ်နှင့်အနီးနားကျေးရွာများရှိ ကရင်နီဒေသခံများက ဘေးလွတ်ရာ ထိုင်းနိုင်ငံဘက်ကိုထွက်ပြေးရှောင်တိမ်းကြခြင်းဖြစ်သည်။
ထိုင်းနိုင်ငံဘက်ရောက်ရှိလာသည့် ကရင်နီစစ်ဘေးရှောင်များမှာ ၄၀၀၀ ကျော်ရှိနေပြီး ထိုင်းနိုင်ငံဘက်ကလမ်းကြောင်းများကို ယနေ့နံနက်ပိုင်းတွင်ပိတ်လိုက်သည့်အတွက် မြန်မာနယ်စပ်ဘက်ခြမ်း၌ ကျန်ရှိနေသည့် စစ်ရှောင်များအတွက် လုံခြုံရေး စိုးရိမ်ရသလို ကူညီပေးရေးလမ်းနည်းများကို ထပ်မံရှာဖွေရတော့မည်ဟု ကရင်နီအမျိုးသမီးအစည်းအရုံး အတွင်းရေးမှူး – ၂ မော်ဖရေမြာက သံလွင်ခက်ကိုပြောသည်။
” စစ်ကောင်စီဘက်က လေယာဥ်တွေနဲ့လာချတော့ အရမ်းကြောက်ပြီး တစ်ဖက်ထိုင်းနိုင်ငံကိုကူးလာတဲ့ စစ်ရှောင်တွေရှိသလို တချို့ကလည်း လာမမီပဲနဲ့ပြည်တွင်းနယ်စပ်ဘက်မှာ ကျန်နေတာရှိတယ်ပေါ့နော်။ ထိုင်းဘက်က ပိတ်ထားတော့ သူတို့ဖြတ်လာလို့မရတော့ဘူး ။ ထိုင်းနယ်စပ်ဘက်ထိရှောင်လာတာက လူဦးရေက ၄၀၀၀ ကျော်ကျော်ရှိတယ်ပေါ့။ ထိုင်းဘက်က နေရာအတွက် လက်ခံပေးတယ်ဆိုပေမယ့် ဘယ်လောက်ထိလက်ခံပေးနိုင်ပြီးတော့မှဘယ်အချိန် ပြန်ပို့မလဲဆိုတာက စိုးရိမ်တယ်ပေါ့နော် “ဟု ၎င်းကပြောသည် ။
ပြည်တွင်းနယ်စပ်ဘက်ခြမ်းတွင်ကျန်နေခဲ့သည့် စစ်ရှောင်များကို ကရင်နီအမျိုးသမီးအစည်းအရုံး KNWOကယမန်နေ့တွင်သွားရောက်ကူညီမှုများပေခဲ့ပြီး ယနေ့နံနက်ပိုင်းတွင် လမ်းကြောင်းများပိတ်လိုက်သည့်အတွက် လုံခြုံစိတ်ချသော လမ်းကြောင်းများရှာဖွေနေရကာ စစ်ရှောင်များမှာလည်း ရက်ပိုင်းအတွင်းအကူအညီများ မရောက်နိုင်လျှင် စားနပ်ရိက္ခာများပြတ်လပ်နိုင်သည်ဟု ၎င်းကဆက်လက်ပြောကြားသည်။
ထိုင်းနိုင်ငံဘက်နှင့် ပြည်တွင်းနယ်စပ်တို့၌ရှိနေသည့် ကရင်နီစစ်ဘေးရှောင် ၇၀၀၀ ကျော်အတွက် တဲများ၊ အမိုး၊အကာ ၊ အခင်း ၊ စားနပ်ရိက္ခာ၊ အမျိုးသမီးနှင့် ကလေးအသုံးအဆောင်ပစ္စည်းများ နှင့် သက်ကြီးရွယ်အိုများအတွက် ကျန်းမာရေးစောင့်ရှောက်မှုများ အရေးပေါ်လိုအပ်နေသည်ဟု ကူညီပေးနေသူများထံမှ သိရသည်။
လက်ရှိတွင်စစ်ကောင်စီတပ်က မယ်စဲ့မြို့နယ်အပြင် မယ်စဲ့နှင့်တစ်ဆက်တည်း ဖားဆောင်းမြို့နယ်ကိုပါလက်နက်ကြီးနှင့်လေကြောင်းတိုက်ခိုက်မှုများ ပြုလုပ်နေသည်ဟု ကရင်နီစစ်ဘက်ဆိုင်ရာဗဟိုသတင်းထုတ်ပြန်ရေးအဖွဲ့ တာဝန်ရှိသူ ခူညေးရယ်က သံလွင်ခက်ကိုပြောသည်။
မယ့်စဲ့မြို့တွင် ဒီးမော့ဆို ၊ ဖရိူဆို ၊ လွိုင်ကော်မြို့နယ်ဘက်မှပြောင်းရွေ့လာသည့်စစ်ဘေးရှောင်များအပါအဝင်ကရင်နီဒေသခံ ၉၀၀၀ ခန့်ရှိပြီး လက်ရှိထိုင်းနိုင်ငံဘက် ထွက်ပြေးနေရသူများတွင် စစ်ကောင်စီ၏ ပညာရေး၊ကျန်းမာရေးနှင့် အထွေထွေအုပ်ချုပ်ရေး ဝန်ထမ်းများလည်းပါဝင်နေသည်ဟု သိရသည်။
ပြီးခဲ့သည့်ရက်ပိုင်း ဇွန်လ ၁၃ရက်တွင် မယ်စဲ့မြို့မရဲစခန်းနှင့် စစ်ကောင်စီနယ်စပ်ဂိတ်စခန်းသုံးခုကို ကရင်နီပူးပေါင်းတပ်များက တိုက်ခိုက်သိမ်းပိုက်ခဲ့ပြီးနောက် စစ်ကောင်စီတပ်က လေကြောင်းနှင့်လက်နက်ကြီးပစ်ခတ်မှုများကို ဆက်တိုက်ပြုလုပ်နေခြင်းဖြစ်သည်။
ပုံစာ–မယ်စဲ့မြို့နယ်အတွင်းမှ ထွက်ပြေးရှောင်တိမ်းလာကြရသည့် ကရင်နီစစ်ဘေးရှောင်များ ။
*********************************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1450
YouTube -> https://youtu.be/9ijGcDu-6fE
Website -> https://thanlwinkhet.net/?p=5127
Website ->https://eng.thanlwinkhet.net
