သံလွင်ခက်/မတ် ၂၆
အီရန်အစိုးရသည် သမ္မတထရမ့်၏ ငြိမ်းချမ်းရေးအဆိုပြုချက်ကို ပယ်ချကာ တန်ပြန်တောင်းဆိုချက် ၅ ရပ်ကို တင်ပြခဲ့ကြောင်း အီရန်နိုင်ငံပိုင် Press TV သတင်းဌာနက ဖော်ပြသည်။
အဆိုပါ တောင်းဆိုချက်များတွင် အီရန်အပေါ် နောက်ထပ်တိုက်ခိုက်မှုများ မပြုလုပ်ရန် အာမခံချက်ပေးရေး၊ စစ်လျော်ကြေးပေးရေးနှင့် ကမ္ဘာ့ရေနံလမ်းကြောင်းအတွက် အရေးပါသည့် ဟော်မုဇ် ရေလက်ကြားအပေါ် အီရန်၏ အချုပ်အခြာအာဏာကို အသိအမှတ်ပြုရေးတို့ ပါဝင်သည်။
အမေရိကန်၏ အဆိုပြုချက်ကို ပါကစ္စတန်နိုင်ငံမှတစ်ဆင့် အီရန်ထံ ပေးပို့ခဲ့ခြင်းဖြစ်ကြောင်း သိရသည်။ New York Times ၏ ဖော်ပြချက်အရ အမေရိကန်၏ အစီအစဉ်တွင် အီရန်အနေဖြင့် နျူကလီးယားလက်နက် ထုတ်လုပ်ရန် ကြိုးပမ်းမှုကို အပြီးတိုင် စွန့်လွှတ်ရန်နှင့် ရှိရင်းစွဲ နျူကလီးယား စွမ်းဆောင်ရည်များကို ဖျက်သိမ်းရန် ပါဝင်သည်။
သို့သော်လည်း အိမ်ဖြူတော် ပြောရေးဆိုခွင့်ရှိသူ ကာရိုလိုင်း လဲဗစ်က ဆွေးနွေးမှုများ ဆက်လက်ရှိနေပြီး အပြုသဘောဆောင်ကြောင်း ပြောကြားခဲ့သည်။
အီရန်နိုင်ငံခြားရေးဝန်ကြီး အဘတ်စ် အာရက်ချီကမူ “ကျွန်တော်တို့ အပစ်အခတ်ရပ်စဲရေးကို မလိုချင်ဘူး၊ စစ်ပွဲကို ကျွန်တော်တို့ သတ်မှတ်တဲ့ စည်းကမ်းချက်တွေအတိုင်း အပြီးတိုင် အဆုံးသတ်ချင်တာ” ဟု ပြောဆိုခဲ့ပြီး အီရန်ပြည်သူများ ခံစားခဲ့ရသည့် နစ်နာမှုများအတွက် လျော်ကြေးပေးရန် အလေးပေး ပြောကြားခဲ့သည်။
အမေရိကန် တပ်အင်အား တိုးချဲ့ချထားမှု
အမေရိကန် အစိုးရသည် အမှတ် (၈၂) လေထီးတပ်မမှ တပ်ဖွဲ့ဝင် ၃,၀၀၀ ခန့်ကို အရှေ့အလယ်ပိုင်းသို့ စေလွှတ်ရန် အမိန့်ထုတ်ပြန်ထားသည်။ ယခင်စေလွှတ်ထားသည့် ရေတပ်တပ်ဖွဲ့ဝင်များနှင့်ပေါင်းပါက ဒေသတွင်းရှိ အီရန်နှင့် နီးကပ်သောနေရာများတွင် အမေရိကန် ကြည်းတပ်အင်အား ၈,၀၀၀ ခန့်အထိ ရှိလာမည်ဖြစ်သည်။
သမ္မတထရမ့်က မြေပြင်တပ်ဖွဲ့ဝင်များ တိုက်ရိုက်ဝင်ရောက်တိုက်ခိုက်ရန် အစီအစဉ်မရှိဟု ပြောဆိုထားသော်လည်း လုံးဝဖြစ်နိုင်ခြေမရှိဟုမူ ငြင်းဆိုထားခြင်း မရှိပေ။
ဟော်မုဇ် ရေလက်ကြား ပိတ်ဆို့မှုနှင့် ကမ္ဘာ့စီးပွားရေး ရိုက်ခတ်မှုအီရန်သည် ကမ္ဘာ့ရေနံလိုအပ်ချက်၏ ၂၀ ရာခိုင်နှုန်းခန့် ဖြတ်သန်းရာ ဟော်မုရေလက်ကြားကို ဖေဖော်ဝါရီ ၂၈ ရက်ကတည်းက ပိတ်ဆို့ထားသည်။
အမေရိကန်နှင့် အစ္စရေးတို့၏ လေကြောင်းတိုက်ခိုက်မှုကို တုံ့ပြန်အနေဖြင့် ယခုကဲ့သို့ ပိတ်ဆို့ခြင်းဖြစ်ပြီး ၎င်းတို့နှင့် ရန်ဘက်ဖြစ်သော နိုင်ငံများမှ သင်္ဘောများ ဖြတ်သန်းခွင့်ကို တားမြစ်ထားသည်။
ယင်းကြောင့် ကမ္ဘာ့လောင်စာဆီဈေးနှုန်းများ မြင့်တက်လာပြီး စွမ်းအင်လုံခြုံရေးဆိုင်ရာ အကျပ်အတည်းများ ဖြစ်ပေါ်နေသည်။
လေဘနွန်စစ်မျက်နှာနှင့် အစ္စရေး၏ စစ်ရာဇဝတ်
အစ္စရေး၏ လေကြောင်းတိုက်ခိုက်မှုများကြောင့် လေဘနွန်နိုင်ငံတွင် တစ်ညတည်း၌ပင် လူပေါင်း ၃၃ ဦးထက်မနည်း သေဆုံးခဲ့သည်။
ယခုလအတွင်း အစ္စရေး၏ စစ်ဆင်ရေးကြောင့် လေဘနွန်တွင် လူ ၁,၀၀၀ ကျော် သေဆုံးပြီး လူဦးရေ ၁ သန်းကျော် အိုးအိမ်စွန့်ခွာ ထွက်ပြေးနေရသည်။
အစ္စရေး ကာကွယ်ရေးဝန်ကြီးက လေဘနွန်တောင်ပိုင်းရှိ နယ်မြေအချို့ကို ဆက်လက်ထိန်းချုပ်ထားမည်ဟု ခြိမ်းခြောက်ထားပြီး Human Rights Watch ကမူ အစ္စရေး၏ လုပ်ရပ်များသည် စစ်ရာဇဝတ်မှု မြောက်နိုင်သတိပေးထားသည်။
ဒေသတွင်း စီးပွားရေး ဆုံးရှုံးမှုများ
ကုလသမဂ္ဂ၏ ခန့်မှန်းချက်အရ လက်ရှိစစ်ပွဲကြောင့် အာရပ်ဒေသတွင်း စီးပွားရေးအရ ဒေါ်လာ ၆၃ ဘီလီယံခန့် ဆုံးရှုံးခဲ့ပြီဖြစ်သည်။
ကူဝိတ်လေဆိပ်ရှိ လောင်စာဆီသိုလှောင်ကန်များ ဒရုန်းဖြင့် တိုက်ခိုက်ခံရသကဲ့သို့ ဆော်ဒီအာရေးဗီးယားရှိ ရေနံထွက်ရာ ဒေသများသို့လည်း အီရန်၏ ဒရုန်းနှင့် ဒုံးကျည်များဖြင့် ပစ်မှတ်ထားခြင်း ခံနေရသည်။
တစ်ချိန်တည်းမှာပင် အီရတ်နိုင်ငံအတွင်းရှိ အီရန်ကျောထောက်နောက်ခံပြု လက်နက်ကိုင် စခန်းများကို အမေရိကန်နှင့် အစ္စရေးတို့က တိုက်ခိုက်နေပြီး အီရတ်အစိုးရကမူ ၎င်းတို့၏ အချုပ်အခြာအာဏာကို ထိပါးခြင်းဖြစ်သည်ဟုဆိုကာ ကန့်ကွက်ထားသည်။
ဒေသတွင်း၌ စစ်မီးမှာ နိုင်ငံအများအပြားသို့ ကူးစက်ပြန့်နှံ့နေပြီး ငြိမ်းချမ်းရေးဆွေးနွေးမှုများမှာလည်း ရှေ့မတိုးနိုင်ဘဲ ရှိနေသည်။
REF: NPR
