သံလွင်ခက်/မတ်၂၅။ ဓာတ်ပုံ – JFM
အာဏာသိမ်း စစ်အုပ်စုခေါင်းဆောင် မင်းအောင်လှိုင်၏ မိသားစုသည် ထိုင်းနိုင်ငံ၊ ဘန်ကောက်မြို့ရှိ Issara Residence Rama 9 အိမ်ရာစီမံကိန်းတွင် ဘတ် ၉၈ သန်း (အမေရိကန်ဒေါ်လာ ၃ သန်းနီးပါး) တန်ဖိုးရှိ ဇိမ်ခံအိမ်ရာတစ်လုံးကို ဝယ်ယူထားကြောင်း Justice For Myanmar (JFM) က ထုတ်ဖော်လိုက်သည်။
အဆိုပါ ဝယ်ယူမှုကို မင်းအောင်လှိုင်၏ အာဏာသိမ်းကြိုးပမ်းမှု ဒုတိယနှစ်ဖြစ်သော ၂၀၂၂ ခုနှစ်အတွင်း လုပ်ဆောင်ခဲ့ခြင်းဖြစ်သည်။
ထိုအချိန်သည် မြန်မာနိုင်ငံတစ်ဝန်းရှိ ပြည်သူလူထုအပေါ် လေကြောင်းမှ ဗုံးကြဲတိုက်ခိုက်မှုများ၊ အစုလိုက်အပြုံလိုက် သတ်ဖြတ်မှုများနှင့် အကြမ်းဖက်မှုများကို အရှိန်အဟုန်မြှင့် ကျူးလွန်နေချိန်လည်း ဖြစ်သည်။
JFM ၏ အစီရင်ခံစာအရ အဆိုပါအိမ်ရာကို ဝယ်ယူသူ၏ အချက်အလက်များ ဖုံးကွယ်ရန်နှင့် နိုင်ငံခြားသား မြေပိုင်ဆိုင်ခွင့် တားမြစ်ထားသည့် ထိုင်းဥပဒေကို ရှောင်ရှားရန်အတွက် Emerald Princess Company Limited ဟုခေါ်သော ကြားခံရုပ်ပြကုမ္ပဏီတစ်ခုကို အသုံးပြုခဲ့ကြောင်း သိရသည်။
ယင်းဝယ်ယူမှုကို မည်သည့်နိုင်ငံ၏ ဒဏ်ခတ်ပိတ်ဆို့မှုမျှ မခံရသေးသည့် မင်းအောင်လှိုင်၏ ချွေးမဖြစ်သူ မျိုးရတနာထိုက် က အမည်ခံကာ ညှိနှိုင်းလုပ်ဆောင်ခဲ့ခြင်းဖြစ်သည်။
ထို့ပြင် စစ်အုပ်စုခရိုနီ ထွန်းမင်းလတ် သည် မင်းအောင်လှိုင်မိသားစုကိုယ်စား အဆိုပါအရောင်းအဝယ်ကို ညှိနှိုင်းပေးခဲ့သူဖြစ်ပြီး၊ ၂၀၁၇ ခုနှစ်ကလည်း မင်းအောင်လှိုင်၏သားဖြစ်သူ အောင်ပြည့်စုံအတွက် Belle Grand Rama 9 တွင် တိုက်ခန်းတစ်ခန်း ဝယ်ယူနိုင်ရန် ကူညီပေးခဲ့ဖူးကြောင်း အစီရင်ခံစာတွင် ဖော်ပြထားသည်။
“စစ်ရာဇဝတ်ကောင် မင်းအောင်လှိုင်က မြန်မာပြည်သူတွေအပေါ် အကြမ်းဖက်နေချိန်မှာ သူ့မိသားစုက မတရားရထားတဲ့ ငွေတွေနဲ့ ထိုင်းမှာ လာရင်းနှီးမြှုပ်နှံတာဟာ ရွံရှာစက်ဆုပ်ဖွယ် ကောင်းပါတယ်”ဟု JFM ပြောရေးဆိုခွင့်ရှိသူ မရတနာမောင်က ပြောဆိုထားသည်။
Justice For Myanmar က ထိုင်းအာဏာပိုင်များအနေဖြင့် ယင်းအိမ်ရာဝယ်ယူမှုတွင် အသုံးပြုခဲ့သော ငွေကြေးများသည် အဂတိလိုက်စားမှုမှ ရရှိလာခြင်းဖြစ်နိုင်သဖြင့် ငွေကြေးခဝါချမှု တိုက်ဖျက်ရေးဥပဒေများအရ ချက်ချင်းစုံစမ်းစစ်ဆေးရန်၊ တရားစွဲဆိုရန်နှင့် ပိုင်ဆိုင်မှုများကို သိမ်းဆည်းရန် တောင်းဆိုထားသည်။
#မင်းအောင်လှိုင်မိသားစု #ဘန်ကောက် #ဘတ် ၉၈ သန်းတန် ဇိမ်ခံအိမ်ရာ #ဝယ်ယူ #ThanLwinKhetNews
