ယနေ့ မြန်မာသင်္ကြန်အတက်နေ့တွင် ကရင်ပြည်နယ်၊ ကော့ကရိတ်မြို့နယ်၊ မြောက်ကမ္မရိုက်ကျေးရွာကို အာဏာသိမ်းစစ်တပ်က လေယာဉ်ဖြင့် ဗုံးကြဲတိုက်ခိုက်ရာ ကိုယ်ဝန်ဆောင်အမျိုးသမီးတစ်ဦး သေဆုံးခဲ့ရသည်ဟု မွန်ပြည်လွတ်မြောက်ရေးတပ်တော်(MLA)က သတင်းထုတ်ပြန်ခဲ့သည်။
စစ်ကောင်စီတပ်သည် Y-12 လေယာဉ်အမျိုးအစားဖြင့် မွန်းလွဲ ၁၂ နာရီ ၄၀ မိနစ်အချိန်တွင် မြောက်ကမ္မရိုက်ရွာသို့ ဗုံးကြဲခဲ့သဖြင့် အသက် ၃၇ နှစ်အရွယ် ကိုယ်ဝန်ဆောင်နေရသော မနှင်းဦးသေဆုံးခဲ့ရသည်ဟု ဖော်ပြထားသည်။
ထိုအပြင် ဒေသခံများဖြစ်သော အသက် ၇နှစ်အရွယ် သဲပိုးလေး၊ အသက် ၉ နှစ်အရွယ် မသဲမြတ်နိုးအပါအဝင် ပြည်သူလေးဦး ထိခိုက်ဒဏ်ရာရရှိခဲ့သည်ဟု ထုတ်ပြန်ချက်တွင် ဖော်ပြထားသည်။
၎င်းအချက်အလက်များသည် မြေပြင်ရှိ တပ်မှူးများမှ ပေးပို့ထားသည်ဖြစ်ပြီး စစ်ကောင်စီမှ လက်နက်ကြီး၊ လေယာဉ်များဖြင့် ဆက်လက်တိုက်ခိုက်နေဆဲဖြစ်သောကြောင့် ပြည်သူများအနေဖြင့် စစ်ရေးသတင်းများကို နားစွင့်ကာ ဂရုတစိုက်နေထိုင်ပေးကြပါရန် မေတ္တာရပ်ခံသတိပေးအပ်သည်ဟု MLA က ထုတ်ပြန်ထားသည်။
ဧပြီလ ၁၅ သင်္ကြန်အတက်နေ့ မွန်းလွဲပိုင်းတွင်လည်း စစ်ကောင်စီတပ်က ကော့ကရိတ်မြို့နယ်၊ ကျုံဒိုးမြို့၊ ကမ်းနီစံပြကျေးရွာရှိ ဘုန်းတော်ကြီးကျောင်းကို YAK-130ဖြင့် ဗုံးကြဲတိုက်ခိုက်ခဲ့ရာ ကလေးငယ် လေးဦး၊ အဖွားအို တစ်ဦးနှင့် အမျိုးသားတစ်ဦးသေဆုံးခဲ့ရသည်။ ထိုအပြင် ကိုရင် ၈ပါး၊ ဦးဇင်း ၂ ပါးနှင့် အရပ်သားပြည်သူ ၇ ဦးထိခိုက်ဒဏ်ရာရရှိခဲ့သည်။
ဓါတ်ပုံ – MLA
