သံလွင်ခက်/မတ် ၁၆။ ပုံစာ – ပြည်သူ့လွှတ်တော် ဥက္ကဋ္ဌ နှင့် ပြည်သူ့လွှတ်တော် ဒုဥက္ကဌဖြစ်လာသည့် ခင်ရီ နှင့် မောင်မောင်အုန်း/ပုံ – MOI
စစ်ကော်မရှင်က ဦးဆောင်ကျင်းပသည့် တတိယအကြိမ် ပြည်သူ့လွှတ်တော် ပထမပုံမှန်အစည်းအဝေးကို ယနေ့ နံနက်ပိုင်းတွင် နေပြည်တော်ရှိ လွှတ်တော်အဆောက်အအုံ၌ စတင်ကျင်းပရာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဥက္ကဋ္ဌ ဦးခင်ရီအား ပြည်သူ့လွှတ်တော် ဥက္ကဋ္ဌအဖြစ် ရွေးချယ်လိုက်ကြောင်း သိရသည်။
ယနေ့ နံနက် ၁၀ နာရီတွင် စတင်သည့် အစည်းအဝေး၌ ပြည်သူ့လွှတ်တော် ဥက္ကဋ္ဌနေရာအတွက် အမည်စာရင်း တင်သွင်းရာတွင် ဦးခင်ရီ တစ်ဦးတည်းကိုသာ အမည်စာရင်း တင်သွင်းခဲ့ခြင်းဖြစ်သည်။
ထို့ကြောင့် ကန့်ကွက်သူမရှိဘဲ ပြိုင်ဘက်မရှိသည့် အနေအထားဖြင့် ရွေးချယ်ခံခဲ့ရခြင်း ဖြစ်သည်။
အမည်စာရင်း တင်သွင်းမှုအပြီးတွင် သဘာပတိက ဦးခင်ရီအား ပြည်သူ့လွှတ်တော် ဥက္ကဋ္ဌအဖြစ် အတည်ပြုကြောင်း ကြေညာခဲ့သည်။
ဦးခင်ရီအနေဖြင့် ယခုကဲ့သို့ ပြည်သူ့လွှတ်တော် ဥက္ကဌအဖြစ် ရွေးချယ်ခံရခြင်းကြောင့် ပြီးခဲ့သည့် စစ်ကော်မရှင် ရွေးကောက်ပွဲတွင် အနိုင်ရခဲ့သော်လည်း သမ္မတဖြစ်နိုင်တော့မည်မဟုတ်ပေ။
ထို့အပြင် ပြည်သူ့လွှတ်တော် ဒုတိယဥက္ကဋ္ဌ နေရာအတွက်မူ လက်ရှိ ပြန်ကြားရေးဝန်ကြီးဌာန ပြည်ထောင်စုဝန်ကြီးအဖြစ် တာဝန်ထမ်းဆောင်နေသူ ဦးမောင်မောင်အုန်းကို ရွေးချယ်ခဲ့သည်။
ဦးမောင်မောင်အုန်းသည် လူ့အခွင့်အရေး ချိုးဖောက်မှုများကြောင့် နိုင်ငံတကာ၏ ဒဏ်ခတ်ပိတ်ဆို့မှု (Sanctions) များကို ရင်ဆိုင်နေရသူ ဖြစ်သည်။
ယနေ့ကျင်းပသည့် အစည်းအဝေးသည် စစ်ကော်မရှင်၏ အတုအယောင်ရွေးကောက်ပွဲမှထွက်ပေါ်လာသည့် တတိယအကြိမ် ပြည်သူ့လွှတ်တော် ပထမဆုံးသော နေ့ရက်ဖြစ်ပြီး သက်ဆိုင်ရာ ကိုယ်စားလှယ်များ တက်ရောက်ခဲ့ကြသည်ကို တွေ့ရသည်။
#ThanLwinKhetNews #ShamElection2025 #လွှတ်တော်၂၀၂၆
