သံလွင်ခက်/မတ်လ ၁၄
MNDAA ၏ ကိုးကန့်ဒေသအတွင်းသို့ PSLF/TNLA အဖွဲ့က ဝင်ရောက်တိုက်ခိုက်ခြင်း၊ တပ်ဖွဲ့ဝင်များအား ရိုက်နှက်မောင်းထုတ်ခြင်းနှင့် နယ်မြေအား လုယူသိမ်းပိုက်ရန် ကြိုးပမ်းခြင်းတို့ကြောင့် MNDAA ဘက်မှ မလွှဲသာမရှောင်သာ တုံ့ပြန်တိုက်ခိုက်ရခြင်းဖြစ်ကြောင်း MNDAA စစ်ရေးကော်မတီက ယနေ့ထုတ်ပြန်သည်။
MNDAA ၏ ထုတ်ပြန်ချက်အရ ပဋိပက္ခ၏ အစပျိုးချက်မှာ ဖေဖော်ဝါရီ (၁၃) ရက်နေ့တွင် ဖြစ်ပွားခဲ့ခြင်းဖြစ်ပြီး၊ အဆိုပါနေ့မှစ၍ MNDAA ၏ အုပ်ချုပ်ရေးဌာနများနှင့် တပ်ဖွဲ့များအပေါ် PSLF/TNLA ဘက်မှ အကြမ်းဖက်တိုက်ခိုက်မှုများ ပြုလုပ်ခဲ့သည်ဟု MNDAA ဘက်က ဖော်ပြထားသည်။
MNDAA စစ်ရေးကော်မတီ၏ ထုတ်ပြန်ချက်တွင် ဖော်ပြထားသည့် အချက်အလက်များအရ ပဋိပက္ခဖြစ်ပွားရသည့် အကြောင်းရင်းမှာ ဆွေးနွေးညှိနှိုင်းမှုများ အဆင်မပြေခြင်းနှင့် စစ်ရေးအရ ကျူးကျော်မှုများရှိနေခြင်းတို့ကြောင့် ဖြစ်သည်ဟု ဆိုသည်။
ဖြစ်စဉ်ဖြစ်ပွားပြီးနောက်ပိုင်းတွင် MNDAA ဘက်မှ ပြဿနာကို ငြိမ်းချမ်းစွာ ဖြေရှင်းနိုင်ရန်အတွက် PSLF/TNLA အဖွဲ့ထံ အကြိမ် (၅) ကြိမ်တိုင်တိုင် အကြောင်းကြားစာပေးပို့၍ ဆွေးနွေးရန် ကမ်းလှမ်းခဲ့သော်လည်း အဆိုပါအဖွဲ့ဘက်မှ လျစ်လျူရှုထားခဲ့ကြောင်း ဖော်ပြထားသည်။
ထို့အပြင် ဖေဖော်ဝါရီ (၁၇) ရက်နေ့မှစတင်ကာ PSLF/TNLA တပ်ဖွဲ့များက MNDAA ၏ ထိန်းချုပ်နယ်မြေအတွင်းသို့ တပ်များစေလွှတ်ပြီး နယ်မြေသိမ်းပိုက်ရန် ကြိုးပမ်းလာခြင်းသည် အဓိကကျူးကျော်မှုတစ်ခုဖြစ်ကြောင်း MNDAA က သတ်မှတ်ထားသည်။
အဆိုပါအခြေအနေများအကြား မတ်လ (၁၄) ရက်နေ့၊ နံနက် (၀၉:၃၀) နာရီတွင် ကင်းလှည့်နေသော MNDAA တပ်ဖွဲ့ဝင်များကို PSLF/TNLA ဘက်မှ ကြားဖြတ်တိုက်ခိုက်လာသောကြောင့် ၎င်းတို့၏ အသက်အန္တရာယ်နှင့် နယ်မြေလုံခြုံရေးအတွက်သာ မလွှဲသာမရှောင်သာ ပြန်လည်တုံ့ပြန်တိုက်ခိုက်ရခြင်းဖြစ်ကြောင်း MNDAA က အသိပေးထားသည်။
MNDAA က ၎င်းတို့၏ထုတ်ပြန်ချက်တွင် PSLF/TNLA အနေဖြင့် ကိုးကန့်ဒေသ၌ တပ်သားသစ်များ အတင်းအဓမ္မစုဆောင်းခြင်း၊ တိုင်းရင်းသားအချင်းချင်း အမြင်လွဲမှားမှုများဖြစ်ပေါ်စေရန် လှုံ့ဆော်ခြင်းဖြင့် လူမျိုးရေးပဋိပက္ခများ ပေါ်ပေါက်စေရန် ရည်ရွယ်ချက်ရှိရှိ လုပ်ဆောင်နေသည်ဟု စွပ်စွဲထားသည်။
MNDAA က ၎င်းတို့အနေဖြင့် တည်ငြိမ်အေးချမ်းရေးနှင့် ညီနောင်မဟာမိတ်ဆက်ဆံရေးကို တန်ဖိုးထားကြောင်း ထပ်လောင်းပြောကြားသော်လည်း၊ အကြမ်းဖက်တိုက်ခိုက်မှုများ ဆက်လက်ဖြစ်ပေါ်နေပါက မိမိကိုယ်ကို ခုခံကာကွယ်သွားမည်ဖြစ်ကြောင်း အလေးပေးဖော်ပြထားသည်။
မတ်လ (၁၄) ရက်နေ့ တိုက်ပွဲအပြီး ပေါ်ပေါက်လာမည့် နောက်ဆက်တွဲပြဿနာများအတွက် PSLF/TNLA ဘက်ကသာ အပြည့်အဝ တာဝန်ယူရမည်ဖြစ်ကြောင်း MNDAA က ထုတ်ပြန်ချက်တွင် ဖော်ပြထားသည်။
လက်ရှိအချိန်အထိ PSLF/TNLA ဘက်မှ ဤစွပ်စွဲချက်များနှင့် ပတ်သက်၍ တရားဝင်တုံ့ပြန်ချက်တစ်စုံတစ်ရာ ထွက်ပေါ်လာခြင်း မရှိသေးပေ။
ယနေ့ တိုက်ပွဲများသည် ကွတ်ခိုင်မြို့နယ်အတွင်းရှိ အချက်အချာကျသော နေရာဒေသများတွင် ဖြစ်ပွားခဲ့ပြီးထိတွေ့တိုက်ပွဲများမှာ လွယ်ဆမ်ဆစ်နှင့် မန်ပျိန်းကျေးရွာကြားရှိ ဗျူဟာကုန်း၊ ကွတ်ခိုင်မြို့အထွက် ကောင်းခါးကျေးရွာအနီး၊ မြို့၏အနောက်မြောက်ဘက် ရှုခင်းသာအနီးနှင့် အရှေ့မြောက်ဘက် မော်ဟန်ကျေးရွာအနီး၊ ထို့အပြင် နမ့်ဖတ်ကာကျေးရွာအနီးတို့အထိ ကျယ်ပြန့်စွာ ဖြစ်ပွားခဲ့ကြောင်း သိရှိရသည်။
ရှမ်းပြည်တပ်မတော် (SSPP/SSA) ၏ သတင်းအရ တိုက်ပွဲများအပြီး မတ်လ (၁၄) ရက်၊ နေ့လယ် (၁:၃၀) နာရီ ဝန်းကျင်အချိန်တွင် ကွတ်ခိုင်မြို့အတွင်း၌ TNLA တပ်ဖွဲ့ဝင်များ ရှိမနေတော့ဘဲ MNDAA တပ်ဖွဲ့များကသာ မြို့တွင်းစိုးမိုးနေရာယူထားပြီဖြစ်ကြောင်းသိရသည်။
ပုံ – The Kokang
ပုံစာ- MNDAA တည်ထောင်ခြင်း ၃၇ နှစ်ပြည့် တပ်မတော်နေ့အခမ်းအနားကျင်းပစဉ်
#MNDAA #TNLA #ကွတ်ခိုင် #တိုက်ပွဲ #ညီနောင်မဟာမိတ်
