သံလွင်ခက်/မတ် ၅။ ဓါတ်ပုံ – သံလွင်ခက်
မြန်မာနိုင်ငံတွင် မိုဘိုင်းဖုန်း ထိန်းချုပ်စစ်ဆေးရေးစနစ် Central Equipment Identity Register – CEIR ကို ယခု မတ်လ ပထမပတ်မှစတင်၍ အကောင်အထည်ဖော် ဆောင်ရွက်နေပြီဖြစ်သည်ဟု စစ်ကော်မရှင်လက်အောက်မှ CEIR နှင့် EIR စနစ် စီမံကိန်းဦးစီးကော်မတီက ယနေ့ ထုတ်ပြန်သည်။
အဆိုပါစနစ်ကို ယခု မတ်ကုန် နောက်ဆုံးထား၍ စာရင်းသွင်းရမည်ဖြစ်သည်။ စာရင်းသွင်းထားပြီးပါက အခွန်ထပ်မံပေးဆောင်ရန်မလိုဘဲ မိမိတို့၏ လက်ကိုင်ဖုန်းများတွင် MPT, ATOM, Ooredoo နှင့် Mytel စသည့် အော်ပရေတာတစ်ခုခု၏ SIM Card ကို ဖုန်းအတွင်း ထည့်သွင်းဖွင့်လှစ် အသုံးပြုထားရန် လိုအပ်မည်ဖြစ်သည်။
ထိုသို့ SIM Card ထည့်သွင်းအသုံးပြုထားမှသာ CEIR စနစ်၏ ခွင့်ပြုစာရင်း Whitelist ထဲသို့ အလိုအလျောက် ပါဝင်မည်ဖြစ်ကြောင်း ဖော်ပြထားသည်။
ခွင့်ပြုစာရင်း Whitelist တွင် မပါဝင်သေးသော ဖုန်းများသည် ဧပြီ ၁ ရက်မှစတင်ကာ ယာယီအသုံးပြုခွင့်သာ ရရှိမည်ဖြစ်သည်။ မိုဘိုင်းဆက်သွယ်ရေးကွန်ရက်များနှင့် စတင်ချိတ်ဆက်သည့်ရက်မှ ရက်ပေါင်း ၃၀ အတွင်းသာ အသုံးပြုခွင့်ရရှိမည်ဖြစ်သည်။ ထိုကာလကျော်လွန်ပါက သတ်မှတ်အခွန်နှင့် ဒဏ်ကြေးများ ပေးဆောင်ပြီးမှသာ ဆက်လက်အသုံးပြုနိုင်မည်ဟု ထုတ်ပြန်ချက်တွင် ပါရှိသည်။
ပြည်ပမှ ဖုန်းတင်သွင်းလိုသည့် ကုမ္ပဏီများအနေဖြင့်လည်း လုပ်ထုံးလုပ်နည်းနှင့်အညီ အခွန်ပေးဆောင်ပြီးမှသာ CEIR စနစ်၏ ခွင့်ပြုစာရင်းတွင် ထည့်သွင်းခွင့်ရရှိမည်ဖြစ်သည်။
အသုံးပြုသူများသည် မိမိတို့ဖုန်း၏ မူရင်းအမှတ်အသား International Mobile Equipment Identity – IMEI နံပါတ်ကို ceir.gov.mm ဝက်ဘ်ဆိုက်တွင် ထည့်သွင်းစစ်ဆေးနိုင်သည်။ ထို့အပြင် အီလက်ထရောနစ် ငွေပေးချေမှုနည်းလမ်းများဖြင့် အွန်လိုင်းမှတစ်ဆင့် အခွန်နှင့် ဒဏ်ကြေးများကို ပေးဆောင်နိုင်ကြောင်း ဖော်ပြထားသည်။
လက်ရှိတွင် ဖုန်းလိုင်းမရသည့် ဒေသရှိပြည်သူများအကြား စိုးရိမ်မှုများ မြင့်တက်နေသည်။ စစ်ကော်မရှင်ကမူ အင်တာနက် အခက်အခဲရှိသည့် ဒေသများနှင့် နယ်စပ်ဒေသများရှိ ပြည်သူများအနေဖြင့် အဆိုပါဒေသများရှိ ပြည်တွင်းအခွန်များဦးစီးဌာနရုံးများ သို့မဟုတ် အကောက်ခွန်ဦးစီးဌာနရုံးများ၌ ကျသင့်အခွန်နှင့် ဒဏ်ကြေးများကို သွားရောက်ပေးဆောင်နိုင်သည်ဟု ကြေညာထားသည်။
CEIR စနစ်နှင့်ပတ်သက်၍ အသေးစိတ်သိရှိလိုပါက CEIR Call Center ဖုန်းနံပါတ် ၁၅၇၇ နှင့် ၁၅၇၅ တို့သို့ ရုံးချိန်အတွင်း ဆက်သွယ်မေးမြန်းနိုင်ကြောင်း ဖော်ပြထားသည်။
လက်ရှိတွင် အဆိုပါစနစ်နှင့်ပတ်သက်၍ အွန်လိုင်းလူမှုကွန်ရက် စာမျက်နှာများပေါ်၌ အငြင်းပွားမှုများ ပြင်းထန်နေသည်။ Whitelist တွင် ပါဝင်ခြင်းမရှိပါက ဖုန်းလိုင်းများ ဖြတ်တောက်ခံရနိုင်သည့် အခြေအနေကြောင့် သုံးစွဲသူများအကြား စိုးရိမ်ပူပန်မှုများ ရှိနေသည်ဟု သိရသည်။
Myanmar Central Equipment Identity Register Portal
#မိုဘိုင်းဖုန်းထိန်းချုပ်ရေးစစ်ဆေးရေးစနစ် #CEIR #စတင်ကျင့်သုံး #စစ်ကော်မရှင်ထုတ်ပြန် #ThanLwinKhetNews
