မူယန်း/မတ် ၃။ Photo- CDF-Asho
မကွေးတိုင်း၊ မင်းတုန်းမြို့နယ်၊ ပြောင်းကျေးရွာအနီး စစ်ကော်မရှင်၏ လေကြောင်းတိုက်ခိုက်မှုကြောင့် အသက်ဆုံးရှုံးခဲ့ရသည့် အရပ်သားပြည်သူများအတွက် ဝမ်းနည်းခြင်းအထိမ်းအမှတ်အဖြစ် ချင်းကာကွယ်ရေးတပ် (CDF-Asho) က ယနေ့ နံနက်ပိုင်းတွင် တစ်မိနစ်ငြိမ်သက်ခြင်း ပြုလုပ်ခဲ့သည်ဟု သိရသည်။
ပြီးခဲ့သည့် မတ် ၁ ရက် နံနက် ၁၁ နာရီ ၂၀ မိနစ်အချိန်ခန့်တွင် မင်းတုန်းမြို့နယ်၊ ပြောင်းကျေးရွာအနီးရှိ ကုန်တင်ကားများ စုပြုံရပ်နားရာနေရာသို့ စစ်ကော်မရှင်က တိုက်လေယာဉ် သုံးစီးဖြင့် ပေါင် ၂၀၀ နှင့် ပေါင် ၃၀၀ ဗုံးသီး အလုံးပေါင်း ၁၀ ခန့် ကြဲချတိုက်ခိုက်ခဲ့သည့်အပြင် ရော့ကက်များဖြင့်ပါ အဆက်မပြတ် ပစ်ခတ်တိုက်ခိုက်ခဲ့ခြင်း ဖြစ်သည်။
အဆိုပါ ဗုံးကြဲတိုက်ခိုက်မှုဖြစ်စဉ်ကြောင့် အပြစ်မဲ့ပြည်သူများစွာ အသက်ခန္ဓာ ဆုံးရှုံးခဲ့ရသည့်အပေါ် မိသားစုဝင်များနှင့်ထပ်တူ များစွာစိတ်မကောင်းဖြစ်ရကြောင်း CDF-Asho က ထုတ်ပြန်ချက်ဖြင့် ဖော်ပြထားသည်။
Photo- CDF-Asho
ထို့ကြောင့် လေကြောင်းတိုက်ခိုက်ခံရ၍ ဗုံးဒဏ်သင့်ကျဆုံးခဲ့ရသည့် ပြည်သူများအတွက် ဝမ်းနည်းခြင်းအထိမ်းအမှတ်အဖြစ် CDF-Asho နောက်တန်းစခန်းရှိ ရဲဘော်များက ယနေ့ မတ် ၃ ရက် နံနက် ၇ နာရီအချိန်တွင် ချင်းအမျိုးသားအလံတော်ရှေ့၌ တစ်မိနစ်ငြိမ်သက်ခြင်း အစီအစဉ်ကို ပြုလုပ်ခဲ့ကြသည်။
အဆိုပါ စစ်ကော်မရှင်၏ လေကြောင်းတိုက်ခိုက်မှုကြောင့် အရပ်သားပြည်သူ ၂၀ ကျော် သေဆုံးခဲ့ရပြီး အများအပြား ထိခိုက်ဒဏ်ရာ ရရှိခဲ့သည်။
#မင်းတုန်းလေကြောင်းရန် #CDFAsho #တစ်မိနစ်ငြိမ်သက် #ThanLwinKhetNews
