သံလွင်ခက်/မတ် ၃။
ထိုင်းနိုင်ငံ၊ ကမ်ဖိုင်ဖက်(Kamphaeng Phet)ခရိုင်၊ ပန်ဆီလာထုံ (Pang Sila Thong)မြို့နယ်၊ ပန်တာဝိုင် (Pang Ta Wai) ကျေးရွာအုပ်စု၊ ကျေးရွာအမှတ် ၅၊ ဘန်တက်ဖာ (Ban Tak Fa)ရွာအတွင်းသို့ ဝင်ရောက်ခဲ့သော ကျားကို ထိုင်းအာဏာပိုင်များကို ရှာဖွေတွေ့ရှိခဲ့သည်။
အဆိုပါကျားသည် ထိုင်း-မြန်မာနယ်စပ် တာ့ခ်ခရိုင်နှင့် နခွန်စဝမ်ခရိုင်အတွင်းရှိ တောတောင်ထူထပ်သော မယ်ဝမ် (Mae Wong) အမျိုးသားဥယျာဉ်အတွင်းမှ ထွက်လာပြီး ရွာအနီးတဝိုက်သို့ လှည့်လာသွားလာနေခဲ့သည်ဟု ဒေသခံများက ပြောဆိုထားသည်။
ပြီးခဲ့သည့် ဖေဖော်ဝါရီ ၂၈ ရက် ည ၁၀နာရီအချိန်တွင် အဆိုပါကျားသည် ရွာသားတစ်ဦး၏ တောဝက်ခြံထဲသို့ ဝင်ရောက်ကာ ဝက်မကြီးတစ်ကောင်ကို သေဆုံးသည်အထိ ကိုက်ခဲခဲ့ပြီး ဝက်ကလေးတစ်ကောင်ကို ကိုက်ချီကာ အမှောင်ထဲသို့ ထွက်ပြေးသွားခဲ့သဖြင့် တစ်ရွာလုံး အထိတ်တလန့် ဖြစ်ခဲ့ရသည်။
ဝက်ပိုင်ရှင်ဖြစ်သူ အသက် ၇၉ နှစ်အရွယ် ဦးဖွန် ဆရီချွန်ဖူး (Mr. Fun Srichomphu)က “ဝက်ခြံနားမှာ အိပ်နေတုန်း ပုံမှန်မဟုတ်တဲ့ အသံတွေကြားလို့ လက်နှိပ်ဓာတ်မီးနဲ့ ထိုးကြည့်လိုက်တော့ ကျားကြီးတစ်ကောင်က ဝက်မကြီးကို ကြမ်းကြမ်းတမ်းတမ်း ကိုက်နေတာကို တွေ့လိုက်ရတယ်။ မီးရောင်မြင်တော့ ကျားက တောထဲကို ခုန်ပြေးသွားတယ်။ ဝက်ကြီးကတော့ ဒဏ်ရာပြင်းထန်ရလို့ သေဆုံးသွားခဲ့တယ်” ဟု အဖြစ်အပျက်ကို ပြန်ပြောပြသည်။
ထို့နောက် နံနက် ၃ နာရီအချိန်တွင် အဆိုပါကျားသည် ထပ်မံရောက်ရှိလာပြီး အလေးချိန် ကီလို ၈၀ ခန့်ရှိသော ဝက်အသေကောင်ကို ခြံထဲမှဆွဲထုတ်ကာ အိမ်နောက်ဘက်ရှိ ကြံခင်းထဲသို့ ယူဆောင်သွားခဲ့သည်။ အနီးအနားတွင် တာဝန်ရှိသူများ စောင့်ကြည့်နေသည့်ကြားမှ ယခုကဲ့သို့ ဝင်ရောက်လာခြင်းကြောင့် ရွာသားများမှာ ပို၍ စိုးရိမ်ပူပန်လာခဲ့ရသည်။
မယ်ဝမ် အမျိုးသားဥယျာဉ်ဦးစီးမှူး မစ္စတာခွန်ဆန်မဏီကန် (Mr. Komsan Maneekan)က သတင်းရရှိပြီးနောက် တာဝန်ရှိသူများ သွားရောက်စစ်ဆေးရာ ခြံထဲသို့ ခုန်ဝင်ထားသည့် အရာများနှင့် ကျားခြေရာများကို ရှင်းလင်းစွာ တွေ့ရှိခဲ့ရကြောင်း ပြောကြားခဲ့သည်။ ထို့ကြောင့် စောင့်ကြည့်ရေးအဖွဲ့များ ချထားပြီး ကြံခင်းဧရိယာကို အပူချိန်အာရုံခံ ဒရုန်း(Thermal Drone)ဖြင့် ပျံသန်းစစ်ဆေးမှုများ ပြုလုပ်ခဲ့သည်။
ယမန်နေ့ (မတ်လ ၂ ရက်)ညပိုင်းတွင် တာဝန်ရှိသူများက တစ်ညလုံး ဆက်လက်စောင့်ကြည့်ခဲ့ရာ တောပြင်ပသို့ ထွက်လာသော ကျားကို ခြေရာခံမိခဲ့သည်။ ယနေ့နံနက်ပိုင်းတွင် ကြံခင်းထဲ၌ အိပ်နေသော ကျား၏ ဓာတ်ပုံများကို ရှင်းလင်းစွာ ရိုက်ကူးနိုင်ခဲ့သည်။
လက်ရှိတွင် အဆိုပါဧရိယာကို ဝန်းရံပိတ်ဆို့ထားပြီး နောက်ဆက်တွဲဆောင်ရွက်မည့် အစီအစဉ်များကို ဆွေးနွေးတိုင်ပင်လျက်ရှိသည်။ ထို့အပြင် ကျေးရွာလူကြီးများနှင့် ဆက်သွယ်ကာ ပြည်သူများအနေဖြင့် အိမ်မွေးတိရစ္ဆာန်များကို ဂရုစိုက်ကြရန်နှင့် အန္တရာယ်ရှိသော နေရာများသို့ သွားလာခြင်းမှ ရှောင်ကြဉ်ကြရန် သတိပေးနှိုးဆော်ထားသည်။
#ကျား #ဝက် #ကြံခင်းထဲ #ဆွဲယူ #ထိုင်းအာဏာပိုင်များ #ရှာဖွေ #ThanLwinKhetNews
