သံလွင်ခက်/မတ် ၂၁ ။ ဓာတ်ပုံ – ပြည်သူ့ညီနောင် (စလင်း)
မကွေးတိုင်းဒေသကြီး၊ စလင်းမြို့နယ်နှင့် ဆင်ဖြူကျွန်းဒေသတို့တွင် စစ်ရေးအရှိန်မြှင့်တင်ရန် ရှိနေသဖြင့် မိဘပြည်သူများအနေဖြင့် စစ်ကော်မရှင်တပ်သားများရှိရာ နေရာများနှင့် ဝေးဝေးနေထိုင်ကြရန် ဒေသခံကာကွယ်ရေးတပ်ဖွဲ့များက ယနေ့ သတိပေးထားသည်။
လက်ရှိတွင် စလင်းမြို့ပေါ်နှင့် ဆင်ဖြူကျွန်းဒေသရှိ အချို့သော ပြည်သူများသည် စစ်ကော်မရှင်တပ်သားများနှင့် နီးကပ်စွာ သွားလာလှုပ်ရှားနေထိုင်မှုများ ရှိနေခြင်းကြောင့် တော်လှန်ရေးအဖွဲ့များအနေဖြင့် စစ်ဆင်ရေးဖော်ဆောင်ရာတွင် အခက်အခဲ ဖြစ်ပေါ်နေရသည်ဟု ဆိုသည်။
ပြည်သူ့ညီနောင် (စလင်း) ၏ သတင်းတာဝန်ခံ ကိုပြည်သူက “လက်ရှိ ဆင်ဖြူကျွန်းနဲ့ စလင်းမြို့ပေါ်တွေမှာ စစ်ကော်မရှင်တပ်သားတွေနဲ့ တချို့ပြည်သူတွေ နီးကပ်စွာ နေထိုင်တာတွေ၊ သွားလာလှုပ်ရှားနေတာတွေ ရှိနေတော့ ကျွန်တော်တို့အနေနဲ့ အလုပ်လုပ်ရတာ ခက်တယ်ဗျ ’’ ဟု သံလွင်ခက်ကို ပြောသည်။
၎င်းက ဆက်လက်၍ စစ်ကော်မရှင်တပ်ဖွဲ့ဝင်များ ရှိနေသည့် မည်သည့်နေရာဒေသမဆို အန္တရာယ်ရှိနိုင်ကြောင်းနှင့် အထူးသဖြင့် မြို့ပေါ်နှင့် မြို့နှင့်နီးစပ်သည့် ကျေးရွာများတွင် ပိုမိုအန္တရာယ်ကြီးမားကြောင်း ထောက်ပြထားသည်။
မင်းဘူးခရိုင် အမှတ် (၅) တပ်ရင်းနှင့် ၎င်း၏ လက်အောက်ခံအဖွဲ့များဖြစ်ကြသော စလင်းမြို့ မြို့ပြကျားပေါက်အဖွဲ့၊ ပြည်သူ့ညီနောင် (စလင်း) တို့က မိဘပြည်သူများအနေဖြင့် စစ်ကော်မရှင်တပ်သားများ၊ ပျူစောထီးများနှင့် အနီးကပ်သွားလာခြင်း သို့မဟုတ် အတူတကွ နေထိုင်ခြင်းများကို အထူးရှောင်ကြဉ်ကြရန် တိုက်တွန်းထားသည်။
ယခုကဲ့သို့ အသိပေးနှိုးဆော်ရခြင်းမှာ ရှေ့ဆက်ဖြစ်ပွားလာမည့် တိုက်ခိုက်မှုများအတွင်း ပြည်သူများအနေဖြင့် ထိခိုက်နစ်နာမှု တစ်စုံတစ်ရာ မရှိစေရန်အတွက် ကြိုတင်ကာကွယ်သည့်အနေဖြင့် ထုတ်ပြန်ရခြင်းဖြစ်ကြောင်း ဖော်ပြထားသည်။
လက်ရှိတွင် မကွေးတိုင်းအတွင်း၌ စစ်ကော်မရှင်က အတင်းအဓမ္မ ပေါ်တာဆွဲခြင်းနှင့် ငွေညှစ်ခြင်းများကို ခပ်စိပ်စိပ် လုပ်ဆောင်လာနေသည်ဟု ပြည်သူ့ညီနောင် စလင်းက အသိပေးထားသည်။
ထို့ကြောင့် မိဘပြည်သူများအနေဖြင့် အသွားအလာ ဆင်ခြင်ကြရန်နှင့် မိမိတို့သွားမည့် လမ်းကြောင်းများတွင် စစ်ကော်မရှင်တပ်သားများ၏ လှုပ်ရှားမှု ရှိ၊ မရှိကို သေချာစွာ စုံစမ်းမေးမြန်းပြီးမှသာ သွားလာကြရန် တော်လှန်ရေးအင်အားစုများနှင့် ဒေသခံများက တိုက်တွန်းနှိုးဆော်ထားသည်။
လက်ရှိတွင် စစ်ကော်မရှင်၏ ယန္တရားများ လည်ပတ်မှုနှင့် စစ်ရေးလှုပ်ရှားမှုများအပေါ် မူတည်၍ တော်လှန်ရေးအင်အားစုများက စစ်ဆင်ရေးများကို တိုးမြှင့်လုပ်ဆောင်လာဖွယ် ရှိသည်ဟု သိရသည်။
#ဆင်ဖြူကျွန်း #မကွေး #စလင်း #ThanLwinKhetNews
