AA ထံ လက်နက်ချအညံ့ခံလာသည့် စစ်ကောင်စီတပ်သားထောင်ချီရှိလာ
*****
သံလွင်ခက်
မတ် ၂၇ ၊ ၂၀၂၄။
ရခိုင်ပြည်နယ်နှင့် ပလက်ဝဒေသတွင် တကျော့ပြန်တိုက်ပွဲဖြစ်ပွားခဲ့သည့် ၄ လကျော်ကာလအတွင်း ယင်းဒေသ များက လက်နက်ချအညံ့ခံလာသော စစ်ကောင်စီတပ်ဖွဲ့ဝင်၊ တပ်မိသားစုအရေအတွက် ထောင်ချီရှိလာပြီဟု ရက္ခိုင့်တပ်တော် – AA က မတ်လ ၂၆ ရက်၌ထုတ်ပြန်သည်။
ရက္ခိုင့်တပ်တော် – AA သည် ရခိုင်ဒေသအတွင်း တပ်စခန်းပေါင်းများစွာကို ဝန်းရံပိတ်ဆို့ဖြတ်တောက်ထားသည် မှာ လပေါင်းများစွာကြာမြင့်ခဲ့ပြီဖြစ်သည်။
ယင်းအနက်က စခန်းတစ်ခုဖြစ်သော ရခိုင်ပြည်နယ် ၊ မောင်တောမြို့ရှိ တမန်းသား ရဲကင်းစခန်းအား ၁ လနီးပါး ကြာသည်အထိ ပိတ်ဆို့ဖြတ်တောက်ထားခဲ့ပြီးနောက် မတ်လ ၂၅ ရက်တွင် အဆိုပါစခန်းကအင်အား ၁၀၀ ခန့် ပါဝင်သော စစ်ကောင်စီတပ်ဖွဲ့ဝင်များသည် ရက္ခိုင့်တပ်တော်ထံ လက်နက်ချခဲ့သည်ဟု AA ၏ ထုတ်ပြန်ချက်အရ သိရသည်။
လက်နက်ချအညံ့ခံလာသူများကို ကောင်းမွန်စွာစောင့်ရှောက်ထားသည်ဟု AA ကဆိုသည်။
ထို့ပြင် ရက္ခိုင့်တပ်တော်သည် ရခိုင်ဒေသအတွင်းရှိ လက်ကျန်စစ်စခန်းများကို တစ်ရက်မျှရပ်နားခြင်းမရှိဘဲ တစ်ခုပြီးတစ်ခု ဆက်လက်ထိုးစစ်ဆင်တိုက်ခိုက်လျက်ရှိသည်ဟု ထုတ်ပြန်ချက်တွင် ဖော်ပြထားသည်။
အဆိုပါ လက်ကျန်စခန်းများထဲက ဘူးသီးတောင်အခြေစိုက် စကခ – ၁၅ လက်အောက်ခံ ခမရ – ၅၅၂ တပ်ရင်း အား ယခုနှစ် ဖေဖော်ဝါရီလ ၂၄ ရက်၊ နံနက် ၈ နာရီ ၃၅ မိနစ်အချိန်တွင် စတင်ထိုးစစ်ဆင်တိုက်ခိုက်ခဲ့သည်။
ထို့နောက် ခမရ – ၅၅၂ စခန်းအား စစ်ကောင်စီ၏ ကြည်း၊ လေ အပြင်းအထန်ခုခံကာကွယ်မှုကြားထဲက ရက်ပေါင်း ၃၂ ရက်ကြာ ထိုးစစ်ဆင်တိုက်ခိုက်ခဲ့ပြီးသည့်နောက် မတ်လ ၂၅ ရက်၊ နေ့လယ် ၁၂ နာရီအချိန်တွင် အဆိုပါစခန်း တစ်ခုလုံးအား အပြီးသတ်သိမ်းပိုက်ရယူနိုင်ခဲ့သည်ဟု AA က ထုတ်ပြန်ထားသည်။
အဆိုပါ စခန်းသိမ်းတိုက်ပွဲအတွင်း လက်နက်ခဲယမ်း၊ အလောင်းများနှင့်အတူ လက်နက်ချအညံ့ခံခဲ့သော စစ် ကောင်စီတပ်သားအချို့အား ဖမ်းဆီးရမိခဲ့ပြီး ထွက်ပြေးလွတ်မြောက်နေသေးသော တပ်ဖွဲ့ဝင်များကိုလည်း လိုက် လံဖမ်းဆီးလျက်ရှိသည်ဟု ထုတ်ပြန်ချက်တွင် ဖော်ပြထားသည်။
ထို့အတူ ရက္ခိုင့်တပ်တော်က ၁ လနီးပါး ဝိုင်းရံပိတ်ဆိုထားနိုင်ခဲ့ပြီး အတိုင်းအတာတစ်ခုထိ သိမ်းပိုက်ရယူထားခဲ့ ပြီဖြစ်သော မောင်တောမြို့ရှိ ကြိမ်ချောင်းနယ်ခြားစောင့်စခန်းကိုလည်း အပြီးသတ်ရယူနိုင်ရေးအတွက် ထိုးစစ်ကို ဆက်လက်အရှိန်အဟုန်မြှင့်လျက်ရှိသည်ဟု သိရသည်။
တစ်ပြိုင်နက်တည်းတွင် စစ်ကောင်စီ၏ အခြားသောစခန်းများကိုလည်း AA က ထိုးစစ်ဆင်တိုက်ခိုက်လျက် ရှိ သည် ဟု ထုတ်ပြန်ထားသည်။
ရခိုင်ပြည်နယ်တွင် စစ်ကောင်စီတပ်နှင့် AA တို့ တကျော့ပြန်တိုက်ပွဲဖြစ်ပွားနေသည်မှာ ၄လကျော်ကြာမြင့်လာ ပြီဖြစ်ကာ AA အနေဖြင့် ပလက်ဝ အပါအဝင် မြို့နယ် ၉ မြို့နယ်အား သိမ်းပိုက်ထားနိုင်ခဲ့သည်။
ပုံစာ – လက်နက်ချအညံ့ခံခဲ့သည့် တမန်းသားရဲကင်းစခန်းက စစ်ကောင်စီတပ်သားများ။
************
Telegram– > https://t.me/newstlk/4006
YouTube – > https://youtu.be/6X9AvN2FnIw?si=BGNM7eyxs7ZtJG7d
Website – > https://thanlwinkhet.net/?p=8705
