မလည်ကျေးရွာတိုက်ပွဲတွင် စစ်ကောင်စီတပ်ဖွဲ့ဝင် ၆ ဦးသေဆုံး၊ လက်နက်ခဲယမ်းများသိမ်းဆည်းရရှိ
******
ယမင်းဖူးပွင့်အောင်
မေ ၁၁၊ ၂၀၂၄။
စစ်ကိုင်းတိုင်း၊ ကန့်ဘလူခရိုင်၊ ကန့်ဘလူမြို့နယ်တွင် ပြည်သူ့ကာကွယ်ရေးတပ်ဖွဲ့နှင့် စစ်ကောင်စီတပ်ဖွဲ့ဝင်တို့ကြား တိုက်ပွဲဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၆ ဦးသေဆုံးကာ လက်နက်ခဲယမ်းများ သိမ်းဆည်းရရှိခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။
ပြီးခဲ့သည့် မေလ ၇ ရက်တွင် ကန့်ဘလူမြို့နယ် မလည်ကျေးရွာရှိ အင်အား ၁၀၀ ခန့်ပါ စစ်ကောင်စီစခန်းကို ဒေသခံပြည်သူ့ကာကွယ်ရေးတပ်ဖွဲ့များက သွားရောက်တိုက်ခိုက်ခဲ့ခြင်းဖြစ်သည်။
တိုက်ပွဲအတွင်း စစ်ကောင်စီတပ်ဖွဲ့ဝင် ၆ ဦးသေဆုံးပြီး လက်လုပ်သေနတ်အပါအဝင် လက်နက်ငယ် ၁၄ လက်၊ ကျည်မျိုးစုံ ၇၀၀ ကျော်၊ ကျည်အိမ် ၁၁ ခု၊ လက်ပစ်ဗုံး ၁လုံး၊ အီနာဂါ ၆ လုံး၊ Jammer ၁ ခု၊ Equipment ၄ ခု၊ ယူနီဖောင်း ၃ စုံနှင့် စစ်သုံးပစ္စည်းများ သိမ်းဆည်းရမိခဲ့သည်ဟု အမှတ်-၁ စစ်ဒေသက ယနေ့နံနက်တွင် ထုတ်ပြန်သည်။
စစ်ကောင်စီ၊ ရဲ နှင့် ပျူစောထီးအဖွဲ့ အခြေချစခန်းကို ကန့်ဘလူခရိုင် တပ်ရင်း (၂၊ ၃)၊ ရွှေဘိုခရိုင် တပ်ရင်း – ၃၊ အမှတ် ၅၁၀ တပ်ရင်းတို့က သွားရောက်တိုက်ခိုက်ခဲ့ပြီး ကန့်ဘလူမြို့နယ် ပကဖနှင့် ခင်ဦးမြို့နယ် ပလဖ တို့ကလည်း ထောက်ပို့နှင့် ဖြတ်တောက်ရေး ပါဝင်ခဲ့သည်ဟု ထုတ်ပြန်ချက်တွင် ဖော်ပြထားသည်။
တိုက်ပွဲအတွင်း စစ်ကောင်စီတပ်မတော်တန်းမြင့်လေ့ ကျင့် ရေးကျောင်း တတက – ၁၃ က လက်နက်ကြီးအလုံး ၆၀ ကျော်ပစ်ခတ်ခဲ့ပြီး ပြင်ဦးလွင် (အနီးစခန်း) က Mi-35 တစ်စီးဖြင့် လေကြောင်းပစ်ခတ်မှု ၁၀ ကြိမ်ပြု လုပ်ခဲ့သည်။
ထို့ပြင် တံတားဦးက Jet Fighter ၁ စီးဖြင့် ၄ ကြိမ်ဗုံးကြဲ တိုက်ခိုက်ခဲ့ပြီး Y-12 ဖြင့် ဗုံးအလုံး ၆၀ ကျော်ကြဲချ တိုက်ခိုက်ခဲ့သည်ဟု သိရသည်။
ပြင်ဦးလွင်ခရိုင်၊ သပိတ်ကျင်းမြို့နယ်၊ ကျောက်ဖျာကျေးရွာရှိ စစ်ကောင်စီ အင်အား ၇၀ ခန့်ကလည်း ကျောက်လုံးကြီးရွာကို ရေကြောင်းဖြင့်လာရောက်စစ်ကူပေးခဲ့သဖြင့် တိုက်ပွဲအတွင်း ကာကွယ်ရေးတပ်ဖွဲ့ဝင် ရဲဘော် ၁၀ ဦး ကျဆုံးခဲ့သည်ဟု ထုတ်ပြန်ချက်တွင်ဖော်ပြထားသည်။
ကန့်ဘလူတိုက်နယ် ပကဖ ရဲဘော် ၁ ဦးက” တိုက်ပွဲထဲမှာ ကျတာလည်းရှိတယ်။ လေကြောင်းနဲ့လာပစ်တော့ ထပ်ကျတာလည်းရှိတယ်”ဟု သံလွင်ခက်ကိုပြောသည်။
ယမန်နေ့နံနက်ပိုင်းကလည်း မလည်ကျေးရွာကို စစ်ကောင်စီက စစ်ကြောင်းထိုးမီးရှို့မှုကြောင့် မလည်ကျေး ရွာရှိ ဒေသခံပြည်သူများ ရွာလုံးကျွတ် နေရပ်စွန့်ခွာတိမ်း ရှောင်နေရပြီး အနီးဝန်းကျင်ရှိ ကျေးရွာ ၁၀ ရွာခန့်က ပြည်သူများ တိမ်းရှောင်နေကြရသည်။
စစ်ကောင်စီ၏ လေကြောင်းတိုက်ခိုက်မှုကြောင့် ပြည်သူ ၁ ဦး သေဆုံးပြီး ၁၇ ဦး ထိခိုက်ဒဏ်ရာရခဲ့သည်ဟု အမှတ် ၁ စစ်ဒေသ၏ ထုတ်ပြန်ချက်အရ သိရသည်။
လက်ရှိအချိန်တွင် စစ်ကောင်စီက မလည်ကျေးရွာ၌ အထိုင်ချတပ်စွဲနေပြီး အင်အား ၁၀၀ ခန့် ထပ်မံဖြည့် တင်းထားကာ အနီးဝန်းကျင်ရှိကျေးရွာများကို စစ် ကြောင်းထိုးဝင်ရောက်လျက်ရှိသည်ဟု ကာကွယ်ရေးတပ်ဖွဲ့ဝင်များထံက သိရသည်။
ဓာတ်ပုံ – အမှတ် ၁ စစ်ဒေသ။
****
Telegram – > https://t.me/ThanLwinKhetNews/4572
YouTube -> https://youtu.be/b23CL15_vH0
Website -> https://thanlwinkhet.net/?p=9904
