လေကြောင်းအန္တရာယ်ကြောင့် ဖလူးကျေးရွာအုပ်စုရှိ ဒေသခံများတိမ်းရှောင်နေရ
*******
သဇင်
ဧပြီ ၃၀၊၂၀၂၄။
ကရင်ပြည်နယ်၊ မြဝတီမြို့နယ်၊ ဖလူးကျေးရွာအုပ်စုရှိဒေသခံများသည် လေကြောင်းအန္တရာယ်စိုးရိမ်သည့် အတွက်ကြောင့် ရွာလုံးကျွတ်ထွက်ပြေးတိမ်းရှောင်နေကြသည်ဟု ဒေသခံများထံကသိရသည်။
ပြီးခဲ့သည့် ဧပြီလ ၂၅ ရက် ညပိုင်းက လေးကေ့ကော်မြို့သစ်အနီးရှိ စစ်ကောင်စီတပ်၏ စွယ်တော်ကုန်း(အမြောက်ကုန်း)အနီးဝန်းကျင်ကို Y -12ထောက်ပို့လေယာဉ်ဖြင့် ဗုံးအရအတွက် ၆၀ ခန့် ကြဲချခဲ့ပြီးနောက် ဖလူးကျေးရွာအုပ်စုရှိ ဖလူးကြီး၊ ဖလူးလေးနှင့် မင်းလက်ပံကျေးရွာများက ဒေသခံတချို့ စတင်တိမ်းရှောင်ခဲ့ကြသည်ဟု ဖလူးကြီးကျေးရွာ ဒေသခံအမျိုးသား ၁ ဦးကဆိုသည်။
၎င်းက “ကြဲတာက နေ့တိုင်းလိုလိုကြဲနေတာ၊ နီးတာနဲ့ ဝေးတာပဲကွာတယ်။ ဦးလေးတို့အနေနဲ့ကျတော့ ရွာထဲမှာ ဝင်နေလို့ မရဲတော့ဘူးလေ။ ၂၅ ရက်နေ့ညက ရွာဘေးမှာလာကျတော့ တော်တော်များများ စစ်ရှောင်နေရတဲ့ အနေအထားဖြစ်ကုန်တယ်။ အလုံး ၆၀ လောက်ချသွားတာ။ တစ်ညလုံးနီးနီးပဲ။ ည ၁ နာရီအထိလောက် ကိုချတာ”ဟု ဆိုသည်။
စစ်ကောင်စီစွယ်တော်ကုန်းစခန်းသည် ဖလူးကျေးရွာအုပ်စုနှင့် ၃ မိုင်ခန့်သာကွာဝေးပြီး စွယ်တော်ကုန်းအနီးတွင် စစ်ကောင်စီတပ်နှင့် တော်လှန်ရေးပူးပေါင်းတပ်တို့အကြား မကြာခဏတိုက်ပွဲဖြစ်ပွားလေ့ရှိသည်။
ယမန့်နေ့ဧပြီလ ၂၉ ရက်တွင်လည်း ဖလူးကြီးကျေးရွာအနီးသို့ စစ်ကောင်စီလေကြောင်း တိုက်ခိုက်မည်ဟူသော သတင်းများထွက်ပေါ်လာသည့်အတွက် ဖလူးကြီး၊ ဖလူးလေး နှင့်မင်းလက်ပံကျေးရွာရှိ ကျန်ရှိနေသည့် ဒေသခံ များလည်း ရွာလုံးကျွတ်တိမ်းရှောင်ခဲ့ကြသည်ဟု လေးကေ့ကော်မြို့သစ်တာဝန်ခံ ဦးအေးလွင် က ဆိုသည်။
“မနေ့က ညနေပိုင်းမှာ လေကြောင်းတိုက်ခိုက်မှုရှိမယ်ဆိုပြီတော့ ဘယ်ကကြားကြလဲတော့မသိဘူး။ ရွာသားတွေရှောင်ထွက်ကုန်တာပေါ့။ သူတို့ရွာနားကို တစ်ခါကျဖူးတော့ ထိခိုက်မှာစိုးရိမ်လို့ဖြစ်မယ်”ဟုဆိုသည်။
ဖလူးကြီး၊ ဖလူးလေးနှင့် မင်းလက်ပံကျေးရွာများတွင် အိမ်ခြေပေါင်း ၁,၂၀၀ ကျော်ရှိပြီး ရွာလုံးကျွတ် ထွက်ပြေး တိမ်းရှောင်နေကြခြင်းဖြစ်သည်။
ယနေ့ဧပြီလ ၃၀ ရက် မနက် ၉ နာရီခွဲခန့်တွင်လည်း စစ်ကောင်စီတပ်က ကရင်ပြည်နယ်၊ မြဝတီမြို့အနီးရှိ လတ်ခတ်တောင်ခြေကို ဗုံး ၆ လုံးကြဲချခဲ့သေးသည်ဟုသိရသည်။
ဓာတ်ပုံ – သံလွင်ခက်။
ပုံစာ – ဖလူးလေး ဘုရားကုန်း စစ်ကောင်စီတပ်စခန်း။
****
Telegram – > https://t.me/ThanLwinKhetNews/4487
YouTube -> https://youtu.be/b23CL15_vH0
Website -> https://thanlwinkhet.net/?p=9668
