မပေါက်ကွဲသေးသည့်လက်နက်အကြွင်းအကျန်များ KNA ရှင်းလင်း

မပေါက်ကွဲသေးသည့်လက်နက်အကြွင်းအကျန်များ KNA ရှင်းလင်း

******

သဇင်

ဧပြီ ၂၅၊၂၀၂၄။

မြဝတီမြို့ ၊ ထိုင်း – မြန်မာချစ်ကြည်ရေး အမှတ် ၂ တံတားအနီး ဖြစ်ပွားခဲ့သော နှစ်ဖက်ထိတွေ့တိုက်ပွဲအတွင်း မပေါက်ကွဲဘဲကျန်ရှိနေသေးသည့် လက်နက်အကြွင်းအကျန်များကို ကရင်အမျိုးသားတပ်မတော် – KNA တပ်ဖွဲ့က ရှင်းလင်းနေသည်ဟု ဒေသခံများ၏ပြောပြချက်အရ သိရသည်။

စစ်ကောင်စီတပ်ကပစ်ခတ်လိုက်သည့် လက်နက်ကြီးအချို့သည် မြဝတီမြို့ အမှတ် ၅ ရပ်ကွက်ရှိ  အမှတ် ၂ တံတားအနီး ဖိုးပန်းသီးလမ်းတွင် မပေါက်ကွဲဘဲကျန်နေသည့် လက်နက်ကြီး ၅ လုံးဝန်းကျင်တွေ့ရှိခဲ့သည်ဟု ဒေသခံများကဆိုသည်။

အဆိုပါလက်နက်ကြီးများကို ပြီးခဲ့သည့်ဧပြီလ ၂၃ ရက်ကစတင်ပြီး သက်ဆိုင်ရာရပ်ကွက်အုပ်ချုပ်ရေးမှူးများနှင့် ကရင်အမျိုးသားတပ်မတော် – KNA (BGF) အဖွဲ့များက နယ်မြေရှင်းလင်းမှုများလုပ်ဆောင်နေသည်ဟု ဒေသခံ အမျိုးသမီး ၁ ဦးက သံလွင်ခက်ကိုပြောသည်။

၎င်းက “သူတို့ရှင်းလင်းနေတာ ၃ ရက်လောက်ရှိပြီ။ မနေ့ကအထိတော့ ၄ လုံးလောက်ရှင်းပြီးပြီ။ ၁ လုံးကတော့ ကျန်နေသေးတယ်။ မဖော်ရသေးတဲ့ ၁ လုံးက ကျန်တဲ့အလုံးတွေထက် ပိုကြီးတယ်။ သူတို့ပြောတာတော့ အန္တရာယ်များလို့ဆိုပြီး သူတို့စောင့်ကြည့်နေတယ်” ဟုဆိုသည်။

ရှင်းလင်းရန်ကျန်ရှိနေသေးသည့်လက်နက်ကြီးသည် ဖိုးပန်းသီးလမ်းထိပ်ရှိ နေအိမ်အတွင်းရှိနေပြီး ပေါက်ကွဲနိုင် သည့် အနေအထားရှိသောကြောင့် ရှင်းလင်းရန်အခက်အခဲရှိနေခြင်းဖြစ်သည်။

မြဝတီမြို့တွင်ဖြစ်ပွားခဲ့သည့် ပြီးခဲ့သည့် ၃၆ နာရီတိုက်ပွဲအတွင်း စစ်ကောင်စီလေကြောင်းကပစ်ခတ်လိုက်သည့် လက်နက်ကြီးကျရောက်ပေါက်မှုကြောင့် ရပ်ကွက် ၅ ရှိ နေအိမ် ၃ လုံးခန့် မီးလောင်ပျက်စီးခဲ့ပြီး အမိုးအကာပျက်စီးကာ ကျည်ပေါက်ရာတွေ့ရှိရသည့် နေအိမ် ၁၀ လုံး ထက်မနည်းရှိသည်ဟုလည်း ဒေသခံများ၏ ပြောပြ ချက်အရသိရသည်။

လက်ရှိတွင် အဆိုပါ ရပ်ကွက် ၅ အတွင်း ဒေသခံအချို့သာဝင်ရောက်နေထိုင်နေကြပြီး ဒေသခံများ မိမိတို့နေအိမ်သို့ပြန်လာနေထိုင်ရန် ကရင်အမျိုးသားတပ်မတော် – KNA တပ်ဖွဲ့ဝင်များက ပြောဆိုမှုများလည်းရှိနေသည်ဟု ဒေသခံ အမျိုးသား ၁ ဦးက ဆိုသည်။

“သူတို့ကတော့ ပြည်သူတွေကို ဘာမှမဖြစ်တော့ဘူး လာပြန်နေဆိုပြီးပြောတယ်။ အခုကတော့ ရပ်ကွက်ထဲမှာ လူသိပ်မရှိသေးဘူးလေ။ ကျွန်တော်တို့လည်း အိမ်မှာသာလာပြန်နေရတယ်။ အိပ်ရတာတောင် ခေါင်းမချရဲပါ ဘူး” ဟုဆိုသည်။

လက်ရှိတွင် မြဝတီမြို့၏  မြို့စောင့်တပ် ခလရ – ၂၇၅ကို စစ်ကောင်စီဘက်က ပြန်လည်ထိန်းချုပ်ထားပြီး ဘားအံ အခြေစိုက် တပ်မ ၂၂ ကတပ်ဖွဲ့ဝင်များ ယနေ့မနက်ပိုင်းတွင် စစ်အင်အားတိုးချဲ့ရန်ရောက်ရှိနေသည်ဟု မြေပြင်သတင်းရင်းမြစ်များထံက သိရသည်။

ဓာတ်ပုံ – သံလွင်ခက်။

ပုံစာ – မြဝတီမြို့ ရပ်ကွက် ၅ အတွင်းရှိ လက်နက်ကြွင်းကျန်များနှင့် ပျက်စီးနေသည့်နေအိမ်များမြင်ကွင်း။

************

Telegram – >  https://t.me/ThanLwinKhetNews/4454

YouTube -> https://youtu.be/DEtRcu9PBI4

Website -> https://thanlwinkhet.net/?p=9585