မြစ်ကြီးနားထောင်တွင်းပစ်ခတ်မှု အကျဉ်းသားသေဆုံးမှုရှိ
*****
ထွယ်
ဧပြီ ၁၉၊ ၂၀၂၄။
ကချင်ပြည်နယ် မြစ်ကြီးနားအကျဉ်းထောင်တွင် ယမန်နေ့ညက ထောင်ဆူပူဖြစ်ပွားခဲ့သဖြင့် ထောင်တွင်းပစ်ခတ်မှု ဖြစ်ပွားခဲ့သည်ဟု ထောင်ဝန်ထမ်းနှင့်နီးစပ်သူ ၁ ဦးထံကသိရသည်။
အဆိုပါ ထောင်တွင်းပစ်ခတ်မှုတွင် ထောင်တွင်းအကျဉ်းသား ၄ ဦးသေဆုံးခဲ့ပြီး ထိခိုက်ဒဏ်ရာရရှိသူများလည်း ရှိသည် ဟု ၎င်းက သံလွင်ခက်ကို ပြောသည်။
“နှစ်ကြီးသမားတွေကို မလွှတ်ပေးတဲ့ကိစ္စကြောင့် ထောင်အတွင်းမှာ ဆူပူမှုဖြစ်လို့ ဟန့်တားရင်းပစ်တာ။ ဘောက် ဆွဲခြောက်လန့်တာပေါ့။ တကယ်လည်း ပစ်တာထိသွားပါတယ်” ဟုပြောသည်။
ပစ်ခတ်မှုကြောင့် သေဆုံးသွားသည့် အကျဉ်းသား ၄ ဦးအနက် ၂ ဦးက မြစ်ကြီးမြို့နယ်ကဖြစ်ပြီး ကျန် ၂ ဦးက ဗန်းမော်မြို့နယ်နှင့် မိုးညှင်းမြို့နယ်တို့ကဖြစ်သည်ဟု သတင်းများထွက်ပေါ်နေသော်လည်း သံလွင်ခက်က ဆက် လက်စုံစမ်းနေဆဲဖြစ်သည်။
စစ်ကောင်စီတပ်ဖွဲ့ဝင်များ၏ပစ်ခတ်မှုကြောင့် အကျဥ်းသားများသေဆုံးခဲ့သလို ထိခိုက်ဒဏ်ရာရရှိသူများလည်းရှိ ခဲ့ကာ ယခုအချိန်၌ မြစ်ကြီးနားဆေးရုံကို ပို့ဆောင်ထားသည်ဟု ထောင်ဝန်ထမ်းနှင့် နီးစပ်သူက ပြောသည်။
ကချင်ပြည်နယ် မြစ်ကြီးနားအကျဉ်းထောင်တွင် ယမန်နေ့ညနေ ၄ နာရီခန့်ကတည်းက ထောင်တွင်းဆူပူမှုဖြစ် ပွားနေပြီး စစ်ကောင်စီတပ်ဖွဲ့ဝင်များလည်း လုံခြုံရေးတင်းကြပ်လျက်ရှိသည်ဟု ဒေသခံများထံက သိရသည်။
ဒေသခံ ၁ ဦးက “မနေ့ညလည်း တစ်ညလုံး စစ်သားတွေ၊ စစ်ကားတွေ ထောင်မှာ အပြည့်ပဲ။ ဘယ်သူမှ ကပ်လို့ မရဘူး။ မနက်အစောပိုင်းလည်း စစ်သားတွေ လုံခြုံရေးယူထားသေးတယ်။ အခုတော့ မရှိနေဘူး။ ညပြန်လာ မလား မသိဘူး” ဟု ပြောသည်။
စစ်ကောင်စီတပ်သည် ဧပြီလ ၁၇ ရက် မြန်မာ့နှစ်ဆန်း ၁ ရက်တွင် မြစ်ကြီးနားအကျဥ်းထောင်က အကျဉ်းသား ၄၂ ဦးလွှတ်ပေးခဲ့ပြီး အမျိုးသားဒီမိုကရေစီအဖွဲ့ချုပ် – NLD ဝန်ကြီးများဖြစ်သည့် ကချင်ပြည်နယ် လူဝင်မှုကြီးကြပ်ရေး ဝန်ကြီး ဦးဇော်ဝင်းနှင့် လူမှုရေးဝန်ကြီး ဦးနေဝင်း တို့ လွတ်မြောက်ခဲ့သည်။
ထို့အပြင် ကချင်ဘာသာရေးဆရာ သိက္ခာတော်ရ ဒေါက်တာခလမ်ဆမ်ဆွန် ကိုလည်း လွတ်ငြိမ်းဖြင့် လွှတ်ပေးခဲ့ သော်လည်း ယင်းညတွင်ပင် ပြန်လည်ဖမ်းဆီးခဲ့သည်။
လက်ရှိမှာတော့ ဆရာတော်၏ဇနီးနှင့်အတူ ငြိမ်းချမ်းရေးအကျိုးဆောင်အဖွဲ့ – PCG ၏ တာဝန်ရှိသူလည်း အတူရှိ နေကာ နေအိမ်ပြန်ရောက်ခြင်းမရှိသေးဘဲ စစ်ကောင်စီတပ်ကညှိနှိုင်းဆွေးနွေးရန် ဖမ်းဆီးထားဆဲဖြစ်သည်ဟု သိရသည်။
မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်၏ ထုတ်ပြန်ချက်အရ ဧပြီ ၁၇ ရက် စစ်ကောင်စီက လွှတ်ပေးသည့် မြန်မာတစ်နိုင်ငံလုံးရှိ အကျဉ်းသား ၃,၀၀၀ ဦးတွင် နိုင်ငံရေးအကျဉ်းသား ၁၀၁ ဦးပါဝင်ပြီး မြစ်ကြီးနားက နိုင်ငံရေးအကျဉ်းသား ၃ ဦးသာ ပါဝင်သည်ဟု သိရသည်။
************
Telegram – > https://t.me/ThanLwinKhetNews/4345
YouTube -> https://youtu.be/DEtRcu9PBI4
Website -> https://thanlwinkhet.net/?p=9378
