ဖျာပုံအကျဥ်းသားများကို ထောင်ပြောင်းမည်ဆိုကာ ခေါ်ထုတ်သွား
********
သဇင်
ဧပြီ ၅၊၂၀၂၄။
ဧရာဝတီတိုင်း ဖျာပုံအကျဉ်းထောင်က အကျဉ်းသား ၁၁ ဦးကို အင်းစိန်ထောင်နှင့် သာယာဝတီထောင်သို့ပြောင်းရွှေ့မည်ဟုဆိုကာ စစ်တပ်၊ရဲနှင့် အကျဉ်းဦးစီးဌာနက ခေါ်ထုတ်သွားသည်ဟု ယနေ့မနက် ၁၀ နာရီခန့်တွင် မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM က သတင်းထုတ်ပြန်သည်။
အဆိုပါ အကျဉ်းသား ၁၁ ဦးမှာ ပြီးခဲ့သည့်မတ်လ ၃၁ ရက်ဖြစ်စဉ်အတွင်း ဥပဒေမဲ့ရိုက်နှက်ခံခဲ့ရပြီး ထပ်တိုးထောင်ဒဏ် ၆ လ ထပ်မံချမှတ်ခံရသော နိုင်ငံရေးအကျဉ်းသားများလည်းပါဝင်သည်ဟု ထုတ်ပြန်ချက်တွင် ဖော်ပြ ထားသည်။
မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် ဦးဆောင်ကော်မတီဝင် ကိုသိုက်ထွန်းဦး က “မနက်ခင်းကတည်းက ပါဆယ်လာပို့တဲ့သူတွေကို လက်မခံဘူး။ လူကြီးလမ်းကြောင်းရှိတယ်ဆိုတာ အကြောင်းပြတယ်။ မနက် ၁၀ နာရီမှာတော့ စစ်တပ်ရော၊ ရဲရော၊ ရဲထဲမှာဆို ရဲမှူးအဆင့်ရှိတဲ့သူတွေပါဝင်ပြီးမှ အင်းစိန်နဲ့သာယာဝတီထောင်ကို ထောင်ပြောင်းဖို့ဆိုပြီးမှ ခေါ်ထုတ်သွားတာ” ဟုဆိုသည်။
အဆိုပါအကျဉ်းသား ၁၁ ဦးတွင် နိုင်ငံရေးအကျဉ်းသား ၄ ပါဝင်သည်ဟု ကနဦးသိရှိထားပြီး အမိန့်ချမှတ်ပြီးသည့် အကျဉ်းသားများကို ထောင်ပြောင်းရန်စီစဉ်ခြင်းဖြစ်သည်ဟု ကိုသိုက်ထွန်းဦး က ဆက်ပြောသည်။
“၃၁ ရက်နေ့က အရိုက်ခံရတဲ့သူတွေထဲမှာ အမှုရင်ဆိုင်နေရဆဲ ပြည်သူတွေကိုတော့ သူတို့ထားခဲ့တယ်။ အမိန့်ကျပြီးသားသူတွေကိုတော့ သူတို့ခေါ်သွားတယ်။ ခေါ်သွားတဲ့အခါမှာလည်း အကျဉ်းထောင်ရဲ့ လုပ်ထုံး လုပ်နည်းအတိုင်း ရဲကားတွေ၊ စစ်ကားတွေနဲ့ ခေါ်တာမျိုးမဟုတ်ဘဲနဲ့ အိမ်စီးကားတွေနဲ့ ခေါ်ထုတ်သွားတာဖြစ်တဲ့အတွက် ပိုပြီး စိုးရိမ်ရပါတယ်”ဟုဆိုသည်။
ပြီးခဲ့သည့် မတ်လ ၃၁ ရက်တွင် ဖျာပုံအကျဉ်းထောင်ဝန်ထမ်း ၁ ဦးက သက်ကြီးပိုင်းနိုင်ငံရေးအကျဉ်းသား ၁ ဦး အား ဆဲဆိုခဲ့သည်ကစ၍ ခိုက်ရန်ဖြစ်သည်အထိဖြစ်ပွားခဲ့ပြီး ထိုနေ့ညနေပိုင်းတွင် အကျဉ်းထောင်အတွင်း စစ်ကားများဝင်ရောက်လာကာ သေနတ်ပစ်ဖောက်ဖြိုခွင်းခဲ့သည်။
ယင်းနောက် အဆိုပါဖြစ်စဉ်အတွင်းပါဝင်ခဲ့သူ နိုင်ငံရေးအကျဉ်းသားအပါအဝင် အကျဉ်းသား ၁၇ ဦးခန့်ကို အချုပ်ခန်းပြင်ပခေါ်ထုတ်ကာ ရိုက်နှက်စစ်ဆေးမှုများလုပ်ဆောင်ခဲ့ပြီး ထောင်ဒဏ် ၆ လ ထပ်မံချမှတ်ခဲ့သည်။
ထိုအကျဉ်းသား ၁၇ ဦးခန့်တွင် အမှုရင်ဆိုင်နေရဆဲအကျဉ်းသားများလည်းပါဝင်နေသည်။
ယနေ့ ဧပြီလ ၅ ရက်၌ ထောင်ပြောင်းရွှေ့ခံရသူများထဲတွင်တော့ အမှုရင်ဆိုင်နေရသည့် အကျဉ်းသားများမပါဝင်ဘဲ အမိန့်ချမှတ်ပြီးသည့် အကျဉ်းသား ၁၁ ဦးကိုသာ ခေါ်ထုတ်သွားခြင်းဖြစ်သည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားကွန်ရက် တာဝန်ရှိသူများထံက သိရသည်။
ဓာတ်ပုံ – မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်။
ပုံစာ – မတ်လ ၃၁ ရက်တွင် ဥပဒေမဲ့ရိုက်နှက်ခံရသူများကို ဧပြီလ ၁ ရက်၌ ရုံးထုတ်လာစဉ်။
************
Telegram– > https://t.me/ThanLwinKhetNews/4196
YouTube – > https://youtu.be/6X9AvN2FnIw?si=BGNM7eyxs7ZtJG7d
Website – > https://thanlwinkhet.net/?p=8983
